Njati ni tayarisha ni bblo lod’radha dho ró, nja ndrŭ na ni loti nari do nzɨ ni ro nji ri. Yesu kongʉe ndi unakpa tsotso kpa tayarisha ndima bblo lod’radha dho kpa ndi cho nari njí. (Lu. 10:1-11) Yesu ddingʉe ndi unakpa dho ná lo na kpa njingʉe njí nari dzá lo dho kpa bangʉe hwè bbo ndima nji ná lo dho. Ko ká ka ko tayarisha ko lod’radha dho ngbaribbai? Ringani ko ddinga ngbaribbai ma ko ka ko d’ra lo bblo pli ko adi loti nari bbai nari djo. Føri kina, ringani ko ddinga bí ina kodhó eneo nǎ ndrŭ adi dhu ná aro inga gbo kʉ ná ngadhudha ma, ngbaribbai ma ko ka ko ngʉ ri goti nari ma na djo. Ndirigoti ndrŭ dhi ngana ko si ná saa djo, akoko ko jotso, ako gbonga ndirigoti akodho ko kau bbai. w24.04 16 §6-7

Hwè dhi lo-i ko adi d’ra dho ná ddikpa bbo pli kʉ ná lo e, ko ji Yova Mungu ma, ke ró takatifu kʉ ná dho ma na nari. Ko adi kodhó lod’radha dhi njí nja ji ko ji ná Mungu dho ko madha bbʉ nǎ ná chu. Ko adi ko tso gba ko thí nǎ ro krʉ i lo na: Ni kaka Yova kodhi Mungu ni ba madha ma, heshima ma, kpakpanga ma na. Ko adi madha ma, heshima ma na bbʉ Yova dho njati ko di rid’ra nja ndrŭ dho nari kʉ, ke i “nongʉe krʉ kʉ ná ritsi” ndirigoti ko nganga ma ke i nongʉe ró. Ko adi kodhó kpakpanga bbʉ ke dho njati ko di njínji kodhó saa na, kodhó klø na ndirigoti kodhó kʉ ná ritsi na lod’radha dhi njí kana ndirigoti ko d’ra lo kodhó hali u ritso ná ngatsi ró. (Mt. 6:33; Lu. 13:24; Kol. 3:23) Dʉ chu nǎ, ko ka ko pori ɨ, ji ko ji ná Mungu djo ko loti nari ko jirie bbo. Føri djolu pli, jidha adi ko ronga cho ko tilo ndrŭ dho ke ró dho djo ndirigoti ngbà di ná Mungu ma ke kʉ nari djo. w24.05 17 §11

Yova adi ngoi ma, ji le nanga jini nari ma na bbʉ ko dho ndirigoti gosi ná saa na ke si cho ró nŭnŭ di shinga bbʉ ko dho. Ko ka ko li kodhó ngab’odha Yova djo dhonalo ke kʉ ù na ndirigoti kpakpanga na nja ndi bbʉ ko kobe d’e. Ndirigoti fø lo ko u nari adi ko ronga cho ko é njidha dhi ritsi na bí ke dho ko madha bbʉ nari kana, ddiddi anziro ngʉ njínji ke dho chi ndima tøni ro ná ndrŭ bbai. Føri i kʉ Timoteo njingʉe ná lo. (Ebr. 6:10-12) Timoteo ngʉe kpakpa kʉ ná udha na shi di ná Mungu djo nari kʉ, ke si ndi kobe bbʉ nì. (1 Ti. 4:10) Føri dzá lo dho i ke ngʉ adi njínji kpakpanga na Yova ma, nja ndrŭ ma na dho. Ká ngbá chu nǎ? Mutume Paulo lingʉe ke kpakpa ke rá anzi maendeleo ndi nji nari na longaddidha dhi njí kana ndirigoti kutaniko nǎ. Føri kina, Timoteo ngʉe bblo kʉ ná loroji ndi lai Wakristo dho; jadda ndrŭ ma, ngó ndrŭ ma na dho. Kedhó ngʉe kpakpa kʉ ná nja njí maddi, føri tsungʉe ndi nǎ, ke bbʉ ndrŭ dhó lo ungʉe ná li tso o ná ji dhi shauri. (1 Ti. 4:11-16; 2 Ti. 4:1-5) Timoteo chungʉeri Yova si ndi kobe bbʉ nì.—Ro. 2:6, 7. w24.06 22-23 §10-11