Ni ka ni é bbʉbbʉ kʉ ná hwè na nì

 1. Kodhó “kiroho nǎ mahitaji” ká kʉ addu ndirigoti ri ká ka ndi liri ko é hwè na ngbaribbai?

BBɄBBɄ kʉ ná hwè nga kʉ hwè na kʉ nari bbai, le le mbu sese ddo dho nari dhé ri. Ro, ri na le ka le é ledhó maisha lu kana. Ká ngbaribbai? Ngø tsɨ djó Yesu njingʉe ná mahubiri nǎ ke pongʉeri: “Hwè na kʉ nari kʉ ngbà chu ndima dhó kiroho nǎ mahitaji ná ndrŭ.” (Mt. 5:3) Yesu chungʉeri chu nari kʉ, ndrŭ kʉ na ná ù kʉ ndima chu ngano ná ke Yova Mungu ndirigoti ndima bbʉ madha ke dho. Føri kʉ kodhó “kiroho nǎ mahitaji.” Yova kʉ “hwè dhi Mungu” nari dho, ke dho madha bbʉ ná ndrŭ dho maddi ringani ndima é hwè na.​—1 Ti. 1:11.

2-3. (a) Yesu ká pongʉeri ngbà di ná ndrŭ ma ka ndima é hwè na ddi? (b) I lo nǎ ká ko si loti ngbá lo djo ndirigoti addudho ká fø lo ngani nga?

² Njati rie nzɨ ko bani kpakpalo na ró dhé ká ko ka ko é hwè na? Nga. Yesu d’rangʉe ndidhó Ngø tsɨ djó mahubiri nǎ nari kʉ, ké dho le nanga ka ndi keni ná lo. “Dzz dzz ndima” njie chenga nari djotsina inga ndima bani na maisha nǎ ná kpakpalo djotsina ná ndrŭ maddi ka ndima é hwè na. Yesu pongʉeri ki “chølo djó nzani ná ndrŭ” inga ndi unakpa ndima kʉ nari djó “nzani” ná ndrŭ maddi ka ndima é hwè na. (Mt. 5:4, 10, 11) Nde, ngbaribbai ká ri ka ndi kaka ko é hwè na fø di ná lo kana?

³ Yesu ddingʉeri nari kʉ, hwè na ko ka ko é dho nari nga kʉ maisha nǎ ko ba ná bblo lo ri, ro ko ka ko é hwè na njati ko gba kodhó kiroho nǎ mahitaji tso ndirigoti ko kana nga é chøchø Mungu na ró. (Yak. 4:8) Nde, ko ká ka ko njiri fø ngbaribbai? I lo nǎ ko si djo loti ná gbo kʉ ná lo si ko tsotso ko ko é bbʉbbʉ kʉ ná hwè na d’e.

 4. Ya kwanza ringani ko njí nari ká kʉ ngbá lo ndiro ko é bbʉbbʉ kʉ ná hwè na d’e? (Zaburi 1:1-3)

⁴ Lo ya kwanza: Nja ko é bbʉbbʉ kʉ ná hwè nǎ d’e, ringani ko di kiroho nǎ nyo nyǒ. Ndrŭ ma, zǎ ma na krʉ dhó lo u ndima nyó kimwili nǎ nyo ndiro ndima di shi d’e. Ro ndrŭ dhé adi kiroho nǎ nyo nyǒ. Ndirigoti kodhó lo uri ko njiri fø. Fø lo dho Yesu pongʉeri ɨ: “Ndrŭ dho nzá ringani ndima di shi mukati dho dhé ri, ro Yova tso nǎ ro si ná krʉ kʉ ná lo dho.” (Mt. 4:4) Føri dho, ri nzá ngani ko bbá ddo ro da ddikpa maddi nzá ko zø Mungu dzá Lo ro ri. Zaburi ndi ná ke pongʉeri ɨ: ‘Hwè na kʉ nari kʉ ji nanga jini Yova dzá yadha dho ndirigoti zø ri zø dyína ma, kuna ma ná ke.’​—Azø Zaburi 1:1-3.

5-6. (a) Biblia nǎ ro ká ko ka ko chu ngbá lo? (b) Biblia ko zø nari ká ka ndi kó ko tsotso ngbá chu na?

⁵ Yova ji ko ji ná lo dho, ke d’ra ko ka ko njí ná lo Biblia chulu ndiro ko é bbʉbbʉ kʉ ná hwè na kodhó maisha nǎ d’e. Ko adi ke pɨ kodhó maisha djo nari ká kʉ addu ma nari djo lo chu. Ko adi lo chu ngbaribbai ma ko kana nga ka ndi é chøchø ke na ndirigoti addu ma ko ka ko njí ndiro ke njí kodhó chenga zø nari djo. Ndirigoti ko chu lo gosi ná saa na ke tsoni djo ko dho ná bblo kʉ ná ngab’odha djo maddi. (Yer. 29:11) Fø bbʉbbʉlo ko chu Biblia nǎ ro nari liri ko é hwè na bbo!

⁶ Ko churi nari kʉ, Biblia adi bblo kʉ ná shauri bbʉ krʉ ddo ró ko ka ko njí maisha nǎ ná lo djo. Njati ko dyø fø shauri kodhó maisha nǎ ró ko ka ko é hwè na. Njati rie bʉ ka ndi bʉ ni thí ná ngbǎ di ná lo na ma ni bani maisha nǎ ri ró, aba saa bbo ni zø Mungu dzá Lo ndirigoti ni ddinga ri djo. Yesu pongʉeri: “Hwè na kʉ nari kʉ Mungu dzá Lo rr ndirigoti ri ronga b’o ná ndrŭ!”​—Lu. 11:28.

 7. Ni tsotso ká ngbá lo ka ndi kó ni ba faida bbo, Mungu dzá Lo ni zø nari nǎ ro d’e?

⁷ Mungu dzá Lo ni zø ná saa na, aba saa ndiro ni nanga jini ji ni zø ná lo dho d’e. Loroji na, i di ná lo ká barie ni ro b’lo? Ddikpa ke rɨ bbo ni jirie ná nyo. Ro, njaro ni dho saa kʉ sese inga ni ngaddi nja lo djo nari dho ni nyo ri lele, ro ni nzá mbu ri ká o ngbǎ ma nari bblo ri. B’lo ni dya nganyodha tso nari goti, ni ra ri famu nari kʉ ni nyoe nga lele, ro ni ra riutso d’i ni ka ni nyoe nga dzodzo ndiro ni mbue nyo ká o ngbǎ ma nari bblo d’e. Biblia ko zø ná saa na ma ri kʉ fø i. Njati ko di Biblia zø lele ró ko nzá ka ko ba hwè Yova ddi ko dho ná lo nǎ ro ri. Aba saa ndiro ni nanga jini ji Mungu dza Lo ni zø nari dho; athɨ zø ni zø ná loroji ni djǒ na, addinga lo le ti djo ná ndrŭ dhó sauti djo ndirigoti addinga zø ni zø ná lo djo. Ni di rinji fø nari si rili ni é hwè na.

 8. “Nyodyu dhi chi njí dhi noke” ká adi ndidhó bbʉni ná njínji ngbaribbai? (Anja maelezo ya chini.)

⁸ Yesu lingʉe “nyodyu dhi chi njí dhi noke” nja ndi bbʉ kiroho nǎ nyo ngbà thonga ná saa na d’e, føri dho ko adi nguni bblo kiroho nǎ.b (Mt. 24:45) Chi njí dhi noke bbʉ ko dho ná kiroho nǎ nyo krʉ adi ndi dyʉ Biblia nǎ kʉ ná lo ro. (1 Te. 2:13) Kiroho nǎ nyo adi ko tsotso kó ko chu Yova dhó ngaddidha Biblia rid’ra nari bbai. Føri dho i ko adi Dzamu dhi Munara ma, Amuka ma! nja vichapo ma, jw.org djó kʉ ná lo ma na zø. Føri dho i ko adi ko tayarisha yenga ddo kana e ná njudha ma, yenga dhi njudha ma na dho. Ndirigoti ko adi bi ró si ná JW Télédiffusion dhi programu nja njati ri bani ngbà ró. Njati ko di saa ba ngbà ko nyó kiroho nǎ nyo ró, føri ka ndi kó ko tsotso ko njí ya pili nzini ko tsó ná lo ndiro ko é bbʉbbʉ hwè na d’e.

 9. Ya pili ko ka ko njí nari ká kʉ ngbá lo ndiro ko é bbʉbbʉ kʉ ná hwè na d’e?

⁹ Lo ya pili: Nja ko é bbʉbbʉ kʉ ná hwè na d’e ringani ko rrnga Yova dhó kanuni dho. Zaburi ndi ná ke pongʉeri ɨ: “Hwè na kʉ nari kʉ, nì Yova do nji ná ndrŭ krʉ, ni bbi kedzá chu lu ná ndrŭ” (Zb. 128:1) Yova do ko nji nari na mana kʉ, ko bbʉ heshima bbo ke dho ndirigoti ko pʉ ndro ke ndro ná lo pʉ ko ró ro. (Mez. 16:6) Føri dho ko adi kpakpanga nji ko rrnga Yova dhó kanuni po bblo lo ma, chelo ma na djo ná lo dho ddiddi Biblia rid’ra nari bbai. (2 Ko. 7:1) Ko sie hwè na njati ko njí ji Yova ji ná lo ndirigoti ko pʉ ndro ke ndro ná lo ko ró ro ró.​—Zb. 37:27; 97:10; Ro. 12:9.

10. Waroma 12:2 ridho nari bbai, kodhó ká ngbá njí bbʉni?

¹⁰ Azø Waroma 12:2. Njati ddikpa le chu Yova kʉ bbonga na ndi vʉ lonanga bblo lo ma, chelo ma na djo nari ngbà ró, ledho ringani ndi rrnga Mungu dhó kanuni dho. Loroji na, ddikpa ke ka ndi churi chu guvernema kʉ haki na ndi bbʉ yadha ngbá vitese na ma le ka le d’a chu nǎ nari djo. Ro ke nzá ka ndi uri ndi rrnga fø yadha dho ri. Føri dho, ke ka ndi di d’a lele riengani ná nga djolu. Ko adi Yova dhó kanuni dho ko ngarr nari kʉ mana na bbo kodhó maisha nǎ nari dhǒ kodhó nyi chulu. (Mez. 12:28) Daudi ma mbungʉe ndi fø i nari dho ke pongʉeri Yova dho ɨ: “Ni rili ma chu shinga dhi chu. Ni njí hwè kʉ bbo ndirigoti ni thó tha djó ri laidjo hwè kʉ theinga dho.”​—Zb. 16:11.

11-12. (a) Njati rie bʉ ko thí bʉni ri ró, ká ringani ko é krr ngbá lo djo? (b) Wafilipi 4:8 nǎ kʉ ná lo ká ka ndi kó ko tsotso ko vʉ bblo kʉ ná le nyodjedha ngbaribbai?

¹¹ Ko thí é bʉ ndi bʉni ro ná saa na, ko adi rine ko nji ddikpa lo ndiri kó tsotso ko si ko nanga rid’o dho ná kpakpalo djolu d’e. Føri kʉ ngbà le ka le famu ná lo, ro ringani ko é krr ndiro nzɨ ko nji ndro Yova ndro ná lo ró.​—Efe. 5:10-12, 15-17.

¹² Filipi nǎ Wakristo dho Paulo ndingʉe ná barua nǎ ke jangʉeri kpa di ngaddi “chø kʉ ná lo ma, . . . tsetse ná lo ma, . . . ji le ka le ji ná lo ma, [ndirigoti] bblo kʉ ná nyi ma na djo.” (AZø Wafilipi 4:8.) Nzá mai Paulo ndingʉe lo le nyodjedha djo ro, ke ndingʉe ná lo ka ndi kó ko tsotso ko nyodjedha dhi lo kana maddi. Amburi: Ni ø fø verse nǎ le tilo djo ná “lo” thika i lo na, “dyi ma, filme ma, zø le zø ná ritsi ma, inga video dhi kpa (muchezo) ma na na.” Fø ni njiri nari ka ndi kó ni tsotso ni chu utso Mungu u ná lo ndirigoti nzá tso Mungu u ná lo. Ko jirieri kodhó maisha nǎ ko nji ná lo tso njunju Yova dhó kanuni po ná lo na. (Zb. 119:1-3) Føri dho kodhó zamiri kʉ tse ndi tse ro nari dho, akotilo ya tatu ka ndi liri ko é bbʉbbʉ hwè na d’e ná lo djo.​—Mdo. 23:1.

13. Ya tatu ko ka ko njí nari ká kʉ ngbá lo ndiro ko é bbʉbbʉ hwè na d’e? (Yohana 4:23, 24)

¹³ Lo ya tatu: Ali Yova ni má nari anziro nidhó maisha nǎ. Ko No ná ke kʉ Yova nari dho, ke kaka ko bbʉ madha ndi dho. (Ufu. 4:11; 14:6, 7) Føri dho, bbo na mana kʉ kodhó maisha nǎ nari kʉ, ko bbʉ madha ke dho ngbà tso ke u ná chu lú, føri na mana kʉ ko má ke “roho na ndirigoti bbʉbbʉlo na.” (Azø Yohana 4:23, 24.) Ko jirieri Mungu dhó roho takatifu ddá chutso ko dho ndiro ke dho ko bbʉ ná madha tso gbani gba kedzá Lo nǎ kʉ ná bbʉbbʉlo na d’e. Ringani ko li ke ko má nari anziro njati rie ko di nǎ ná ngø nǎ kodhó njí gʉni gʉ ma ró. 100 djolu da ná ko djoi ma, ko vei ma na le sʉ prizo nǎ Yova dzá Dimu ndima kʉ nari djó dhé.c Nì mai ri kʉ føro, kpa kʉ hwè na ndima krʉ ndima ka ndima njí ná lo nji nari dho. Kpa nji ná fø lo tsu ndi nǎ, sala ma, lonanganedha ma, ndirigoti nja ndrŭ dho ndima lo d’ra Mungu dhó Pidhinga djo nari ma na. Ko di bani upinzani na ma ró, ko ka ko é hwè na, ko churi chu Yova kʉ ko na nì ndirigoti ke si ko ronga lele nari dho.​—Yak. 1:12; 1 Pe. 4:14.

14. Tajikistan nǎ ddikpa jadda le-djo ká ngbá lo bangʉe ndirigoti addudho?

¹⁴ Nja kʉ ná ko djoi ma, ko vei ma na baeni bbo pli kʉ ná kpakpalo na, ro kpa e bbʉbbʉ kʉ ná hwè na dhé dhonalo kpa njie njí ko tielo djo ná gbo kʉ ná lo na. Akotilo Tajikistan nǎ 19 dhó cho e ná Jovidon Bobojonov ró dho kʉ ná ke gʉngʉe sødda dzá njí nari dho ke bangʉeni na ná lo djo. Bi 10 ddo 4, 2019 na, ke kpa løngʉe ndirigoti kpa sʉngʉe ke prizo na ddikpa bi ro dho ndirigoti kpa njingʉeni ke na chelo nji ná ke bbai. Ke ró le njingʉe nga kʉ chø ná lo ná føri le dhongʉe video nǎ bí kʉ ná bbagʉ lú. Video nǎ le dhongʉeri nari kʉ, ke kpa njingʉe nji ma ndirigoti kpa chongʉe ke ndiro ke njí naziri ndi ngʉ sødda ndirigoti ndi thó teni d’e. Føri goti kpa d’ingʉe lo ke djo ndirigoti kpa mbangʉe ke ddikpa Ka na nja ke njinjí kpø prezida nji ke zø ndirigoti ke u ritso le bbá ke bbá ná nga djo. Fø lo krʉ kana, Jovidon tøngʉeni chi ndirigoti ke b’ongʉe ndidhó hwè ronga b’o. Nde, ká ngbaribbai? Krʉ ddo ró ke chungʉe ndidhó kiroho nǎ mahitaji chu.

15. Jovidon ká ngʉ adi kiroho nǎ nyo nyǒ ngbaribbai prizo nǎ ndi ngʉe ná saa na?

¹⁵ Prizo nǎ Jovidon ngʉe ná saa na ke ngʉ kiroho nǎ nyo nyǒ nì dhé, nga mai Biblia ma, ddikpa vichapo ma na ro ngʉe kedhó ro. Nde, føri ká ka ndi kae ka ngbaribbai? Le-djoi ma, le-vei ma na ngʉ adi kimwili nǎ nyo mba ke dho ndirigoti kpa ngʉ adi krʉ ddo ró le nji ná andiko nǎ lo ndi papie djo nari kpa ngʉ adi ru nyo ndima d’u nǎ ná saki na. Føri dho ri ngʉ adi kaka ke zø Biblia ndirigoti ke ddinga ri nǎ lo djo krʉ ddo ró. Prizo nǎ ro ke vʉ nari goti ke bbʉngʉe i shauri nzá ro d’e bani bbo pli kʉ ná kpakpalo na ná ndrŭ dho: “Huru ni kʉ ná saa na ringani ni njí krʉ ni ka ni njí ná lo ndiro ni chu lo bbo Yova djo ke dzá Lo ma, kodhó vichapo ma na ni zø nari chulu.”

16. Jovidon ká lingʉe ndi thí ngbá lo djo?

¹⁶ Ko dhi djona ngʉ ngarr Yova dhó kanuni dho. Che kʉ ná tama ma, che kʉ ná nyi ma na na ndi eé nari rɨngana, ke ngʉ ndi thí li Yova djo ndirigoti ke ji ná lo djo. Jovidon ngʉ adi ngaddi Mungu no ná bbo d’ani ná ritsi djo. Krʉ kʉ ná bbʉtsodjo ke ngʉ adi re (ndege) ngoni nari rr. Ndirigoti kuna ke ngʉ adi bi ma, dyødyø ma na nja. Ke pori: “Yova dhó ro si ná fø kado ngʉ adi rili ma é hwè na ndirigoti ma li kpakpa.” Ko di mbai po kiroho nǎ nyo ma, kimwili na nyo ma, Yova bbʉ ko dho nari dho ró ko e hwè na, ndirigoti føri adi rili ko ó kpakpa nja ko ve ngatso d’e.

17. Njati ddikpa ke bani Jovidon bangʉeni na ná fø di ná kpakpalo na ró, 1 Petro 1:6, 7 nǎ kʉ ná lo na ká ke ka ndi njinjí ngbaribbai?

¹⁷ Jovidon lingʉe Yova ndi má nari anziro. Ke chungʉeri bbo na mana kʉ ná lo kʉ ndi tøni chi bbʉbbʉ Mungu dho. Yesu pongʉeri ɨ: “Ringani ni bbʉ madha Yova nidzá Mungu dho ndirigoti ni njí takatifu kʉ ná njí ke ddiro dho dhé.” (Lu. 4:8) Sødda djó bbobbonga ma, bbasødda ma na ngʉ riji Jovidon bbá Yova dzá Dimu ndi kʉ nari tso bbá. Føri ró ro njonjo ke ngʉ adi sala nji krʉ saa ró dyína ma, kuna ma ndirigoti ke ngʉ adi rinzi Yova kó ndi tsotso ndiro nzɨ ndi gʉ ndidhó udha ró. Ngbà mai Jovidon na kpa njingʉeni nga kʉ chø ná chu lu ro, ke nzá dhé gʉngʉe ndidhó udha ro ri. Føri dho, kpadjo ke ka ndi é hwè na dhonalo, ke kpa njingʉe nji ma, ke kpa sʉngʉe prizo na ma ndidhó udha djó ná lo dho.​—Azø 1 Petro 1:6, 7.

18. Ko ká ka ko b’o kodhó hwè ronga ngbaribbai?

¹⁸ Yova chu nja ko é bbʉbbʉ hwè na d’e ringani ko njí ná lo ngbà. Ndiro le é bbʉbbʉ hwè na d’e ringani le njí ná gbo kʉ ná lo na ni njinjí ró, ni ka ni b’o nidhó hwè ronga rie ngbà di kpakpalo na ma ni bani ri ró. Føri goti ni ma ka ni si ripo i ri bbai ddi: “Hwè na kʉ nari kʉ Yova kʉ dhi Mungu ná ndrŭ!”​—Zb. 144:15.