Bamanene baleelesha kukonkela cakubonenaako cakwe Yehova cakutondesha nkuumbu, kubaabo bakakushikwa mulibungano. Kucakubonenaako, Yehova wakalinga kutalika kweelesha kucafwa bene Isilaeli nabi kabatana kwaana. Wakalinga kutuma bashinshimi bakwe nabi bene Isilaeli kabatana kwaana. Yehova wakatondesha mbwaacite nkuumbu ndyaakalwiita Osiya kwaamba ayi alekelele mukaakwe akumuboosha kuŋanda nabi kwaamba ayi wakalinga kunoocicita cilubo cinene. (Osi. 3:1; Mala. 3:7) Bamanene balakonkela cakubonenaako cakwe Yehova cakusunishisha kwaamba ayi muntu wakacita cilubo aboolele kuli Yehova, alimwi tabaciti sheenga shapa kwaamba ayi cimubete ciyumu kuboolela. Mucikoshanyo ca mwaana wakaashuka Yesu ncaakaamba, Baishi ndyebakamubona mwanaabo ‘bakamucicilila, bamukumbata akumufyonta.’ (Luka 15:20) Baishi tabakwe kulindila ayi mwanaabo ataangune kusenga kulekelelwa. Muciindi cakucita boobo, bakamucicilila mwanaabo mukwiinga bakalinga kumusuni. w24.08 pe. 28 mapa. 7-8

Kweelana a maswi ali mulilembo lya bushiku bwasunu mbwaatondesha, Yehova alapako bamwi busongo mukuliyandila. Alimwi Jemusi wakaamba ayi na Yehova wapa muntu busongo, alapa camaansa obilo akutatongooka. Taasuniiwo kwaamba ayi tunoolinyumfwa cibiibi na twamusenga butanjilishi bwakwe. Alimwi cancine ncakwaamba ayi alisuni ayi tunoosenga butanjilishi bwakwe. (Tus. 2:​1-6) Sa aswebo inga twakonkela cakubonenaako cakwe Yehova cakupako bamwi busongo? (Kulu. 32:8) Bantu bakwe Yehova balicite shoolwe shiinji shakulwiitako bamwi nshobakeeya. Kucakubonenaako, liinji tuleeishako bapya ndyetuli muncito yakushimikila. Cakukalika moyo bamanene balacafwa basebenshi bacafwilisha abamakwesu bakabombekwa kushiba bwakusebensa mikuli yabo mulibungano. Alimwi bamakwesu abenankashi bacite lushibo mukuyaka akubamba misena njotusebensesha muncito yakwe Yehova, balacafwilisha kwiishako bamwi bwakusebensa ncito ishi. w24.09 mape. 28-29 mapa. 11-12

Nobamakwesu, kwaamba ayi mweelele kusebensa mbuli munene, mulyeelete kuba “muntu utacite kampenda,” nkokwaamba ayi kuba ampuuwo ibotu mulibungano cakwaamba ayi taakuwo ceenga calengesha ayi umwi amubekeshe kucita cintu cibiibi. (1 Timo. 3:2) Alimwi mulyeelete ‘kuba ampuuwo ibotu kubantu bakunsengwe.’ Bantu batasebenseli Yehova inga baamba shibiibi pashintu nshomushoma. Sombi taakuwo ceelete kubapa kutoonsha ayi muli muntu uli kabotu alimwi ushomeka. (Danye. 6:​4, 5) Amuliipushe ayi, ‘Sa ndicite mpuwo ibotu kubamakwesu abenankashi kwiilikaawo akubantu abo batasebenseli Yehova?’ Na muli muntu ‘usunishishi bubotu,’ mulabona mibo ibotu bamwi njobacite akubalumba ceebo cakutondesha mibo iyo. (Taita. 1:8) Alimwi mulyeelete kuba muntu usangalala kucitila bamwi shibotu, kwiilikaawo ashintu nshobatamulangili kucita. Ino nceebonshi cilayandika kwaamba ayi bamanene kabatondesha mubo uyu? Nceebo cakwaamba ayi bananoosangalala kulyaaba kusebensesha ciindi cinene kucita bweembeshi akusebensa ncito shimwi sha mulibungano. (1 Pit. 5:​1-3) Nacibi boobo, lusangalalo ndobabaalo talweelani akulyaaba kuli koonse nkweenga bacita.—Milimo 20:35. w24.11 mape. 20-21 mapa. 3-5