Bweenka mbuli Yehova, inga twapako bamwi nshebatoyandika ceebo cakwaamba ayi tulibasuni. Kucakubonenaako, sa mulishiko mukwesu nabi nankashi utoyandika shakulya nabi shakufwala? Yehova inga wasebensesha ndimwe kwaamba ayi mucafwe mushominyinaanu uyo. Alimwi bantu bakwe Yehova balafwambaana kucafwako bamwi na kwacitika mapensho akuteengashila. Kucakubonenaako, paciindi ca bulwashi bwa COVID-19, bamakwesu abenankashi bakacafwa baabo bakalinga kuyandika lucafwo kwiinda mukubapako shakulya, shakufwala ashintu shimwi shakusebensesha. Alimwi baanji bakapa maali mukuliyandila akucafwilisha ncito icitwa nsengwe yoonse. Maali ayo akasebenseshekwa kucafwilisha bamakwesu bakalinga kuyandika lucafwo nsengwe yoonse ceebo ca mapensho acitika cakuteengashila. Bamakwesu abenankashi abo bakatondesha mushimu wa bwaabi kwiinda mukukonkela maswi ngotucana pa Bene Ebulu 13:16 paamba ayi: ‘Mutaluubi kucita shibotu alimwi akupako bamwi shintu nshemucite, ceebo iyi njemilambu isangalasha Lesa.’ w24.09 pe. 27 mapa. 6-7

Amuyeeye pabukaalo ubu. Mutolangoola ncito kwaamba ayi munoocana maali akuula shiyandika mumukwashi wanu. Lyalo mwacana ncito shobilo. Mwayeeyawo kabotu pamakani oonse mbuli incito isho mboshibete, inshiku abulaamfu bwaciindi nceshi munosebensa, mawoola na mamineti ngeshi munokweenda kuya kuncito, kwiilikaawo ashimwi. Alimwi incito shoonse shobilo inga kashilibo kabotu ku Mwineklistu. Mpashi inga mwasalawo ncito yomwi pancito isho ceebo cakwaamba ayi muliisuni na mpashi munanofola maali aanji. Nacibi boobo, kuli ashimwi nshomweelete kuyeeyawo kamutana kusalawo ncito njeshi munosebensa. Kucakubonenaako, sa cimwi ciindi munanokwaalilwa kucanika kumabungano na mwanjila ncito ili yoonse pancito isho? Sa incito ili yoonse pancito isho inanoopa kwaamba ayi cimwi ciindi mutanooba pomwi abamumukwashi wanu akwaalilwa kubacafwa kuyumya bushicibusa bwabo a Yehova? Kuliipusha miipusho mbuli yeeyi inga kwamucafwa kubika panembo ‘shintu shiyandika abuumbi,’ nkokwaamba ayi kulambila Yehova akucafwa mukwashi wanu lwakumushimu, muciindi cakubikila maano kukuba amaali aanji. Lyalo inga mwasalawo kucita cintu ceenga casangalasha Yehova alimwi inga wamupa shoolwe. w25.01 pe. 17 mapa. 11-13

Nabi kwaamba ayi bamwi bakamucitila shintu shitabete kabotu, inga mwashooma ayi Yehova alimusuni alimwi alamubona ayi mulayandika. Na mwalinyumfwa ayi taakuwo mbomubete, munookwiibaluka ayi Yehova wakabona mibo ibotu njomucite akumusenya kuli nguwe. (Joni 6:44) Lyoonse alilibambite kumucafwa mukwiinga alimusuni abuumbi. Kwiiya cakubonenaako cakwe Yesu inga kwatucafwa kushiba Yehova mbwaalinyumfwa. Yesu ndyaakalinga pacishi, wakalinga kutondesha nkuumbu abuumbi kubantu bakalinga kulinyumfwa ayi taakuwo mbobabete ceebo ca shintu shitabete kabotu bamwi nshobakalinga kubacitila. (Mate. 9:​9-12) Mwanakashi umwi wakalinga kuciswa bulwashi bubiibi abuumbi ndyaakamucata kucisani capeculu ceebo cakulangila ayi atokoola, Yesu wakamuyuminisha akumulumba ceebo ca lushomo lwakwe. (Maako 5:​25-34) Yesu alakonkela cakubonenaako ca Baishi cakumaninina. (Joni 14:9) Aboobo inga mwashooma ayi Yehova alamubona ayi mulayandika alimwi alabona mibo ibotu njemucite kwiilikaawo alushomo lwanu alimwi alusuno ndomucite pali nguwe. w24.10 pe. 7 mapa. 4-5