Arumiwi okami-a anolaba basa yofuneya maningi pingoni. Pyooneelatu ira rumiwi Paulo anowasimba maningi alombwana ororoleyala. Mofwanafwani-a, mukartalee lodhowa wa Makristau awu Filipi, Paulo atoomwenyula andimuwa na arumiwi okami-a. (Afl. 1:1) Abali anjinji obadiziwa, akala mbaa andimuwa venango azombwe, anosangalala maningi takala arumiwi okami-a. Mofwanafwani-a, Devan akanle rumiwi okami-a angana vyawa 18. Voi bali Luis atookala rumiwi okami-a angana vyawa 50. Voonga mwemo mwadhivwela liye, bali Luis aongile ira: “Ndathuulela udhivela unondithonyi-edha pingo, ndinoona ira ndi ngari ilukulu maningi kala rumiwi okami-a.” Mu ndi mwemo abali anjinji ano-eliwa kala arumiwi okami-a munodhivwela aliwa. Akala muli obadiziwa, thitho kamunakale rumiwi okami-a, n’nga munooda dhilimbi-edha ira mukale rumiwi okami-a? w24.11 14 ¶1-3

Angana vyawa 39, Mwene Ezekiya wau Yuda atoobulela marenda malukhulu. Namaongela Esaya atom’mwandela milanyu yokhumela wa Yohova yoonga ira unodha kwaa namarenda enao. (2 Ma. 20:1) Vinooneya ira wa Ezekiya kavali yapama. Liye angavwide milanyu yosukwali-ila, atoola maningi thitho atoolobela wa Yohova mosembezela. Yohova atookhuziwa na ula wa Ezekiya thitho moriya rima atom’mwandela ira: “Nditovwa lobelo laa thitho nditoona mi-odaa. Ndinouili-a.” Dhela mwa Esaya, Yohova atoolanyedha ira unodha laphi-a ingumi ya Ezekiya thitho novulumucha Yerusalemu mandhani mwa Asuri. (2 Ma. 20:4-6) N’nga munorucheya namwasa wa marenda malukhulu enao anoona nyo ira kamunainle? Mulobelenga wa Yohova masiki mulanga. Bibilya linonisikimizeli-a ira Yohova wenuo ngu “Baba wa tangaranga dhilukhulu thitho Nlungu wenuo unonididili-a va yorucha ili yothene,” unodha nididili-a va vyowesedha vi-u vyothene.—2 Ak. 1:3, 4. w24.12 24 ¶15-17

Vinodha kala vyosangalali-a dhawachela atu enao anofuna dhavenyathi-iwa. Ninodha sangalala funjedha vyongo vinjinji vyoonga Yohova dhela muvyongo vipanduchile liye. (Sal. 104:24; Esa. 11:9) Yosangalali-a maningi choi ninodha lambelanga Yohova mo-odhiomba landu namwasa oi natoodawi-a vyongo vinango. N’nga munodha rumela i-yachi vyongo vyothene namwasa ofuna “sangalala wahora yoyeva voira vyodawa”? (Aeb. 11:25) Kamunafune irana vyevyo. Ninodha rumela i-ya yongo iliyothene va-eeni ira nifwanye maraeli-o enala. Kathuulelani ira vyongo vinodedi-edhela i-yo paradaizo dambo n’nango vinodha ireyadi. Ninodha onga ee-ni ningali paradaizoni. Vyevi kavyaodeye aakale ira Yohova kaanidhiveliwana novelela yotuva ya Mwanee. w25.01 29 ¶12