Ebandeli

21 Mpe Yehova atyelaki Sara likebi kaka ndenge alobaki, mpe Yehova asalelaki Sara kaka ndenge alobaki.+ 2 Mpe Sara azwaki zemi+ mpe na nsima, abotelaki Abrahama mwana mobali na bobange na ye, na ntango oyo etyamaki, oyo Nzambe alobelaki ye.+ 3 Na yango, Abrahama apesaki mwana na ye ya mobali nkombo Yisaka,+ mwana oyo ye abotaki, oyo Sara abotelaki ye. 4 Mpe Abrahama akataki mwana na ye Yisaka ngenga ntango akokisaki mikolo mwambe, kaka ndenge Nzambe apesaki ye etinda.+ 5 Mpe Abrahama azalaki na mbula monkama (100) ntango abotaki mwana na ye Yisaka. 6 Bongo Sara alobaki ete: “Nzambe abongiseli ngai likambo moko ya kosɛka: moto nyonso oyo akoyoka yango akosɛka ngai.”+ 7 Mpe ye alobaki lisusu ete: “Nani akokaki koloba na Abrahama ete: ‘Sara akomɛlisa bana mabɛlɛ,’ kasi naboteli ye mwana mobali na bobange na ye?”

8 Boye mwana yango azalaki kokola mpe bakilisaki ye mabɛlɛ;+ bongo Abrahama asalaki fɛti monene na mokolo oyo bakilisaki Yisaka mabɛlɛ. 9 Mpe Sara azalaki komona ndenge mwana ya Agare Moezipito,+ mwana oyo ye abotelaki Abrahama, azalaki kosɛka.+ 10 Bongo ye abandaki koloba na Abrahama ete: “Benganá moombo mwasi oyo ná mwana na ye, mpo mwana ya moombo oyo akozwa te libula elongo na mwana na ngai, elongo na Yisaka!”+ 11 Kasi likambo yango esepelisaki Abrahama ata moke te mpo na mwana na ye.+ 12 Bongo Nzambe alobaki na Abrahama ete: “Likambo moko te na oyo Sara azali se kolobela yo mpo na mwana wana mpe mpo na moombo na yo ezanga kosepelisa yo. Yoká mongongo na ye, mpamba te oyo ekobengama momboto na yo ekoya na nzela ya Yisaka.+ 13 Kasi mwana ya moombo oyo,+ nakokómisa mpe ye ekólo, mpamba te ye azali mwana na yo.”+

14 Bongo Abrahama alamukaki ntɔngɔntɔngɔ mpe akamataki mampa mpe molangi ya mai ya mposo ya nyama mpe apesaki yango na Agare,+ atyaki yango na lipeka na ye, apesaki ye ná mwana,+ bongo atikaki ye akende. Mpe asimbaki nzela mpe azalaki koyengayenga na esobe ya Beere-sheba.+ 15 Nsukansuka mai esilaki+ na molangi ya mposo ya nyama mpe abwakaki+ mwana na nse ya mwa banzete ya mikemike. 16 Bongo akendaki kofanda ye moko, mwa mosika, na ntaka ya kobwakama ya eloko na litimbo, mpamba te alobaki ete: “Namona te ntango mwana akokufa.”+ Bongo afandaki mwa mosika mpe abandaki kotombola mongongo na ye mpe kolela.+

17 Na yango, Nzambe ayokaki mongongo ya mwana,+ mpe anzelu ya Nzambe abengaki Agare longwa na likoló mpe alobaki na ye+ ete: “Likambo nini, Agare? Kobanga te, mpamba te Nzambe ayoki mongongo ya mwana epai azali. 18 Tɛlɛmá, tombolá mwana mpe simbá ye na lobɔkɔ na yo, mpamba te nakokómisa ye ekólo moko monene.”+ 19 Bongo Nzambe afungolaki ye miso mpe amonaki libulu moko ya mai;+ mpe akendaki kotondisa mai na molangi ya mposo ya nyama mpe amɛlisaki mwana mai. 20 Mpe Nzambe akobaki kozala elongo na mwana yango,+ mpe ye azalaki kokola mpe afandaki na esobe; mpe akómaki moto ya litimbo.+ 21 Mpe abandaki kofanda na esobe ya Parane,+ mpe mama na ye azwelaki ye mwasi na mokili ya Ezipito.

22 Bongo esalemaki boye na ntango yango: Abimeleke, elongo na Pikole mokonzi ya basoda na ye, alobaki na Abrahama ete: “Nzambe azali elongo na yo na likambo nyonso ozali kosala.+ 23 Sikoyo, lapelá ngai ndai na nkombo ya Nzambe+ ete okokosa ngai te, ezala bana na ngai to libota na ngai;+ ete, kaka ndenge namoniselaki yo bolingo ya sembo,+ yo mpe okomonisela ngai ná mokili oyo ofandi mopaya.”+ 24 Bongo Abrahama alobaki ete: “Nakolapa ndai.”+

25 Ntango Abrahama apamelaki Abimeleke makasi mpo na libulu ya mai oyo basaleli ya Abimeleke babɔtɔlaki na nko,+ 26 bongo Abimeleke alobaki ete: “Nayebi te nani asalaki likambo yango, mpe yo oyebisaki ngai yango te, mpe lisusu ngai nayoki yango kaka lelo.”+ 27 Na yango, Abrahama akamataki bampate ná bangɔmbɛ mpe apesaki yango Abimeleke,+ mpe bango mibale basalaki kondimana.+ 28 Ntango Abrahama atyaki pembeni bana-mpate nsambo ya basi ya etonga, 29 Abimeleke alobaki lisusu na Abrahama ete: “Bana-mpate nsambo ya basi oyo otye pembeni elimboli nini?” 30 Bongo alobaki ete: “Okondima kozwa na lobɔkɔ na ngai bana-mpate nsambo oyo ya basi, mpo yango ezala litatoli+ mpo na ngai ete natimolaki libulu oyo.” 31 Yango wana abengaki esika yango Beere-sheba,+ mpamba te kuna bango mibale balapaki ndai. 32 Na yango, basalaki kondimana+ na Beere-sheba, bongo na nsima, Abimeleke atɛlɛmaki elongo na Pikole mokonzi ya basoda na ye mpe bazongaki na mokili ya Bafilistia.+ 33 Nsima na yango, alonaki nzete ya tamarisi na Beere-sheba mpe kuna azalaki kobelela nkombo ya Yehova,+ Nzambe oyo azali koumela seko.+ 34 Mpe Abrahama afandaki mopaya mikolo mingi lisusu na mokili ya Bafilistia.+