Kobima

24 Mpe alobaki na Moize ete: “Matá epai ya Yehova, yo ná Arona, Nadabe ná Abihu+ ná mibali ntuku nsambo (70)+ kati na mikóló ya Yisraele, mpe bosengeli kogumbama mwa mosika. 2 Mpe Moize ye moko asengeli kobɛlɛma na Yehova; kasi bango basengeli kobɛlɛma te, mpe bato basengeli komata elongo na ye te.”+

3 Bongo Moize ayaki mpe ayebisaki bato maloba nyonso ya Yehova mpe bikateli nyonso ya lisambisi,+ mpe bato nyonso bazongisaki maloba na mongongo moko mpe balobaki ete: “Maloba nyonso oyo Yehova alobi, tokosalela yango.”+ 4 Na yango Moize akomaki maloba nyonso ya Yehova.+ Bongo alamukaki ntɔngɔntɔngɔ mpe atongaki na nse ya ngomba etumbelo ná makonzí zomi na mibale oyo ekokani na mabota zomi na mibale ya Yisraele.+ 5 Nsima na yango atindaki bilenge mibali ya bana ya Yisraele mpe bapesaki mbeka ya makabo ya kotumba mpe bapesaki Yehova mbeka ya bangɔmbɛ-mibali, mpo ezala bambeka ya boyokani.+ 6 Bongo Moize akamataki ndambo ya makila mpe atyaki yango na mabakuli,+ mpe ndambo mosusu ya makila amwangisaki yango likoló ya etumbelo.+ 7 Nsukansuka akamataki buku ya kondimana+ mpe atángaki yango na matoi ya bato.+ Bongo balobaki ete: “Nyonso oyo Yehova alobi tondimi kosala mpe kotosa yango.”+ 8 Bongo Moize akamataki makila mpe amwangiselaki yango bato+ mpe alobaki ete: “Oyo ezali makila ya kondimana+ oyo Yehova asali ná bino mpo na maloba oyo nyonso.”

9 Mpe Moize ná Arona, Nadabe ná Abihu mpe mibali ntuku nsambo (70) kati na mikóló ya Yisraele bamataki, 10 mpe bamonaki Nzambe ya Yisraele.+ Mpe na nse ya makolo na ye eloko moko emonanaki lokola pavema ya karokaro ya libanga ya safire mpe ezalaki pɛto lokola likoló mpenza.+ 11 Mpe asembolelaki bato minene ya bana ya Yisraele lobɔkɔ na ye te,+ kasi bamonaki emonaneli ya Nzambe+ ya solo mpe balyaki mpe bamɛlaki.+

12 Sikoyo Yehova alobaki na Moize ete: “Matá epai na ngai na ngomba mpe fandá kuna, mpo nalingi kopesa yo bitanda ya mabanga ná mobeko mpe mitindo oyo nasengeli kokoma mpo na koteya bango.”+ 13 Bongo Moize ná Yosua mosaleli* na ye batɛlɛmaki mpe Moize amataki na ngomba ya Nzambe ya solo.+ 14 Kasi alobaki na mikóló ete: “Bózela biso na esika oyo kino tokozongela bino.+ Mpe, talá! Arona ná Hure+ bazali elongo na bino. Moto nyonso oyo azali na likambo ya kosamba, akende epai na bango.”+ 15 Na yango Moize amataki na ngomba, wana lipata ezalaki kozipa ngomba yango.+

16 Mpe nkembo ya Yehova+ ezalaki kaka kofanda likoló ya Ngomba Sinai,+ mpe lipata ezipaki yango na boumeli ya mikolo motoba. Nsukansuka, na mokolo ya nsambo abengaki Moize longwa na kati ya lipata.+ 17 Mpe na miso ya bana ya Yisraele, nkembo ya Yehova ezalaki komonana na nsɔngɛ ya ngomba lokola mɔtɔ+ oyo ezali kozikisa. 18 Bongo Moize akɔtaki na kati ya lipata mpe amataki na ngomba.+ Mpe Moize afandaki na ngomba mikolo ntuku minei (40) butu moi.+