Kobima

31 Mpe Yehova akobaki koloba na Moize ete: 2 “Talá, nabengi Bezalele+ mwana ya Uri mwana ya Hure na libota ya Yuda, na nkombo na ye.+ 3 Mpe nakotondisa ye na elimo ya Nzambe mpo azala na bwanya, na mayele, na boyebi mpe ayeba lolenge nyonso ya misala ya mabɔkɔ,+ 4 mpo na kokanisa ndenge ya kosala misala, mpo na kosala misala na wolo mpe na palata mpe na motako,+ 5 mpe kosala misala na mabanga mpo na kokangisa yango+ mpe kosala misala na mabaya mpo na kosala biloko ya lolenge nyonso.+ 6 Kasi ngai, talá! natye elongo na ye Oholiabe mwana ya Ahisamake na libota ya Dani,+ mpe natye bwanya na motema ya moto nyonso oyo azali na motema ya bwanya, mpo básala mpenza eloko nyonso napesi yo mitindo:+ 7 hema ya kokutana,+ Sanduku+ mpo na litatoli, ezipeli oyo ezali likoló+ na yango, ná bisaleli nyonso ya hema, 8 mesa ná bisaleli na yango,+ etɛlɛmiselo ya miinda ya wolo ya pɛto ná bisaleli na yango nyonso,+ etumbelo ya mpaka ya malasi,+ 9 etumbelo ya likabo ya kotumba ná bisaleli na yango nyonso,+ saani monene ná etɛlɛmiselo na yango,+ 10 bilamba oyo etongami na mitonga ná bilamba mosantu mpo na Arona nganga-nzambe ná bilamba ya bana na ye ya mibali mpo básala mosala ya banganga-nzambe;+ 11 mpe mafuta mosantu mpe mpaka ya malasi ya nsolo kitoko mpo na esika mosantu.+ Bakosala yango na kolandáká nyonso oyo napesi yo mitindo.”

12 Mpe Yehova alobaki lisusu na Moize ete: 13 “Kasi yo, lobá na bana ya Yisraele ete: ‘Mingimingi, bokobatela basabata na ngai,+ mpo ezali elembo kati na ngai ná bino na boumeli ya mabota na bino mpo bóyeba ete ngai Yehova nazali kosantisa bino.+ 14 Mpe bosengeli kobatela sabata, mpo ezali eloko moko mosantu mpo na bino.+ Moto oyo akotuka yango akobomama mpenza.+ Soki moto azali kosala mosala na mokolo yango, molimo yango esengeli kolongolama na kati ya bato na ye.+ 15 Mikolo motoba mosala ekoki kosalema, kasi mokolo ya nsambo ezali sabata ya kopema mpenza.+ Ezali eloko moko mosantu mpo na Yehova. Moto nyonso oyo akosala mosala na mokolo ya sabata akobomama mpenza. 16 Mpe bana ya Yisraele basengeli kobatela sabata, mpo na kotosa sabata na boumeli ya mabota na bango. Ezali kondimana ya ntango oyo etyami ndelo te.+ 17 Kati na ngai ná bana ya Yisraele, yango ezali elembo ya ntango oyo etyami ndelo te,+ mpamba te na mikolo motoba Yehova asalaki likoló ná mabele mpe na mokolo ya nsambo atikaki kosala mpe abandaki kopema.’”+

18 Bongo ntango kaka asilisaki koloba na ye na Ngomba Sinai, apesaki Moize bitanda mibale ya Litatoli,+ bitanda ya mabanga oyo ekomami na mosapi ya Nzambe.+