Yirimia

29 Mpe talá maloba ya mokanda oyo mosakoli Yirimia atindaki uta na Yerusaleme epai ya mikóló ya bato oyo bamemamaki na mboka mopaya, banganga-nzambe, basakoli mpe bato nyonso oyo Nebukadenezare amemaki na mboka mopaya longwa na Yerusaleme tii na Babilone,+ 2 nsima wana mokonzi Yekonia+ ná mwasi ya lokumu+ mpe bakapita ya ndako ya mokonzi, bankumu ya Yuda mpe Yerusaleme,+ mpe bato oyo bayebi malamu misala ya mabɔkɔ mpe batongi ya bifelo makasi ya libateli+ babimaki na Yerusaleme. 3 Ekendeki na lobɔkɔ ya Elasa mwana ya Shafane+ mpe Gemaria mwana ya Hilikiya, oyo Zidikiya+ mokonzi ya Yuda atindaki na Babilone epai ya Nebukadenezare mokonzi ya Babilone, mpe elobaki ete:

4 “Talá oyo Yehova ya mampinga, Nzambe ya Yisraele, alobi na bato nyonso oyo bamemamaki na mboka mopaya, baoyo namemi na mboka mopaya+ longwa na Yerusaleme tii na Babilone ete: 5 ‘Bótonga bandako mpe bófanda na yango, bólona bilanga mpe bólya mbuma na yango.+ 6 Bókamata basi mpe bóbota bana mibali mpe bana basi;+ mpe bózwela bana na bino ya mibali basi mpe bópesa bana na bino ya basi na mibali, mpo bábota bana mibali mpe bana basi; mpe bókóma mingi kuna, motángo na bino ekita te. 7 Lisusu, bóluka kimya ya engumba epai namemi bino na mboka mopaya, mpe bóbondela Yehova mpo na yango, mpo na kimya na yango, bokozala na kimya.+ 8 Mpo talá oyo Yehova ya mampinga, Nzambe ya Yisraele, alobi: “Basakoli na bino oyo bazali kati na bino mpe basakoli na bino ya makambo oyo ebombaná bákosa bino te,+ mpe bóyoka te bandɔtɔ na bango oyo bazali kolɔta.+ 9 Mpo ‘bazali kosakwela bino lokuta na nkombo na ngai. Natindi bango te,’+ yango nde liloba ya Yehova.”’”

10 “Mpo talá oyo Yehova alobi: ‘Ntango mbula ntuku nsambo (70) ekokoka na Babilone nakotyela bino likebi,+ mpe nakokokisela bino liloba na ngai ya malamu na ndenge nakozongisa bino na esika oyo.’+

11 “‘Mpo ngai nayebi malamu makanisi oyo nazali kokanisa mpo na bino,’+ yango nde liloba ya Yehova, ‘makanisi ya kimya, kasi ya mpasi te,+ mpo na kopesa bino bomoi malamu na mikolo ezali koya mpe elikya.+ 12 Mpe bokobenga ngai mpenza, bokoya, bokobondela ngai, mpe ngai nakoyokela bino.’+

13 “‘Mpe bokoluka ngai mpe bokozwa ngai,+ mpo bokoluka ngai na motema na bino mobimba.+ 14 Mpe nakomitika ete bózwa ngai,’+ yango nde liloba ya Yehova. ‘Mpe nakoyanganisa etuluku ya bakangami na bino mpe nakosangisa bino uta na bikólo nyonso mpe uta na bisika nyonso epai napalanganisá bino,’+ yango nde liloba ya Yehova. ‘Mpe nakozongisa bino lisusu na esika oyo nalongolaki bino mpo na kotinda bino na mboka mopaya.’+

15 “Kasi bino bolobi: ‘Yehova atɛlɛmiseli biso basakoli na Babilone.’

16 “Mpo talá oyo Yehova alobi na mokonzi oyo afandi na kiti ya bokonzi ya Davidi+ mpe na bato nyonso oyo bafandi na engumba oyo, bandeko na bino oyo bamemami te na mboka mopaya elongo na bino,+ 17 ‘Talá oyo Yehova ya mampinga alobi: “Talá nazali kotindela bango mopanga,+ nzala+ mpe maladi mabe,+ mpe nakokómisa bango lokola bambuma ya figi oyo epasuká, oyo ekoki kolyama te mpo ezali mabe.”’+

18 “‘Mpe nakolanda bango na mopanga, na nzala mpe na maladi mabe, mpe epai ya makonzi nyonso ya mabele,+ nakokómisa bango eloko ya kolɛngisa, elakeli mabe, eloko ya kokamwa, eloko ya kobɛtɛla piololo, ya nsɔni kati na bikólo nyonso epai nakopalanganisa bango,+ 19 mpo bayoki maloba na ngai te,’ yango nde liloba ya Yehova, ‘oyo natindeli bango na basaleli na ngai basakoli, nazali kolamuka ntɔngɔntɔngɔ mpe nazali kotinda bango.’+

“‘Kasi boyoki te,’+ yango nde liloba ya Yehova.

20 “Bongo bino, bóyoka liloba ya Yehova, bino nyonso baoyo bomemamaki na mboka mopaya,+ baoyo natindi longwa na Yerusaleme tii na Babilone.+ 21 Talá oyo Yehova ya mampinga, Nzambe ya Yisraele, alobi mpo na Ahaba mwana ya Kolaya mpe Zidikiya mwana ya Maaseya, oyo bazali kosakwela bino lokuta na nkombo na ngai:+ ‘Talá nazali kopesa bango na lobɔkɔ ya Nebukadrezare mokonzi ya Babilone, mpe akoboma mpenza bango na miso na bino.+ 22 Mpo na bango, elakeli mabe ekotángama mpo na etuluku mobimba ya bato ya Yuda oyo bamemamaki na mboka mopaya ete: “Yehova asala yo lokola Zidikiya mpe lokola Ahaba,+ baoyo mokonzi ya Babilone atumbaki na mɔtɔ!”+ 23 mpo bamipesi na bozoba na Yisraele,+ mpe bazali kokoba kosala ekobo na basi ya baninga na bango+ mpe bazali kaka koloba lokuta na nkombo na ngai, liloba oyo napesaki bango mitindo te.+

“‘“Mpe ngai nde Moto nayebi mpe nazali motatoli,”+ yango nde liloba ya Yehova.’”

24 “Mpe okoloba na Shemaya+ moto ya Nehelame ete: 25 ‘Talá oyo Yehova ya mampinga, Nzambe ya Yisraele, alobi: “Lokola yo moko otindi mikanda+ na nkombo na yo epai ya bato nyonso oyo bazali na Yerusaleme, mpe epai ya Sefania+ mwana ya Maaseya, nganga-nzambe, mpe epai ya banganga-nzambe nyonso, ete: 26 ‘Yehova akómisi yo nganga-nzambe na esika ya nganga-nzambe Yehoyada, mpo okóma mokɛngɛli monene ya ndako ya Yehova+ mpo na kokanga moto nyonso oyo azali na ligboma+ mpe azali kosala lokola mosakoli, mpe osengeli kotya ye na bikanga-makolo mpe na ekanga-nkingo ná mabɔkɔ;+ 27 bongo sikoyo, mpo na nini opameli te Yirimia moto ya Anatote,+ oyo azali kosala lokola mosakoli epai na bino?+ 28 Mpo, yango wana nde atindeli biso nsango na Babilone ete: “Ezali koumela! Bótonga bandako mpe bófanda na kati, mpe bólona bilanga mpe bólya mbuma na yango,+—”’”’”

29 Mpe Sefania+ nganga-nzambe atángaki mokanda yango na matoi ya mosakoli Yirimia.

30 Bongo liloba ya Yehova eyelaki Yirimia ete: 31 “Tindelá bato nyonso oyo bamemamaki na mboka mopaya+ nsango ete: ‘Talá oyo Yehova alobi mpo na Shemaya moto ya Nehelame: “Lokola Shemaya asakweli bino, nzokande natindaki ye te, mpe ameki kotinda bino bótyela lokuta motema,+ 32 na yango talá oyo Yehova alobi: ‘Talá nazali kotyela Shemaya+ moto ya Nehelame mpe libota na ye likebi.’+

“‘“‘Akozala na moto te oyo akofanda katikati ya bato oyo;+ mpe akomona te bolamu oyo nazali kosalela bato na ngai,’+ yango nde liloba ya Yehova, ‘mpo alobi maloba ya kotombokela mpenza Yehova.’”’”+