Yirimia

34 Liloba oyo eyelaki Yirimia uta na Yehova, ntango Nebukadrezare mokonzi ya Babilone+ mpe mampinga ya basoda na ye nyonso+ mpe makonzi nyonso ya mabele, boyangeli na nse na lobɔkɔ na ye,+ mpe bato ya bikólo nyonso bazalaki kobundisa Yerusaleme mpe bingumba na yango nyonso,+ ete:

2 “Talá oyo Yehova Nzambe ya Yisraele alobi: ‘Kende, mpe osengeli koloba na Zidikiya mokonzi ya Yuda,+ ɛɛ, osengeli koloba na ye ete: “Talá oyo Yehova alobi: ‘Talá nazali kopesa engumba oyo na lobɔkɔ ya mokonzi ya Babilone,+ mpe akotumba yango mpenza na mɔtɔ.+ 3 Mpe yo okokima lobɔkɔ na ye te, mpo okokangama mpenza mpe okopesama na lobɔkɔ na ye.+ Mpe miso na yo ekomona miso ya mokonzi ya Babilone,+ mpe monɔkɔ na ye ekosolola na monɔkɔ na yo, mpe okokóma tii na Babilone.’ 4 Nzokande, yoká liloba ya Yehova, Ee Zidikiya mokonzi ya Yuda:+ ‘Talá oyo Yehova alobi mpo na yo: “Okokufa na mopanga te. 5 Okokufa na kimya;+ mpe bakotumbela yo mpaka ya malasi+ lokola oyo batumbelaki batata na yo, bakonzi ya kala oyo bazalaki liboso na yo,+ mpe bakolela+ yo na maloba oyo: ‘Aa mawa! Ee nkolo!’+ mpo ‘ngai nalobi liloba yango,’ yango nde liloba ya Yehova.”’”’”

6 Bongo mosakoli Yirimia alobaki na Zidikiya mokonzi ya Yuda maloba yango nyonso,+ na Yerusaleme, 7 wana mampinga ya basoda ya mokonzi ya Babilone bazalaki kobundisa Yerusaleme mpe bingumba nyonso ya Yuda oyo etikalaki,+ Lakishi+ mpe Azeka;+ mpo yango nde bingumba oyo ebatelamaki makasi,+ oyo etikalaki na kati ya bingumba ya Yuda.+

8 Liloba oyo eyelaki Yirimia uta na Yehova nsima wana Mokonzi Zidikiya asalaki kondimana ná bato nyonso oyo bazalaki na Yerusaleme mpo na kosakwela bango bonsomi,+ 9 mpo moto na moto atika mosaleli na ye ya mobali mpe mosaleli na ye ya mwasi, Moebre+ ya mobali mpe Moebre ya mwasi, akende nsomi, ete bázwa bango lokola basaleli te, ɛɛ Moyuda, oyo azali ndeko na ye.+ 10 Bongo bankumu+ nyonso batosaki, ná bato nyonso oyo basalaki kondimana mpo na kotika moto na moto mosaleli na ye ya mobali mpe mosaleli na ye ya mwasi akende nsomi, mpo na kozwa bango lokola basaleli lisusu te, mpe batosaki mpe batikaki bango bákende.+ 11 Kasi nsima na yango, babongolaki makanisi na bango+ mpe babandaki kozongisa basaleli ya mibali mpe basaleli ya basi oyo batikaki bákende nsomi, mpe bakómaki konyata bango lokola basaleli ya mibali mpe basaleli ya basi.+ 12 Bongo liloba ya Yehova eyelaki Yirimia longwa na Yehova ete:

13 “Talá oyo Yehova Nzambe ya Yisraele alobi: ‘Ngai moko nasalaki kondimana ná bankɔkɔ na bino+ na mokolo oyo nabimisaki bango na mokili ya Ezipito,+ na ndako ya baombo,+ na maloba oyo: 14 “Na nsuka ya mbula nsambo mokomoko na bino asengeli kotika ndeko na ye akende,+ Moebre ya mobali,+ oyo atɛkamaki epai na yo+ mpe oyo asaleli yo mbula motoba; mpe osengeli kotika ye akende nsomi, alongwa epai na yo.” Kasi bankɔkɔ na bino bayokelaki ngai te mpe basembolaki litoi na bango te.+ 15 Mpe bino bobongwani lelo mpe bozali kosala oyo ezali sembo na miso na ngai ndenge bozali kosakola bonsomi moto na moto epai ya moninga na ye, mpe bozali kosala kondimana liboso na ngai+ na ndako oyo ebengami na nkombo na ngai.+ 16 Bongo bozongi nsima+ mpe botuki nkombo na ngai+ mpe bozongisi moto na moto mosaleli na ye ya mobali mpe mosaleli na ye ya mwasi, oyo botikaki bákende nsomi ndenge molimo na bango elingaki, mpe bonyati bango, bokómisi bango basaleli na bino ya mibali mpe basaleli na bino ya basi.’+

17 “Bongo, talá oyo Yehova alobi: ‘Bino botosi ngai te na ndenge bokobi te kosakola moto na moto bonsomi+ epai ya ndeko na ye mpe moto na moto epai ya moninga na ye. Talá nazali kosakwela bino bonsomi,’+ yango nde liloba ya Yehova, ‘nakopesa bino na mopanga,+ na maladi mabe+ mpe na nzala,+ mpe nakokómisa bino eloko ya kolɛngisa epai ya makonzi nyonso ya mabele.+ 18 Mpe nakokaba bato oyo bazali kobuka kondimana na ngai,+ mpo bakokisaki te maloba ya kondimana oyo basalaki liboso na ngai na nzela ya mwana-ngɔmbɛ oyo bakataki na biteni mibale+ mpo báleka katikati ya biteni yango;+ 19 elingi koloba, bankumu ya Yuda mpe bankumu ya Yerusaleme,+ bakapita ya ndako ya mokonzi mpe banganga-nzambe mpe bato nyonso ya mokili oyo balekaki katikati ya biteni ya mwana-ngɔmbɛ yango— 20 ɛɛ, nakopesa bango na lobɔkɔ ya banguna na bango mpe na lobɔkɔ ya baoyo bazali koluka molimo na bango;+ mpe bibembe na bango ekokóma mpenza bilei mpo na bikelamu oyo epumbwaka na likoló mpe mpo na banyama ya mabele.+ 21 Mpe nakopesa Zidikiya mokonzi ya Yuda+ ná bankumu na ye na lobɔkɔ ya banguna na bango mpe na lobɔkɔ ya baoyo bazali koluka molimo na bango mpe na lobɔkɔ ya mampinga ya basoda ya mokonzi ya Babilone+ oyo bazali kolongwa epai na bino.’+

22 “‘Talá nazali kopesa mitindo,’ yango nde liloba ya Yehova, ‘mpe nakozongisa bango mpenza na engumba oyo,+ mpe bakobundisa yango mpenza mpe bakozwa yango mpe bakotumba yango na mɔtɔ;+ mpe nakokómisa bingumba ya Yuda esika oyo etikali mpamba, epai moto afandi te.’”+