Balevi
21 Mpe Yehova alobaki lisusu na Moize ete: “Lobá na banganga-nzambe, bana mibali ya Arona, mpe osengeli koyebisa bango ete: ‘Moko te akomikómisa mbindo mpo na molimo oyo akufi na kati ya bato na ye.+ 2 Kasi mpo na ndeko na ye ya makila oyo azali ndeko na ye mpenza, mpo na mama na ye mpe mpo na tata na ye mpe mpo na mwana na ye ya mobali mpe mpo na mwana na ye ya mwasi mpe mpo na ndeko na ye ya mobali 3 mpe mpo na ndeko na ye ya mwasi, ngɔndɔ oyo azali ndeko na ye mpenza, oyo akómi te mwasi ya mobali moko boye, mpo na ye, akomikómisa mbindo. 4 Akomikómisa mbindo te mpo na mwasi oyo azali na nkolo na ye mpenza kati na bato na ye noki amikómisa eloko mpamba. 5 Bakosala libandi na mitó na bango te,+ mpe bakokokola ndelo ya mandefu na bango te,+ mpe bakomikatakata te na nzoto na bango.+ 6 Bakozala basantu mpo na Nzambe na bango,+ mpe bakotuka nkombo ya Nzambe na bango te,+ mpo bango nde bapesaka makabo ya Yehova oyo etumbami na mɔtɔ, limpa ya Nzambe na bango;+ mpe basengeli kozala basantu.+ 7 Bakozwa te mwasi ya ndumba+ to mwasi oyo abebisamá; mpe bakozwa te+ mwasi oyo na mobali na ye libala ekufá,+ mpamba te nganga-nzambe azali mosantu mpo na Nzambe na ye. 8 Boye osengeli kosantisa ye,+ mpo ye nde apesaka limpa ya Nzambe na yo. Asengeli kozala mosantu mpo na yo,+ mpamba te ngai Yehova, moto nazali kosantisa bino, nazali mosantu.+
9 “‘Sikoyo soki mwana mwasi ya nganga-nzambe moko amikómisi eloko mpamba na kosaláká bondumba, azali kokómisa nde tata na ye eloko mpamba. Akozikisama na mɔtɔ.+
10 “‘Mpe nganga-nzambe monene kati na bandeko na ye, oyo mafuta mosantu* esopamaki+ na motó na ye mpe oyo lobɔkɔ na ye etondisamaki na nguya* mpo na kolata bilamba,+ akomeka te kobebisa nsuki ya motó na ye,+ mpe akopasola bilamba na ye te.+ 11 Mpe akoya te epai na molimo oyo akufi.+ Akomikómisa mbindo te mpo na tata na ye mpe mpo na mama na ye. 12 Akobima mpe te na esika mosantu mpe akokómisa te esika mosantu ya Nzambe+ na ye eloko mpamba, mpo elembo ya komipesa na Nzambe, mafuta mosantu ya Nzambe na ye,+ ezali likoló na ye. Ngai nazali Yehova.
13 “‘Mpe ye, akozwa mwasi oyo azali naino na bongɔndɔ na ye.+ 14 Mwasi oyo mobali akufá to mwasi oyo libala ekufá mpe mwasi oyo abebisamá, mwasi ya ndumba, akozwa ata moko te kati na bango, kasi akozwa ngɔndɔ kati na bato na ye mpo azala mwasi na ye. 15 Mpe akokómisa momboto na ye eloko mpamba te kati na bato na ye,+ mpo ngai Yehova moto nazali kosantisa ye.’”+
16 Mpe Yehova akobaki koloba na Moize: 17 “Lobá na Arona ete: ‘Moto moko te kati na momboto na yo na boumeli ya mabota na bango, oyo azali na mbeba,+ akoki kobɛlɛma mpo na kopesa limpa ya Nzambe na ye.+ 18 Soki moto moko azali na mbeba, akoki te kobɛlɛma: moto oyo akufá miso to motɛngumi to oyo zolo epasuká to oyo enama moko eleki molai,+ 19 to moto oyo abukaná lokolo to abukaná lobɔkɔ, 20 to na etútú ya mokɔngɔ to akɔndakɔndá to azali na maladi na miso na ye to azali na makwanza to azali na mapaka to oyo mabinzi na ye epanzaná.+ 21 Moto nyonso, kati na momboto ya nganga-nzambe Arona, oyo azali na mbeba, akoki te kobɛlɛma mpo na kopesa makabo ya Yehova oyo etumbami na mɔtɔ.+ Azali na mbeba. Akoki te kobɛlɛma mpo na kopesa limpa ya Nzambe na ye.+ 22 Akoki kolya limpa ya Nzambe na ye oyo euti na biloko oyo eleki bosantu+ mpe oyo euti na biloko mosantu.+ 23 Nzokande akoki te kokɔta pene na rido,+ mpe akoki te kobɛlɛma na etumbelo,+ mpamba te azali na mbeba;+ mpe akokómisa te esika mosantu na ngai eloko mpamba,+ mpo ngai Yehova moto nazali kosantisa bango.’”+
24 Ndenge wana nde Moize alobaki na Arona ná bana na ye ya mibali mpe na bana nyonso ya Yisraele.