Basambisi

17 Nzokande, ezalaki na mobali moko ya etúká ya ngombangomba ya Efraime,+ nkombo na ye Mika. 2 Mokolo moko alobaki na mama na ye ete: “Shekele ya palata nkóto moko na nkama moko (1 100) oyo bazwaki epai na yo mpe oyo olakelaki mabe+ mpe olobaki yango na matoi na ngai, talá! palata yango ezali epai na ngai. Ngai nde nazwaki yango.”+ Bongo mama na ye alobaki boye: “Yehova apambola mwana na ngai ya mobali.”+ 3 Na yango, azongiselaki mama na ye shekele yango ya palata nkóto moko na nkama moko (1 100);+ mpe mama na ye alobaki lisusu ete: “Nasengeli mpenza kosantisela Yehova palata oyo euti na lobɔkɔ na ngai, nakosala yango mpo na mwana na ngai ya mobali, mpo na kosala ekeko oyo eyemami+ mpe ekeko ya ebende oyo enyangwisami;+ mpe nakozongisela yo yango.”

4 Bongo azongiselaki mama na ye palata yango, mpe mama na ye azwaki shekele ya palata nkama mibale (200) mpe apesaki yango mosali biloko ya palata.+ Mpe asalaki ekeko oyo eyemami+ mpe ekeko ya ebende oyo enyangwisami;+ mpe yango ezalaki na ndako ya Mika. 5 Nzokande, mobali yango Mika azalaki na ndako moko ya banzambe,+ mpe asalaki efode+ mpe baterafime+ mpe atondisaki lobɔkɔ ya mwana na ye moko ya mobali na nguya,*+ mpo asalela ye mosala ya nganga-nzambe.+ 6 Na mikolo wana, mokonzi azalaki te na Yisraele.+ Mpe moto na moto azalaki kosala oyo ezali sembo na miso na ye moko.+

7 Mpe ezalaki na elenge mobali moko ya Beteleme,+ na Yuda, azalaki na libota ya Yuda, mpe azalaki Molevi.+ Mpe azalaki kofanda kuna, esili koleka mwa ntango. 8 Mpe mobali yango, alongwaki na engumba ya Beteleme, na Yuda, mpo na kokende kofanda mwa moke epai nyonso oyo akozwa esika. Na nsima, ntango azalaki kokende, akómaki na etúká ya ngombangomba ya Efraime, tii na ndako ya Mika.+ 9 Bongo Mika alobaki na ye ete: “Outi wapi?” Ye alobaki na Mika boye: “Nazali Molevi, nauti na Beteleme, na Yuda, mpe nazali kokende kofanda mwa moke epai nyonso nakozwa esika.” 10 Na yango, Mika alobaki na ye boye: “Fandá na ngai mpe zalá tata+ mpe nganga-nzambe+ na ngai, mpe ngai, nakopesa yo na mbula moko shekele ya palata zomi mpe bilamba ya mosala na yo mpe bilei na yo.” Boye Molevi yango akɔtaki. 11 Bongo Molevi wana andimaki kofanda na mobali yango, mpe elenge mobali yango akómaki epai na ye lokola moko ya bana na ye ya mibali. 12 Lisusu, Mika atondisaki lobɔkɔ ya Molevi yango na nguya,+ mpo elenge mobali yango asalela ye mosala ya nganga-nzambe+ mpe akoba kofanda na ndako ya Mika. 13 Na yango Mika alobaki ete: “Sikoyo nayebi mpenza ete Yehova akosalela ngai bolamu, mpamba te Molevi oyo akómi nganga-nzambe epai na ngai.”+