1 Samwele

16 Nsukansuka, Yehova alobaki na Samwele boye: “Okolela Saulo kino ntango nini,+ awa ngai naboyi ye azala mokonzi ya Yisraele?+ Tondisá liseke na yo na mafuta+ mpe kende. Nakotinda yo epai ya Yese,+ moto ya Beteleme, mpamba te namizweli mokonzi kati na bana na ye ya mibali.”+ 2 Kasi Samwele alobaki ete: “Nakokende ndenge nini? Soki kaka Saulo ayoki yango, akoboma ngai mpenza.”+ Bongo Yehova alobaki lisusu boye: “Okomema mwana-ngɔmbɛ moko ya mwasi elongo na yo, mpe okoloba boye: ‘Nayei kopesa Yehova mbeka.’+ 3 Mpe okobenga Yese na mbeka yango; bongo ngai, nakoyebisa yo oyo osengeli kosala,+ mpe otyela ngai moto oyo nakolakisa yo mafuta.”+

4 Mpe Samwele asalaki oyo Yehova alobaki. Ntango akómaki na Beteleme,+ mikóló ya engumba yango babandaki kolɛnga+ ntango bakutanaki na ye, bongo balobaki ete: “Koya na yo elimboli kimya?”+ 5 Na yango ye alobaki ete: “Elimboli kimya. Nayei kopesa Yehova mbeka. Bómisantisa,+ mpe bóya elongo na ngai na mbeka yango.” Bongo asantisaki Yese ná bana na ye ya mibali mpe nsima na yango, abengaki bango na mbeka. 6 Mpe esalemaki boye: ntango bakɔtaki mpe amonaki Eliabe,+ na mbala moko alobaki boye: “Ya solo, moto ya Yehova oyo atyami mafuta ye oyo liboso na ye.” 7 Kasi Yehova alobaki na Samwele ete: “Kotala elongi na ye te mpe bolai na ye te,+ mpo ngai naboyi ye. Mpo Nzambe amonaka ndenge moto amonaka te,+ mpamba te moto amonaka oyo emonanaka na miso;+ kasi Yehova, amonaka ndenge motema+ ezali.” 8 Bongo Yese abengaki Abinadabe+ mpe alekisaki ye liboso ya Samwele, kasi ye alobaki ete: “Ata oyo, Yehova aponi ye te.” 9 Na nsima, Yese alekisaki Shama,+ kasi Samwele alobaki: “Oyo mpe, Yehova aponi ye te.” 10 Na yango, Yese alekisaki bana na ye nsambo ya mibali liboso ya Samwele; kasi Samwele alobaki na Yese boye: “Yehova aponi baoyo te.”

11 Nsukansuka, Samwele alobaki na Yese boye: “Bana nyonso ya mibali bango oyo?” Bongo ye alobaki ete: “Etikali leki na bango,+ mpe talá! azali koleisa bampate.”+ Na yango, Samwele alobaki na Yese boye: “Tindá bato bákende kozwa ye, mpo tokofanda te mpo na kolya tii ntango akoya awa.” 12 Bongo atindaki bato mpe bayaki na ye. Nzokande, azalaki nzoto motane,+ elenge mobali na miso kitoko mpe na bonzenga. Bongo Yehova alobaki ete: “Tɛlɛmá, tyá ye mafuta, mpo ye oyo!”+ 13 Na yango, Samwele azwaki liseke ya mafuta+ mpe atyaki ye mafuta na katikati ya bandeko na ye. Mpe elimo ya Yehova ebandaki kosala kati na Davidi banda mokolo wana.+ Na nsima, Samwele atɛlɛmaki mpe asimbaki nzela, akei na Rama.+

14 Mpe elimo ya Yehova elongwaki+ epai ya Saulo, bongo elimo moko ya mabe*+ oyo euti na Yehova ezalaki kopesa ye nsɔmɔ. 15 Mpe basaleli ya Saulo balobaki na ye boye: “Talá sikoyo, elimo mabe ya Nzambe ezali kopesa yo nsɔmɔ. 16 Tobondeli yo, nkolo na biso apesa basaleli na yo oyo bazali liboso na yo mitindo ete báluka mobali moko oyo ayebi+ kobɛta nzɛnzɛ malamu.+ Mpe ekosalema mpenza boye: ntango elimo mabe ya Nzambe ekoyela yo, akobɛta nzɛnzɛ na lobɔkɔ na ye, mpe okoyoka mpenza malamu.” 17 Na yango, Saulo alobaki na basaleli na ye ete: “Nabondeli bino, bózwela ngai mobali moko oyo abɛtaka nzɛnzɛ malamu, mpe bómemela ngai ye.”+

18 Mpe moko ya basaleli yango ayanolaki mpe alobaki boye: “Talá! Namoni ete mwana mobali moko ya Yese moto ya Beteleme ayebi kobɛta nzɛnzɛ malamu,+ azali elombe, moto ya nguya,+ moto ya etumba,+ ayebi koloba,+ mobali moko kitoko,+ mpe Yehova azali na ye.”+ 19 Bongo Saulo atindaki bamemi-nsango epai ya Yese mpe alobaki ete: “Tindelá ngai naino mwana na yo Davidi, oyo azali elongo na etonga ya bampate.”+ 20 Na yango, Yese azwaki mpunda moko, mampa mpe molangi moko ya mposo ya nyama+ oyo ezali na vinyo mpe mwana moko ya ntaba, mpe atindelaki yango Saulo,+ na lobɔkɔ ya mwana na ye Davidi. 21 Ezali bongo nde Davidi ayaki epai ya Saulo mpe asalelaki ye;+ mpe ye alingaki Davidi mingi mpenza, mpe akómaki momemi-bibundeli na ye.+ 22 Na yango, Saulo atindaki bato epai ya Yese, alobi: “Nabondeli yo, tiká Davidi akoba kosalela ngai, mpo andimami na miso na ngai.” 23 Mpe esalemaki boye: ntango elimo ya Nzambe ezalaki koyela Saulo, Davidi azalaki kozwa nzɛnzɛ mpe kobɛta yango na lobɔkɔ na ye; mpe ezalaki kokitisa Saulo motema mpe azalaki koyoka malamu, mpe elimo mabe ezalaki kotika ye.+