Mokanda ya liboso ya Ntango

21 Mokolo moko Satana* akanaki konyokola Yisraele mpe atindaki Davidi atánga bato ya Yisraele.+ 2 Na yango Davidi alobaki na Yoabe+ mpe bakonzi ya bato boye: “Bókende kotánga bato ya Yisraele banda na Beere-sheba tii na Dani,+ mpe bóya kopesa ngai lapolo mpo nayeba motángo na bango.” 3 Kasi Yoabe alobaki: “Tiká Yehova akómisa bato na ye ebele mbala 100! Nkolo na ngai mokonzi, bango nyonso bazali basaleli na yo nkolo na ngai, boye te? Mpo na nini nkolo na ngai alingi kosala bongo? Mpo na nini oya komemisa Yisraele ngambo?”

4 Kasi liloba ya mokonzi elekaki oyo ya Yoabe. Na yango, Yoabe abimaki mpe atambolaki Yisraele mobimba, mpe na nsima azongaki na Yerusaleme.+ 5 Mpe Yoabe apesaki Davidi motángo ya bato oyo batángamaki: na Yisraele mobimba ezalaki na mibali 1 100 000 oyo bazalaki na mipanga, mpe na Yuda, mibali 470 000 oyo bazalaki na mipanga.+ 6 Kasi na libota ya Levi mpe ya Benyamina, Yoabe atángaki bato te,+ mpo amonaki ete mitindo oyo mokonzi apesaki ezalaki malamu te.+

7 Nzokande likambo yango esepelisaki Nzambe ya solo ata moke te; na yango, azwaki ekateli ya kopesa Yisraele etumbu. 8 Bongo Davidi alobaki na Nzambe ya solo boye: “Nasali lisumu+ monene na likambo oyo nasali. Mpe sikoyo, nabondeli yo, limbisá libunga na ngai mosaleli na yo,+ mpo nasali makambo na bozoba mpenza.”+ 9 Bongo Yehova alobaki boye na Gade,+ momoni-bimonaneli ya Davidi, ete: 10 “Kende koloba na Davidi boye: ‘Talá oyo Yehova alobi: “Nazali na bitumbu misato mpo na yo. Poná moko oyo nasengeli kopesa yo.”’” 11 Na yango Gade akɔtaki epai ya Davidi mpe alobaki na ye: “Talá oyo Yehova alobi: ‘Oponi nini? 12 Mbula misato ya nzala?+ To na boumeli ya sanza misato banguna bálonga yo mpe mopanga ya banguna na yo ekómela yo?+ To mpe na boumeli ya mikolo misato mopanga ya Yehova ebɛta mokili na maladi mabe,+ ete anzelu ya Yehova abebisa+ teritware mobimba ya Yisraele?’ Sikoyo kanisá mpe yebisá ngai nini nasengeli koyebisa Moto oyo atindi ngai.” 13 Bongo Davidi alobaki na Gade boye: “Ezali mpasi mingi mpo na ngai. Nabondeli yo, malamu nakwea na lobɔkɔ ya Yehova, mpo motema mawa na ye ezali monene mpenza;+ kasi nakwea na lobɔkɔ ya moto te.”+

14 Bongo Yehova atindaki maladi mabe+ na Yisraele, mpe bato 70 000 na Yisraele bakufaki.+ 15 Lisusu, Nzambe ya solo atindaki anzelu na Yerusaleme mpo na kobebisa yango; kasi ntango anzelu alingaki kosala yango, Yehova amonaki yango mpe ayokaki mawa mpo na likama yango,+ mpe alobaki na anzelu oyo azalaki komema libebi ete: “Ekoki!+ Sikoyo kitisá lobɔkɔ na yo.” Anzelu ya Yehova atɛlɛmaki pene na esika ya kotutatuta mbuma ya Moyebusi+ moko na nkombo Ornane.+

16 Ntango Davidi atombolaki miso, amonaki anzelu ya Yehova atɛlɛmi katikati ya likoló ná mabele, asimbi mopanga,+ asemboli yango na ngámbo ya Yerusaleme. Davidi ná bankulutu, oyo balataki ngɔtɔ,*+ bakweaki mbala moko bilongi na nse.+ 17 Bongo Davidi alobaki na Nzambe ya solo ete: “Ngai moto nalobaki ete bátánga bato. Ngai moto nasali lisumu mpe ngai moto nasali mabe;+ kasi bampate oyo, esali nini? Ee Yehova Nzambe na ngai, nabondeli yo, tiká lobɔkɔ na yo ekwela ngai mpe ndako ya tata na ngai; kasi komemela bato na yo mpasi boye te.”+

18 Na nsima anzelu ya Yehova alobaki na Gade+ ayebisa Davidi ete amata na esika ya kotutatuta mbuma ya Ornane Moyebusi mpe atongela Yehova etumbelo kuna.+ 19 Na yango Davidi amataki kuna na kolanda liloba ya Gade, oyo alobaki na nkombo ya Yehova. 20 Na ntango yango, Ornane, oyo azalaki kotutatuta mbuma ya blé, abalukaki mpe amonaki anzelu; bana na ye minei oyo bazalaki ná ye bakendaki kobombana. 21 Ntango Davidi ayaki epai ye, Ornane atalaki mpe amonaki Davidi, mpe na mbala moko abimaki na esika ya kotutatuta mbuma mpe agumbamaki elongi na nse liboso ya Davidi. 22 Davidi alobaki na Ornane boye: “Tɛkɛlá* ngai esika oyo ya kotutatuta mbuma, mpo natongela Yehova etumbelo awa. Tɛkɛlá ngai yango na ntalo na yango mpenza, mpo mpasi oyo ekweli bato esila.”+ 23 Kasi Ornane alobaki na Davidi: “Zwá yango ekóma ya yo, mpe nkolo na ngai mokonzi asala oyo emonani malamu na miso na ye. Talá, napesi yo bangɔmbɛ mpo ezala makabo ya kotumba, libaya ya kotutela mbuma+ mpo ezala nkoni mpe blé mpo ezala likabo ya mbuma. Napesi yo yango nyonso mpenza.”

24 Kasi Mokonzi Davidi alobaki na Ornane: “Te, nakosomba yango na ntalo na yango mpenza, mpo nakozwa te biloko oyo ezali ya yo mpo napesa yango Yehova. Mpe nakopesa te bambeka ya kotumba oyo nazwi ofele.”+ 25 Bongo Davidi apesaki Ornane wolo oyo kilo na yango ezalaki shekele* 600 mpo na esika yango. 26 Bongo Davidi atongelaki Yehova etumbelo+ kuna mpe apesaki bambeka ya kotumba ná bambeka ya kimya.* Abelelaki Yehova, mpe ye ayanolaki ye na ndenge atindaki mɔtɔ+ oyo eutaki na likoló mpe ezikisaki makabo oyo ezalaki na etumbelo. 27 Na nsima Yehova apesaki anzelu+ mitindo ete azongisa mopanga na ye na libenga na yango. 28 Na ntango yango, Davidi akobaki kopesa bambeka na esika ya kotutatuta mbuma ya Ornane Moyebusi mpo amonaki ete Yehova ayanolaki ye kuna. 29 Nzokande na ntango wana, tabernakle ya Yehova oyo Moize asalaki na esobe, mpe etumbelo ya makabo ya kotumba ezalaki na esika oyo etombwaná, na Gibeone.+ 30 Kasi Davidi akokaki te kokende kuna mpo na kotuna Nzambe, mpo mopanga ya anzelu ya Yehova epesaki ye nsɔmɔ.