Kobima

18 Sikoyo Yetro nganga-nzambe ya Midiane, bokilo ya Moize,+ ayokaki makambo nyonso oyo Nzambe asalelaki Moize mpe bato na ye Yisraele, ndenge Yehova abimisaki Yisraele na Ezipito.+ 2 Yetro, bokilo ya Moize, azwaki Zipora, mwasi ya Moize, ntango Moize azongisaki ye, 3 elongo na bana na ye mibale ya mibali.+ Moko nkombo na ye Gereshome,*+ mpo Moize alobaki ete: “nakómi moto oyo afandi mopaya na mokili ya bopaya,” 4 mpe mosusu nkombo na ye Eliezere,* mpo alobaki: “Nzambe ya tata na ngai azali mosungi na ngai, oyo abikisaki ngai na mopanga ya Farao.”+

5 Bongo Yetro, bokilo ya Moize, elongo na bana mibali mpe mwasi ya Moize, bayaki epai ya Moize na esobe epai ye atyaki kaa, na ngomba ya Nzambe ya solo.+ 6 Bongo atindelaki Moize maloba ete: “Ngai, bokilo na yo, Yetro,+ nazali koya epai na yo, ná mwasi na yo ná bana na ye mibale ya mibali.” 7 Na mbala moko, Moize akendaki kokutana na bokilo na ye, mpe agumbamaki elongi na nse mpe apwɛpwaki ye. Batunanaki soki bazali malamu, mpe nsima na yango bakɔtaki na hema.

8 Moize ayebisaki bokilo na ye makambo nyonso oyo Yehova asalaki Farao mpe Ezipito mpo na bolamu ya Yisraele,+ bampasi nyonso oyo bakutanaki na yango na nzela,+ mpe ndenge Yehova abikisaki bango. 9 Yetro asepelaki mingi mpo na makambo nyonso ya malamu oyo Yehova asalelaki Yisraele ndenge abikisaki bango na lobɔkɔ ya Ezipito. 10 Na yango Yetro alobaki ete: “Yehova akumisama, oyo abikisi bino na lobɔkɔ ya Ezipito mpe ya Farao, mpe oyo alongoli bato na nse ya bokonzi ya Ezipito. 11 Sikoyo nayebi ete Yehova azali monene koleka banzambe mosusu nyonso,+ mpo na likambo oyo asalaki baoyo basalelaki bato na ye makambo na lofundo.” 12 Bongo Yetro, bokilo ya Moize, azwaki likabo ya kotumba mpe bambeka mpo na Nzambe, mpe Arona ná bankulutu nyonso ya Yisraele bayaki kolya bilei elongo na bokilo ya Moize, liboso ya Nzambe ya solo.

13 Na mokolo oyo elandaki, Moize afandaki lokola momeseno mpo na kosambisa bato, mpe bato bazalaki kaka kotɛlɛma liboso ya Moize banda ntɔngɔ tii mpokwa. 14 Ntango bokilo ya Moize amonaki makambo nyonso oyo azalaki kosala mpo na bato, alobaki ete: “Likambo nini oyo ozali kosalela bato? Mpo na nini ofandi awa kaka yo moko mpe bato nyonso bazali kotɛlɛma liboso na yo banda ntɔngɔ tii mpokwa?” 15 Moize alobaki na bokilo na ye ete: “Mpo bato bazali kaka koya epai na ngai mpo na kotuna Nzambe. 16 Soki likambo moko ebimi, bayaka na yango epai na ngai mpe nasengeli kosambisa bango, mpe nayebisaka bikateli ya Nzambe ya solo mpe mibeko na ye.”+

17 Bokilo ya Moize alobaki na ye ete: “Ndenge oyo ozali kosala ezali malamu te. 18 Okolɛmba mpenza, yo ná bato oyo bazali elongo na yo, mpo oyo ezali mokumba monene mpe eleki yo, okokoka komema yango yo moko te. 19 Sikoyo yoká ngai. Nakopesa yo toli, mpe Nzambe akozala elongo na yo.+ Yo zalá momonisi ya bato liboso ya Nzambe ya solo,+ mpe yo osengeli komema makambo epai ya Nzambe ya solo.+ 20 Osengeli kokebisa bango na likambo etali malako mpe mibeko,+ mpe koyebisa bango nzela oyo basengeli kotambola mpe mosala oyo basengeli kosala. 21 Kasi osengeli kopona kati na bato mibali ya makoki,+ oyo babangaka Nzambe, oyo babongi kotyelama motema, oyo bayinaka litomba oyo ezwami na ndenge ya mabe,+ mpe tyá mibali yango bázala bakonzi ya bato nkóto, bakonzi ya bato nkama, bakonzi ya bato ntuku mitano mpe bakonzi ya bato zomi.+ 22 Basengeli kosambisa bato na ntango nyonso oyo makambo ebimi, mpe bakomemela yo likambo nyonso ya mpasi,+ kasi bakokata likambo nyonso ya moke. Kabolá mikumba elongo na bango, mpo makambo ekóma pɛpɛlɛ mpo na yo.+ 23 Soki osali likambo oyo, mpe Nzambe andimi yango, okolonga mpenza, mpe moto nyonso akozonga na esika na ye na esengo.”

24 Na mbala moko Moize ayokaki bokilo na ye mpe asalaki makambo nyonso oyo alobaki. 25 Moize aponaki mibali ya makoki na kati ya Yisraele mobimba mpe atyaki bango bázala bakonzi ya bato nkóto, bakonzi ya bato nkama, bakonzi ya bato ntuku mitano mpe bakonzi ya bato zomi. 26 Na yango, basambisaki bato ntango nyonso oyo makambo ebimaki. Likambo ya mpasi bazalaki komema yango epai ya Moize,+ kasi bazalaki kosambisa likambo nyonso ya moke. 27 Nsima na yango, Moize akendaki kotika bokilo na ye na nzela,+ mpe bokilo na ye akendaki na mokili na ye.