Nzembo

144 Yehova Libanga na ngai+ asanzolama,

Ye oyo ateyaka ngai mpo na kobunda,

Mpe abongisaka ngai mpo na etumba.+

 2 Azali bolingo ya sembo na ngai mpe esika makasi ya libateli na ngai,

Esika na ngai ya kokima mpe Mobikisi na ngai,

Nguba na ngai mpe Moto oyo nakimi epai na ye,+

Ye oyo azali kotya bato ya bikólo na nse na ngai.+

 3 Ee Yehova, moto azali nani mpo okanisa ye,

Mwana ya moto, mowei mpamba mpo otyela ye likebi?+

 4 Moto azali lokola mwa mopɛpɛ;+

Mikolo na ye ezali lokola elili oyo ezali koleka.+

 5 Ee Yehova, kitisá likoló na yo mpe kitá;+

Simbá bangomba mpe salá ete ebimisa milinga.+

 6 Tindá mikalikali mpe panzá banguna;+

Bɛtá makula na yo mpe tyá bango na mobulu.+

 7 Sembolá mabɔkɔ na yo uta na likoló;

Bikisá ngai mpe batelá ngai na mai oyo ezali kotomboka,

Na lobɔkɔ ya bapaya,+

 8 Baoyo monɔkɔ na bango elobaka lokuta

Mpe baoyo batombolaka lobɔkɔ na bango ya mobali mpo na kolapa ndai na likambo oyo ezali lokuta.*

Nakoyemba mpo na kosanzola* yo na ebɛtɛlo ya nsinga zomi,

10 Mpo na Ye oyo alongisaka bakonzi,*+

Ye oyo abikisaka mosaleli na ye Davidi na mopanga oyo ebomaka mpenza.+

11 Bikisá ngai mpe batelá ngai na mabɔkɔ ya bapaya,

Baoyo monɔkɔ na bango elobaka lokuta

Mpe baoyo batombolaka lobɔkɔ na bango ya mobali mpo na kolapa ndai na likambo oyo ezali lokuta.

12 Bongo bana na biso ya mibali bakozala lokola milona oyo ekolaka mbangu,

Bana na biso ya basi lokola makonzí oyo basalá na matumu ya ndako ya mokonzi.

13 Bibombelo na biso ekotonda na biloko ndenge na ndenge;

Bitonga na bilanga na biso ekobakisama; ekokóma bankóto, bankóto zomi.

14 Bangɔmbɛ na biso oyo ezali na zemi ekozwa likama te mpe zemi na yango ekosopana te;

Koganga ya mpasi ekozala te na bisika na biso ya minene ya bato nyonso.