Kobima

27 “Okosala etumbelo na nzete ya akasia;+ molai na yango ekozala mapeko* mitano mpe monene na yango mapeko mitano. Etumbelo ekozala karé mpe bosanda na yango mapeko misato.+ 2 Okosala maseke+ na nsuka na yango minei; maseke ekokangana na etumbelo yango, mpe okozipa etumbelo na kwivre.+ 3 Okosala bambɛki na yango mpo na kolongola putulu ya mɔtɔ,* elongo na bapau, mabakuli, nkanya, mpe biloko na yango ya kotya mɔtɔ, mpe okosala bisaleli na yango nyonso na kwivre.+ 4 Okosala motalaka mpo na etumbelo, monyama ya kwivre, mpe likoló ya monyama yango okosala mpɛtɛ minei ya kwivre na nsuka na yango minei. 5 Okotya yango na nse ya kadre ya etumbelo, mpe monyama yango esengeli kozala na katikati ya etumbelo. 6 Okosala banzete ya komema etumbelo, banzete yango ekozala ya akasia, mpe okozipa yango na kwivre. 7 Banzete yango ya komema ekokɔtisama na bampɛtɛ mpo banzete yango ezala na mipanzi mibale ya etumbelo ntango bazali komema yango.+ 8 Okosala etumbelo yango lokola kɛsi ya mabaya oyo ezali polele na kati. Esengeli kosalema kaka ndenge alakisaki yo na ngomba.+

9 “Okosala lopango ya tabernakle.+ Mpo na ngámbo ya sudi, lopango ekozala na barido ya lini ya kitoko oyo elíngamalíngamá, molai ya mopanzi moko ekozala mapeko 100.+ 10 Ekozala na makonzí 20 ná bitɛlɛmiselo na yango 20 ya kwivre, oyo ezali na mabulu. Bakroshɛ ya makonzí ná bikangiseli* na yango ekozala ya palata. 11 Barido ya ngámbo ya nɔrdi ekozala mpe na molai ya mapeko 100, elongo na makonzí na yango 20 ná bitɛlɛmiselo na yango 20 ya kwivre, oyo ezali na mabulu, ná bakroshɛ mpe bikangiseli ya palata mpo na makonzí. 12 Na ngámbo ya wɛsti, barido ekozala mapeko 50 na monene nyonso ya lopango, elongo na makonzí zomi mpe bitɛlɛmiselo zomi, oyo ezali na mabulu. 13 Monene ya lopango na ngámbo ya ɛsti, epai moi ebimaka, ekozala mapeko 50. 14 Barido ekozala ya mapeko 15 na ngámbo moko, ná makonzí misato mpe bitɛlɛmiselo misato oyo ezali na mabulu.+ 15 Mpe na ngámbo mosusu, barido ekozala ya mapeko 15, ná makonzí misato mpe bitɛlɛmiselo misato oyo ezali na mabulu.

16 “Na ekɔtelo ya lopango esengeli kozala na elamba ya kozipa,* ekozala na molai ya mapeko 20, oyo esalemi na nsinga ya bulé, na lɛnɛ oyo epakolami langi ya mwa motane-bulé, na biloko oyo epakolami langi ya motane makasi, mpe na lini ya kitoko oyo elíngamalíngamá, oyo batongi yango esika moko,+ ná makonzí na yango minei mpe bitɛlɛmiselo na yango minei oyo ezali na mabulu.+ 17 Makonzí nyonso oyo ezali zingazinga ya lopango ekozala ya biloko ya palata oyo ekangaka makasi, mpe bakroshɛ ya palata, kasi bitɛlɛmiselo na yango oyo ezali na mabulu ekozala ya kwivre.+ 18 Lopango ekozala na molai ya mapeko 100,+ monene na yango ekozala mapeko 50, mpe bosanda na yango ekozala mapeko 5, oyo esalemi na lini ya kitoko oyo elíngamalíngamá, mpe esengeli kozala na bitɛlɛmiselo ya kwivre oyo ezali na mabulu. 19 Bisaleli nyonso mpe biloko nyonso oyo ekosalelama na misala ya tabernakle, ezala mpe bapike na yango, mpe bapike nyonso ya lopango, ekozala ya kwivre.+

20 “Okopesa Bayisraele etinda ete bámemela yo mafuta ya pɛto, mafuta ya mbuma ya olive oyo etutami mpo na engɛngiseli, mpo na kopelisa miinda ntango nyonso.+ 21 Na kati ya hema ya kokutana, libándá ya rido oyo ezali pene na Litatoli,+ Arona ná bana na ye ya mibali bakobongisa mpo miinda epelaka banda mpokwa tii na ntɔngɔ liboso ya Yehova.+ Yango ezali mobeko oyo Bayisraele basengeli kotosa mpo na libela, na boumeli ya mabota na bango.+