Mokanda ya mibale ya

21 Manase+ azalaki na mbula 12 ntango akómaki mokonzi, mpe ayangelaki mbula 55 na Yerusaleme.+ Nkombo ya mama na ye ezalaki Hefiziba. 2 Manase asalaki makambo oyo ezali mabe na miso ya Yehova; alandaki mimeseno eyinamá ya bikólo+ oyo Yehova abenganaki liboso ya bato ya Yisraele.+ 3 Atongaki lisusu bisika oyo etombwaná, oyo tata na ye Ezekiasi abebisaki,+ asalaki bitumbelo mpo na Baala mpe atɛlɛmisaki nzete ya losambo,*+ kaka ndenge Ahaba mokonzi ya Yisraele asalaki.+ Mpe agumbamelaki limpinga nyonso ya likoló* mpe asalelaki yango.+ 4 Atongaki mpe bitumbelo mpo na banzambe ya lokuta na ndako ya Yehova,+ oyo mpo na yango Yehova alobaki: “Nakotya nkombo na ngai na Yerusaleme.”+ 5 Lisusu, atongaki bitumbelo mpo na limpinga nyonso ya likoló+ na mapango mibale ya ndako ya Yehova.+ 6 Mpe alekisaki mwana na ye moko mbeka na mɔtɔ; asalaki misala ya maji, alukaki bilembo ya makambo oyo ekoya,+ mpe atyaki bato oyo basololaka na bilimo mpe bato oyo basakolaka makambo ekoya.+ Asalaki mabe mingi mpenza na miso ya Yehova, mpo na kosilikisa ye.

7 Asalaki ekeko* ya nzete ya losambo*+ mpe atyaki yango na ndako oyo mpo na yango Yehova alobaki na Davidi mpe na mwana na ye Salomo ete: “Na ndako oyo mpe na Yerusaleme, engumba oyo naponi kati na teritware nyonso ya mabota ya Yisraele, nakotya nkombo na ngai mpo na libela.+ 8 Mpe nakosala lisusu te ete Bayisraele báyengayenga mosika na mokili oyo napesaki bankɔkɔ na bango,+ soki batosi malamumalamu mitindo nyonso oyo napesaki bango,+ Mobeko nyonso oyo mosaleli na ngai Moize ayebisaki bango bálanda.” 9 Kasi batosaki te, mpe Manase akobaki kobungisa bango nzela, bongo asalisaki bango mabe mingi koleka bikólo oyo Yehova asilisaki ntango Bayisraele bazwaki mokili yango.+

10 Yehova azalaki se koloba na nzela ya basaleli na ye basakoli, alobi:+ 11 “Manase mokonzi ya Yuda asali makambo wana nyonso oyo eyinamá; asali mabe mingi koleka Baamore+ nyonso oyo bazalaki liboso na ye,+ mpe amemaki Yuda na lisumu na nzela ya bikeko na ye ya bosɔtɔ.* 12 Yango wana talá oyo Yehova Nzambe ya Yisraele alobi: ‘Nazali koyeisela Yerusaleme+ ná Yuda mpasi, oyo soki moto ayoki yango matoi na ye ekosala mpasi.+ 13 Mpe nakosembolela Yerusaleme nsinga ya komeka+ oyo basalelaki mpo na komeka Samaria,+ mpe nivo* oyo basalelaki mpo na ndako ya Ahaba.+ Mpe nakosukola mpenza Yerusaleme ndenge moto asukolaka kibakuli, asukoli yango mpe abaloli yango.+ 14 Nakosundola bato* na ngai oyo batikali+ mpe nakopesa bango na lobɔkɔ ya banguna na bango. Banguna na bango bakokanga bango mpe bakopunza biloko na bango,+ 15 mpo basalaki oyo ezalaki mabe na miso na ngai mpe bazalaki se kosilikisa ngai banda mokolo oyo bankɔkɔ na bango babimaki na Ezipito tii lelo.’”+

16 Manase asopaki mpe makila ya bato mingi mpenza oyo basalaki likambo te, tii atondisaki Yerusaleme na makila banda nsuka tii nsuka,+ longola lisumu na ye ya komema Yuda na lisumu, na ndenge asalisaki bango makambo oyo ezali mabe na miso ya Yehova. 17 Makambo mosusu ya lisolo ya Manase, ná nyonso oyo asalaki mpe masumu oyo asalaki, ekomami na buku ya masolo ya kala ya bakonzi ya Yuda. 18 Na nsima, Manase akufaki* mpe bakundaki ye na elanga oyo ezalaki na lopango na ye, elanga ya Uza.+ Mpe mwana na ye Amone akómaki mokonzi na esika na ye.

19 Amone+ azalaki na mbula 22 ntango akómaki mokonzi, mpe ayangelaki mbula mibale na Yerusaleme.+ Nkombo ya mama na ye ezalaki Meshulemete, mwana ya Haruze moto ya engumba Yoteba. 20 Amone akobaki kosala makambo oyo ezali mabe na miso ya Yehova, kaka ndenge tata na ye Manase asalaki.+ 21 Alandaki ndakisa mabe* ya tata na ye, mpe akobaki kosalela bikeko ya bosɔtɔ oyo tata na ye asalelaki mpe azalaki kogumbamela yango.+ 22 Bongo asundolaki Yehova Nzambe ya bankɔkɔ na ye, mpe atambolaki na nzela ya Yehova te.+ 23 Nsukansuka, basaleli ya Mokonzi Amone basalelaki ye likita mpe babomaki ye na ndako na ye moko. 24 Kasi bato ya ekólo babomaki bato nyonso oyo basalelaki Mokonzi Amone likita, mpe bakómisaki mwana na ye Yosiya mokonzi na esika na ye.+ 25 Makambo mosusu ya lisolo ya Amone, ná nyonso oyo asalaki, ekomami na buku ya masolo ya kala ya bakonzi ya Yuda. 26 Bongo bakundaki Amone na lilita na ye na elanga ya Uza,+ mpe mwana na ye Yosiya+ akómaki mokonzi na esika na ye.