Kobima

28 “Okozwa na kati ya Bayisraele Arona ndeko na yo, elongo na bana na ye ya mibali, mpo básalela ngai mosala ya nganga-nzambe:+ Arona,+ elongo na Nadabe ná Abihu,+ Eleazare ná Itamare,+ bana mibali ya Arona.+ 2 Okosalela Arona ndeko na yo bilamba mosantu, mpo na nkembo mpe kitoko.+ 3 Okoloba na bato nyonso oyo bayebi mosala malamu,* baoyo natondisi motema na bango na bwanya+ mpe bakosalela Arona bilamba mpo na kosantisa ye, mpo asalela ngai mosala ya nganga-nzambe.

4 “Bilamba bakosala yango oyo: libenga ya ntolo,+ efode,+ kazaka ezangá mabɔkɔ,+ zambala ya karékaré, tirba*+ ná elamba ya kokanga na loketo;+ bakosalela Arona ndeko na yo mpe bana na ye ya mibali bilamba mosantu, mpo asalela ngai mosala ya nganga-nzambe. 5 Bato oyo bayebi mosala malamu bakosalela wolo, nsinga ya bulé, lɛnɛ oyo epakolami langi ya mwa motane-bulé, biloko oyo epakolami langi ya motane makasi ná lini ya kitoko.

6 “Bakosala efode ya wolo, nsinga ya bulé, lɛnɛ oyo epakolami langi ya mwa motane-bulé, nsinga oyo epakolami langi ya motane makasi mpe lini ya kitoko oyo elíngamalíngamá, mayemi yango ekosalema na bansinga.+ 7 Yango ekozala na biteni mibale ya elamba na mapeka oyo ekangisami na bansuka na yango mibale. 8 Nkamba oyo batongi,+ oyo ekangami na efode mpo efanda malamu, esengeli kosalema na biloko oyo basalaki na yango efode: wolo, nsinga ya bulé, lɛnɛ oyo epakolami langi ya mwa motane-bulé, nsinga oyo epakolami langi ya motane makasi mpe lini ya kitoko oyo elíngamalíngamá.

9 “Okozwa mabanga mibale ya onikisi+ mpe okokoma likoló na yango nkombo ya bana ya Yisraele na makomi oyo bakati kokata,+ 10 nkombo motoba likoló ya libanga moko mpe nkombo motoba oyo etikali likoló ya libanga mosusu, na kolanda ndenge babotamá. 11 Moto oyo akomaka na mabanga akokoma nkombo ya bana ya Yisraele na mabanga yango mibale na makomi oyo bakati kokata kaka ndenge akoki kosala kashɛ.+ Na nsima, okotya yango na mpɛtɛ ya wolo oyo ezali na mapeka. 12 Okotya mabanga yango mibale na biteni ya elamba ya mapeka ya efode lokola mabanga ya ekaniseli mpo na bana ya Yisraele,+ mpe Arona asengeli komema nkombo na bango na biteni mibale ya elamba oyo ezali na mapeka na ye liboso ya Yehova mpo ezala ekaniseli. 13 Okosala mpɛtɛ ya wolo oyo ezali na mapeka 14 mpe minyɔlɔlɔ mibale ya wolo ya pɛto oyo elíngamalíngamá lokola nsinga,+ mpe osengeli kokangisa minyɔlɔlɔ yango oyo ezali lokola nsinga na mpɛtɛ oyo ezali na mapeka.+

15 “Okosalisa libenga ya ntolo mpo na kosambisa, epai ya moto oyo asalaka mayemi na bansinga.+ Ekosalema lokola efode, na wolo, na nsinga ya bulé, na lɛnɛ oyo epakolami langi ya mwa motane-bulé mpe na nsinga oyo epakolami langi ya motane makasi, mpe na lini ya kitoko oyo elíngamalíngamá.+ 16 Esengeli kozala karé ntango egumbami na mibale, ekozala zerete* moko na molai mpe zerete moko na monene. 17 Osengeli kobongisa esika na yango ya kotya mabanga, milɔngɔ minei ya mabanga. Molɔngɔ ya liboso ezali rubi, topazi ná emerode. 18 Molɔngɔ ya mibale ezali tirikwaze, safire ná jasipe. 19 Molɔngɔ ya misato ezali libanga ya leshɛmɛ,* agate ná ametiste. 20 Molɔngɔ ya minei ezali krizolite, onikisi ná jade. Osengeli kobongisa yango na esika ya mpɛtɛ ya wolo oyo ezali na mapeka. 21 Mabanga yango ekozala na bankombo 12 ya bana ya Yisraele. Nkombo mokomoko esengeli kozala na makomi oyo bakati kokata ndenge ezalaka na kashɛ, mokomoko na yango ekomonisa libota moko kati na mabota 12.

22 “Okosala na libenga ya ntolo minyɔlɔlɔ oyo balitalitá, lokola bansinga ya wolo ya pɛto.+ 23 Na libenga ya ntolo okosala mpɛtɛ mibale ya wolo mpe okokangisa mpɛtɛ yango mibale na nsuka mibale ya libenga ya ntolo. 24 Okolekisa bansinga mibale ya wolo na kati ya mpɛtɛ mibale na bansuka ya libenga ya ntolo. 25 Okolekisa bansuka mibale ya bansinga yango mibale na mpɛtɛ mibale oyo ezali na mapeka, mpe osengeli kokangisa yango na biteni ya elamba ya mapeka ya efode, na liboso. 26 Okosala mpɛtɛ mibale ya wolo mpe okotya yango na kati ya bansuka mibale ya libenga ya ntolo, na ngámbo oyo etali efode.+ 27 Okosala mpɛtɛ mosusu mibale ya wolo liboso ya efode, na nse ya biteni mibale ya elamba ya mapeka, pene na esika oyo yango ekutani, likoló ya nkamba ya efode oyo batongi.+ 28 Libenga ya ntolo esengeli kosimbama na nsinga ya bulé, oyo ekokangisama na mpɛtɛ na yango tii na mpɛtɛ ya efode. Yango ekobatela libenga ya ntolo mpo efanda malamu na efode, likoló ya nkamba oyo batongi.

29 “Arona asengeli komema nkombo ya bana ya Yisraele na libenga ya ntolo mpo na kosambisa likoló ya motema na ye, ntango akokɔta na Esika Mosantu, mpo ezala ntango nyonso ekaniseli liboso ya Yehova. 30 Okotya Urime ná Tumime*+ na kati ya libenga ya ntolo mpo na kosambisa, mpe yango esengeli kozala likoló ya motema ya Arona ntango akokɔta liboso ya Yehova, mpe Arona asengeli komema bisaleli mpo na bikateli ya lisambisi ya Bayisraele likoló ya motema na ye ntango nyonso liboso ya Yehova.

31 “Okosala kazaka ezangá mabɔkɔ ya kolata na nse ya efode, yango nyonso na nsinga ya bulé.+ 32 Ekozala na nkingo na likoló,* na katikati na yango. Nkingo na yango ekozala na ndelo oyo mosali-bilamba atongi zingazinga na yango. Ekozala lokola nkingo ya kazaka ya bibende, mpo epasuka te. 33 Osengeli kosala na ndelo na yango ya nse bambuma ya grenade na nsinga ya bulé, ná lɛnɛ oyo epakolami langi ya mwa motane-bulé, ná nsinga oyo epakolami langi ya motane makasi, ná bangonga mikemike ya wolo na kati na yango zingazinga. 34 Osengeli kosala ngonga moko ya moke ya wolo ná mbuma ya grenade moko, ngonga moko ya moke ya wolo ná mbuma ya grenade moko na ndelo ya nse ya kazaka ezangá mabɔkɔ, zingazinga na yango nyonso. 35 Arona asengeli kolata yango mpo asala mosala, mpe makɛlɛlɛ oyo ezali kouta na yango esengeli koyokana ntango akokɔta na esika mosantu liboso ya Yehova mpe ntango akobima, mpo akufa te.+

36 “Osengeli kosala linzanza ya kongɛnga ya wolo ya pɛto mpe okokata makomi likoló na yango ndenge ezalaka na kashɛ: ‘Bosantu ezali ya Yehova.’+ 37 Osengeli kokangisa yango makasi na tirba+ na nsinga ya bulé; ekotikala liboso ya tirba. 38 Ekozala na elongi ya Arona, mpe Arona akomema mokumba ntango moto moko asali libunga mpo na biloko mosantu,+ oyo Bayisraele bakosantisa ntango bakopesa yango lokola makabo ya bosantu. Esengeli ntango nyonso kozala na elongi na ye, mpo bándimama liboso ya Yehova.

39 “Okosala zambala ya lini ya kitoko ya karékaré, okosala tirba ya lini ya kitoko, mpe okosala elamba oyo batongi mpo na kokanga na loketo.+

40 “Okosala mpe bazambala, bilamba ya kotya zingazinga ya ntolo, mpe biloko ya kolata na motó mpo na bana mibali ya Arona,+ mpo na nkembo mpe kitoko.+ 41 Okolatisa Arona ndeko na yo ná bana na ye ya mibali elongo na ye, mpe osengeli kotya bango mafuta,+ kotya bango lokola banganga-nzambe,*+ kosantisa bango, mpe bakosalela ngai mosala ya banganga-nzambe. 42 Salelá bango mpe bakupe* ya lini mpo na kozipa bolumbu na bango ya nzoto.+ Yango ekobanda na loketo tii na bibɛlɔ.* 43 Arona ná bana na ye ya mibali basengeli kolata yango ntango bakokɔta na hema ya kokutana to ntango bakopusana na etumbelo mpo na kosala na esika mosantu, noki bámema ngambo mpe bákufa. Yango ezali mobeko mpo na libela mpo na ye mpe bana na ye, oyo bakoya nsima na ye.