Ezera

8 Talá bankombo ya bankumu ya mabota ya batata mpe molɔngɔ ya bato ya libota mokomoko ya baoyo bautaki elongo na ngai na Babilone, ntango Mokonzi Artazerezese azalaki koyangela:+ 2 Na bana ya Finehase:+ Gereshome; na bana ya Itamare:+ Danyele; na bana ya Davidi: Hatushe; 3 na bana ya Shekania, na bana ya Paroshe: Zekaria, mpe elongo na ye mibali 150 oyo bakomamaki nkombo; 4 na bana ya Pahate-moabe:+ Elieho-enai mwana ya Zerahia, mpe elongo na ye mibali 200; 5 na bana ya Zatu:+ Shekania mwana ya Yahaziele, mpe elongo na ye mibali 300; 6 na bana ya Adine:+ Ebede mwana ya Yonatane, mpe elongo na ye mibali 50; 7 na bana ya Elame:+ Yeshaya mwana ya Atalia, mpe elongo na ye mibali 70; 8 na bana ya Shefatia:+ Zebadia mwana ya Mikaele, mpe elongo na ye mibali 80; 9 na bana ya Yoabe: Obadia mwana ya Yehiele, mpe elongo na ye mibali 218; 10 na bana ya Bani: Shelomite mwana ya Yosifia, mpe elongo na ye mibali 160; 11 na bana ya Bebai:+ Zekaria mwana ya Bebai, mpe elongo na ye mibali 28; 12 na bana ya Azegade:+ Yohanane mwana ya Hakatane, mpe elongo na ye mibali 110; 13 na bana ya Adonikame,+ baoyo bazalaki bato ya nsuka, bankombo na bango yango oyo: Elifelete, Yeyele ná Shemaya, mpe elongo na bango mibali 60; 14 mpe na bana ya Bigivai:+ Utai ná Zabude, mpe elongo na bango mibali 70.

15 Nayanganisaki bango pene na ebale oyo eleki tii na Ahava,+ mpe totyaki kaa wana mikolo misato. Kasi ntango natalaki malamumalamu bato ná banganga-nzambe, namonaki ata Molevi moko te. 16 Bongo nabengisaki Eliezere, Ariele, Shemaya, Elenatane, Yaribe, Elenatane, Natane, Zekaria ná Meshulame, mibali oyo bazalaki kotambwisa makambo, mpe Yoyaribe ná Elenatane, oyo bazalaki balakisi. 17 Na nsima napesaki bango mitindo mpo na Ido oyo azalaki mokambi na esika ebengami Kasifia. Nalobaki na bango báyebisa Ido ná bandeko na ye, basaleli ya tempelo* oyo bazalaki kofanda na Kasifia, bámemela biso basungi mpo na ndako ya Nzambe na biso. 18 Lokola lobɔkɔ malamu ya Nzambe na biso ezalaki likoló na biso, bamemelaki biso mobali moko ya mayele, moko ya bana ya Maheli+ mwana ya mwana ya Levi mwana ya Yisraele, nkombo na ye Sherebia+ ná bana na ye mpe bandeko na ye, bango nyonso mibali 18; 19 bayaki mpe ná Hashabia mpe elongo na ye Yeshaya moto ya libota ya Merari,+ bandeko na ye, mpe bana na bango, bango nyonso mibali 20. 20 Mpe na kati ya basaleli ya tempelo,* oyo Davidi mpe bankumu batyaki mpo na mosala ya Balevi: ezalaki na mibali 220, bango nyonso baponamaki na bankombo na bango.

21 Bongo kuna na ebale Ahava, napesaki mitindo ete tókila bilei mpo tómikitisa liboso ya Nzambe na biso, mpo na kosɛnga ye akamba biso mpo mobembo eleka malamu, mpo na biso, bana na biso mpe biloko na biso nyonso. 22 Nayokaki nsɔni kosɛnga mokonzi apesa basoda mpe batambwisi-mpunda mpo na kobatela biso na nzela liboso ya banguna, mpo liboso tolobaki na mokonzi ete: “Lobɔkɔ malamu ya Nzambe na biso ezali likoló na baoyo balukaka ye,+ kasi makasi na ye mpe nkanda na ye ekwelaka baoyo nyonso basundolaka ye.”+ 23 Na yango tokilaki bilei, mpe tosɛngaki Nzambe na biso akamba biso na mobembo, mpe ayokaki libondeli na biso.+

24 Na nsima, na kati ya bakambi ya banganga-nzambe, naponaki mibali 12, elingi koloba Sherebia, Hashabia,+ ná bandeko na bango ya mibali 10. 25 Namekaki kilo ya palata, ya wolo mpe ya bisaleli, likabo oyo mokonzi ná bapesi-toli na ye, bankumu ya ekólo mpe Bayisraele nyonso oyo bazalaki wana bapesaki mpo na ndako ya Nzambe na biso; bongo napesaki bango yango nyonso.+ 26 Kilo oyo namekaki mpe napesaki mibali yango na mabɔkɔ ezalaki talanta 650 ya palata mpe bisaleli 100 ya palata oyo ezali na motuya ya talanta* mibale, ná wolo, talanta 100, 27 ná mabakuli ya mike 20 ya wolo oyo ezali na motuya ya darike* 1 000 mpe bisaleli mibale ya kwivre ya malamu, ya motane oyo ezali kongɛnga, ya kitoko lokola wolo.

28 Na nsima nalobaki na bango: “Bozali basantu mpo na Yehova,+ mpe bisaleli oyo ezali mosantu, mpe palata ná wolo ezali likabo oyo bopesi na bolingo na bino moko mpo na Yehova Nzambe ya bankɔkɔ na bino. 29 Bóbatela yango malamumalamu tii ntango bokomeka kilo na yango liboso ya bakambi ya banganga-nzambe ná Balevi mpe liboso ya bankumu ya batata ya mabota ya Yisraele, na Yerusaleme,+ na bashambrɛ* ya ndako ya Yehova.” 30 Mpe banganga-nzambe ná Balevi bazwaki palata, wolo mpe bisaleli oyo bamekaki kilo na yango mpe bapesaki bango, mpo na komema yango na Yerusaleme, na ndako ya Nzambe na biso.

31 Nsukansuka tolongwaki na ebale Ahava+ na mokolo ya 12 ya sanza ya liboso,+ mpo na kokende na Yerusaleme. Nzambe na biso azalaki* elongo na biso, mpe abikisaki biso na mabɔkɔ ya banguna mpe ya bato oyo babombanaka na nzela mpo na kosala bato mabe. 32 Bongo tokómaki na Yerusaleme+ mpe tofandaki wana mikolo misato. 33 Na mokolo ya minei tomekaki kilo ya palata, wolo mpe bisaleli na ndako ya Nzambe na biso+ mpe topesaki yango Meremote+ mwana ya nganga-nzambe Uriya, oyo azalaki elongo na Eleazare mwana ya Finease, mpe bazalaki elongo na Balevi oyo: Yozabade+ mwana ya Yeshua ná Noadia mwana ya Binui.+ 34 Batángaki mpe bamekaki kilo ya eloko nyonso, mpe bakomaki kilo ya eloko mokomoko. 35 Bato oyo bautaki na bokangami, baoyo kala bamemamaki na mboka mopaya, bapesaki Nzambe ya Yisraele bambeka ya kotumba: ngɔmbɛ-mibali 12+ mpo na Yisraele mobimba, mpate-mibali 96,+ bana-mpate mibali 77, ntaba-mibali 12+ mpo ezala likabo mpo na lisumu, nyonso wana ezalaki likabo ya kotumbela Yehova.+

36 Na nsima topesaki mitindo ya mokonzi+ epai ya basatrape* ya mokonzi, mpe epai ya baguvɛrnɛrɛ ya etúká ya ngámbo mosusu ya Ebale,*+ basalisaki bato mpe bapesaki makabo mpo na ndako ya Nzambe ya solo.+