Mokanda ya liboso ya Ntango

10 Bongo Bafilistia bazalaki kobundisa Yisraele. Basoda ya Yisraele bakimaki liboso ya Bafilistia, mpe mingi na bango babomamaki na Ngomba Gilboa.+ 2 Bafilistia bazalaki kaka kolanda Saulo ná bana na ye, mpe nsukansuka babomaki Yonatane, Abinadabe, mpe Malaki-shua,+ bana ya Saulo. 3 Etumba eyelaki Saulo ndongo, mpe bato oyo babwakaka makula bamonaki ye mpe bazokisaki ye.+ 4 Bongo Saulo alobaki na momemi-bibundeli na ye boye: “Bendá mopanga na yo mpe tɔbɔlá ngai na yango, mpo bisutu oyo báya te koboma ngai lokola nyama.”*+ Kasi momemi-bibundeli na ye aboyaki, mpo azalaki kobanga mingi. Bongo Saulo azwaki mopanga mpe akwelaki yango.+ 5 Ntango momemi-bibundeli na ye amonaki ete Saulo akufi, ye mpe akwelaki mopanga na ye mpe akufaki. 6 Bongo Saulo ná bana na ye misato bakufaki, mpe bato nyonso ya ndako na ye bakufaki bango nyonso.+ 7 Ntango bato nyonso ya Yisraele oyo bazalaki na lobwaku* bamonaki ete bato nyonso bakimi, mpe ete Saulo ná bana na ye bakufi, basundolaki bingumba na bango mpe bakimaki. Na nsima, Bafilistia bakɔtaki na bingumba yango mpe bakómaki kofanda kuna.

8 Na mokolo oyo elandaki, ntango Bafilistia bayaki kozwa biloko ya bato oyo babomamaki, bakutaki ebembe ya Saulo mpe bibembe ya bana na ye elali na Ngomba Gilboa.+ 9 Bongo balongolaki biloko ya Saulo, bakataki ye motó mpe bamemaki bibundeli na ye. Batindaki bato na ekólo mobimba ya Bafilistia mpo na kopanza nsango epai ya banzambe na bango ya bikeko+ mpe epai ya bato. 10 Na nsima, batyaki bibundeli na ye na tempelo* ya nzambe na bango, mpe bakangisaki mokuwa ya motó na ye na tempelo ya Dagone.+

11 Ntango bato nyonso ya Yabeshe+ na Gileade bayokaki makambo nyonso oyo Bafilistia basalaki Saulo,+ 12 bilombe nyonso batɛlɛmaki mpe bakendaki kozwa ebembe ya Saulo ná bibembe ya bana na ye. Bayaki na yango na Yabeshe mpe bakundaki mikuwa na bango na nse ya nzete monene na Yabeshe,+ mpe bakilaki bilei mikolo nsambo.

13 Ndenge wana nde Saulo akufaki, mpo azalaki sembo te epai ya Yehova na ndenge atosaki te liloba ya Yehova,+ mpe na ndenge akendaki kotuna makambo epai ya moto oyo asololaka na bilimo,+ 14 na esika ya kotuna Yehova. Na yango, abomaki Saulo mpe apesaki bokonzi na Davidi mwana ya Yese.+