Mokanda ya liboso epai ya Bakorinti

12 Bandeko, nalingi bókanga ntina ya makabo ya elimo santu.+ 2 Boyebi ete liboso bókóma bandimi,* bikeko oyo kutu ekokaki koloba te, ezalaki kotambwisa mpe kokosa bino,+ bozalaki kolanda yango bisika nyonso ezalaki komema bino. 3 Sikoyo, nalingi bóyeba ete moto moko te oyo elimo ya Nzambe etambwisi ye, alobaka ete: “Yesu alakelami mabe!” mpe moto moko te akoki koloba ete: “Yesu azali Nkolo!” longola kaka soki moto yango atambwisami na elimo santu.+

4 Makabo ya elimo ezali ndenge na ndenge, kasi euti kaka na elimo moko;+ 5 na mosala ya Nzambe misala ezali ndenge na ndenge,+ kasi nyonso ezali kaka mpo na Nkolo moko. 6 Misala ezali ndenge na ndenge, kasi ezali kaka Nzambe moko oyo apesaka moto nyonso nguya ya kosala makambo wana.+ 7 Kasi elimo santu esalaka epai ya moto nyonso mpo na bolamu ya basusu.+ 8 Elimo epesaka moto likoki ya koloba na bwanya, mpe kaka elimo wana epesaka moto mosusu likoki ya koloba na boyebi. 9 Kaka elimo yango epesaka moto kondima,+ mpe moto mosusu likoki ya kobikisa.*+ 10 Lisusu epesaka moto mosusu likoki ya kosala makamwisi,+ mosusu likoki ya kosakola, mosusu likoki ya kokanga ntina soki nsango euti epai ya Nzambe,+ mosusu likoki ya koloba na minɔkɔ ndenge na ndenge,+ mpe mosusu likoki ya kolimbola makambo oyo elobami na minɔkɔ mosusu.+ 11 Misala nyonso wana, elimo kaka moko nde esalaka yango, epesaka moto na moto ndenge yango moko elingi.

12 Nzoto ya moto ezali na biteni ebele, kasi ezali kaka nzoto moko, mpe biteni yango nyonso ezali ya nzoto kaka moko,+ nzoto ya Kristo mpe ezali bongo. 13 Biso nyonso tozwaki batisimo na elimo kaka moko mpo na kosala nzoto moko, ezala tozali Bayuda to Bagrɛki, baombo to bato ya bonsomi, biso nyonso tozwaki* elimo kaka moko.

14 Ya solo, nzoto ezalaka na eteni kaka moko te, kasi na biteni ebele.+ 15 Soki lokolo elobi: “Mpo nazali lobɔkɔ te, nazali eteni ya nzoto te,” ezali te mpo na bongo nde ekotika kozala eteni ya nzoto. 16 Mpe soki litoi elobi ete: “Mpo nazali liso te, nazali eteni ya nzoto te,” ezali te mpo na bongo nde ekotika kozala eteni ya nzoto. 17 Soki nzoto mobimba ezalaki liso, likoki ya koyoka elingaki kozala wapi? Soki nzoto mobimba ezalaki litoi, likoki ya koyoka nsolo elingaki kozala wapi? 18 Kasi Nzambe atyaki eteni mokomoko ya nzoto kaka ndenge asepelaki.

19 Soki biteni yango nyonso ezalaki ndenge moko, nzoto elingaki kozala wapi? 20 Na yango sikoyo biteni ezali ebele, kasi nzoto ezali kaka moko. 21 Liso ekoki te koloba na lobɔkɔ ete: “Nazali na mposa na yo te”; to lisusu, motó ekoki te koloba na makolo ete: “Nazali na mposa na bino te.” 22 Nzokande, biteni ya nzoto oyo emonanaka ete ezali ya bolɛmbu ezalaka na ntina mingi. 23 Mpe tobatelaka malamu biteni ya nzoto oyo tokanisaka ete ezali na lokumu mingi te, mpe biteni ya nzoto na biso oyo esengeli komonana te topesaka yango lokumu mingi.+ 24 Nzokande biteni ya kitoko ya nzoto na biso ezalaka na mposa ya eloko te. Nzambe asali ete biteni nyonso ezala esika moko, mpo lokumu mingi ekende na biteni oyo ezali na mposa. 25 Asalaki bongo mpo ete nzoto ezala na bokabwani te, kasi biteni ya nzoto esengeli kotyelana likebi.+ 26 Soki eteni moko ya nzoto ezali koyoka mpasi, biteni nyonso mosusu ezali mpe koyoka mpasi elongo na yango.+ Soki eteni moko ya nzoto ekumisami, biteni nyonso mosusu esepelaka elongo na yango.+

27 Sikoyo bino bozali nzoto ya Kristo,+ mpe mokomoko na bino azali eteni ya nzoto yango.+ 28 Nzambe atye esika mpo na moto mokomoko na lisangá: ya liboso bantoma;+ ya mibale basakoli;+ ya misato bateyi;+ na nsima baoyo basalaka makamwisi;+ na nsima baoyo bazali na likoki ya kobikisa basusu,+ baoyo basalisaka basusu, baoyo bakambaka,+ baoyo bazali na likabo ya koloba minɔkɔ ndenge na ndenge.+ 29 Bango nyonso te nde bazali bantoma? To basakoli? To bateyi, boye te? Bango nyonso te nde basalaka makamwisi, boye te? 30 Bango nyonso te bazali na likoki ya kobikisa basusu, boye te?+ Bango nyonso te bazali na likabo ya koloba na minɔkɔ mosusu, to kobongola makambo oyo elobami na minɔkɔ mosusu boye te?+ 31 Na yango bósala makasi ya kozwa* makabo oyo eleki minene.+ Kasi sikoyo, nakolakisa bino nzela oyo eleki malamu.+