Mokanda ya mibale ya

20 Na mikolo yango, Ezekiasi abɛlaki mpe etikalaki moke akufa.+ Mosakoli Yisaya mwana ya Amoze ayaki epai na ye mpe alobaki na ye ete: “Yoká oyo Yehova alobi: ‘Pesá bato ya libota na yo* malako ya nsuka, mpo okokufa; okobika na maladi oyo te.’”+ 2 Ntango Ezekiasi ayokaki bongo, abalusaki elongi na ye na efelo mpe abandaki kobondela Yehova boye: 3 “Nabondeli yo, Ee Yehova, nabondeli yo, kobosana te ete natambolaki liboso na yo na bosembo mpe na motema mobimba, mpe nasalaki makambo oyo ezali malamu na miso na yo.”+ Mpe Ezekiasi alelaki mingi mpenza.

4 Bongo Yisaya abimaki. Kasi liboso ete akóma na katikati ya lopango ya ndako ya mokonzi, Yehova alobaki na ye:+ 5 “Zongá, mpe lobá na Ezekiasi, mokambi ya bato na ngai, maloba oyo: ‘Yehova Nzambe ya nkɔkɔ na yo Davidi alobi ete: “Nayoki libondeli na yo. Namoni mai ya miso na yo.+ Talá, nazali kobikisa yo na maladi oyo.+ Na mokolo ya misato, okokende na ndako ya Yehova.+ 6 Nakobakisa mbula 15 na bomoi na yo.* Nakobikisa yo mpe engumba oyo na lobɔkɔ ya mokonzi ya Asiri.+ Mpe nakobatela engumba oyo mpo na lokumu ya nkombo na ngai mpe mpo na mosaleli na ngai Davidi.”’”+

7 Na nsima Yisaya alobaki: “Bóya na gato ya figi ya kokauka oyo bafinafiná.” Bongo bayaki na yango mpe bapakolaki yango mokonzi na bibɔ. Nsima na yango, abandaki kobika mokemoke.+

8 Na ntango yango, Ezekiasi atunaki Yisaya: “Elembo nini+ emonisi ete Yehova akobikisa ngai mpe nakomata na ndako ya Yehova na mokolo ya misato?” 9 Yisaya ayanolaki: “Talá elembo oyo euti epai ya Yehova. Yango ekomonisa yo ete Yehova akokokisa liloba oyo alobi: Olingi ete elili ekende liboso matambe zomi likoló ya eskalye* to ezonga nsima matambe zomi?”+ 10 Ezekiasi alobaki: “Ezali likambo ya pɛtɛɛ mpo elili ekende liboso matambe zomi, kasi mpo ezonga nsima matambe zomi, ezali pɛtɛɛ te.” 11 Bongo, mosakoli Yisaya abondelaki Yehova, mpe Ye asalaki ete elili oyo ezalaki likólo ya eskalye ya Ahaze ezonga nsima matambe zomi.+

12 Na ntango yango, mokonzi ya Babilone, Bero-dake-baladane mwana ya Baladane atindelaki Ezekiasi mikanda ná likabo, mpo ayokaki ete Ezekiasi abɛlaki.+ 13 Ezekiasi ayambaki* bango mpe alakisaki bango ndako mobimba oyo abombaka biloko na ye ya motuya:+ palata, wolo, mafuta ya balsame, mafuta mosusu ya kitoko, ebombelo ya bibundeli na ye ná eloko nyonso oyo ezalaki na bisika na ye ya kobomba biloko ya motuya. Ezekiasi alakisaki bango biloko nyonso oyo ezalaki na ndako na ye* mpe na boyangeli na ye mobimba, abombelaki bango ata eloko moko te.

14 Nsima na yango, mosakoli Yisaya akɔtaki epai ya Mokonzi Ezekiasi mpe atunaki ye: “Bato yango bayebisi yo nini, mpe bauti wapi?” Bongo Ezekiasi ayanolaki: “Bauti na mokili moko mosika, na Babilone.”+ 15 Mpe Yisaya atunaki: “Bamoni nini na ndako na yo?”* Ezekiasi ayanolaki: “Bamoni biloko nyonso oyo ezali na ndako na ngai.* Nalakisi bango biloko nyonso oyo ezali na bisika na ngai ya kobomba biloko ya motuya.”

16 Sikoyo Yisaya alobaki na Ezekiasi: “Yoká liloba ya Yehova,+ 17 ‘Talá! Mikolo ezali koya, eloko nyonso oyo ezali na kati ya ndako na yo* mpe nyonso oyo bankɔkɔ na yo babombaki tii na mokolo ya lelo ekokende na Babilone.+ Eloko moko te ekotikala,’ Yehova alobi bongo. 18 ‘Mpe bana na yo mosusu, baoyo okobota, bakozwa bango+ mpe bakokóma bakapita na ndako monene ya mokonzi ya Babilone.’”+

19 Na yango Ezekiasi alobaki na Yisaya: “Liloba ya Yehova oyo olobi ezali malamu.”+ Mpe abakisaki: “Ezali malamu soki kimya mpe libateli* ekozala mikolo nyonso ya bomoi na ngai.”+

20 Makambo mosusu ya lisolo ya Ezekiasi, ná nguya na ye nyonso, ndenge asalaki liziba+ mpe nzela oyo elekisaka mai, mpe ndenge akómisaki mai na engumba,+ ekomami na buku ya masolo ya kala ya bakonzi ya Yuda. 21 Na nsima Ezekiasi akufaki,*+ mpe mwana na ye Manase+ akómaki mokonzi na esika na ye.+