Mokanda ya mibale ya Samwele
23 Oyo ezali maloba ya nsuka ya Davidi:+
“Liloba ya Davidi, mwana ya Yese,+
Liloba ya moto oyo Nzambe apesi lokumu,+
Moto oyo Nzambe ya Yakobo atye mafuta,+
Moyembi oyo bato basepelaka koyoka ye ntango azali koyemba nzembo+ ya Yisraele.
‘Soki moto oyo azali koyangela bato azali moto ya sembo,+
Soki azali koyangela na kobanga Nzambe,+
4 Ezali lokola pole ya ntɔngɔ ntango moi engali,+
Ɛɛ, ntɔngɔ oyo ezangi mapata.
Ezali lokola kongɛnga oyo eyaka soki mbula esili kobɛta,
Mpe ebimisi matiti na mabele.’+
5 Libota na ngai ezali mpe bongo liboso ya Nzambe.
Mpo asali ná ngai kondimana ya seko,+
Abongisi makambo nyonso mpo kondimana yango ekokisama mpenza.
Mpo kondimana yango ezali lobiko na ngai mobimba mpe esengo na ngai nyonso,
Yango nde ntina oyo azali kopambola libota na ngai,+ boye te?
6 Kasi bato nyonso ya mpambampamba bakobwakama+ lokola banzete ya nzube oyo ebwakami,
Oyo bakoki kolɔkɔta yango na mabɔko te.
7 Soki moto alingi kosimba yango,
Asengeli kozala na esaleli ya ebende mpe nzete ya likɔnga,
Mpe esengeli kozikisama nyonso nyɛɛ na mɔtɔ.”
8 Talá nkombo ya bilombe ya etumba ya Davidi:+ Yoshebe-bashebete moto ya Takemoni. Azalaki mokonzi ya bato misato.+ Mokolo moko abomaki bato 800 na likɔnga na ye. 9 Nsima na ye, ezalaki Eleazare+ mwana ya Dodo,+ mwana ya Ahohi. Ye azalaki kati na bilombe misato ya etumba oyo bazalaki elongo na Davidi ntango batumolaki Bafilistia. Bayanganaki kuna mpo na etumba, kasi ntango mibali ya Yisraele bazongaki nsima, 10 Eleazare atɛlɛmaki mpe akobaki koboma Bafilistia tii ntango lobɔkɔ na ye elɛmbaki mpe ekangamaki mpo asalelaki mopanga mingi.+ Mpe Yehova apesaki Yisraele elonga* moko monene na mokolo yango.+ Bongo basoda ya Yisraele bazongaki epai ya Eleazare mpo na kozwa biloko ya bato oyo babomamaki.
11 Nsima na ye, ezalaki Shama mwana ya Agea Moharari. Mokolo moko Bafilistia bayanganaki na Lehi, na esika oyo ezalaki na elanga moko oyo etondi na lantiye. Mpe mibali ya Yisraele bakimaki bango. 12 Nzokande ye atɛlɛmaki na katikati ya elanga yango, abatelaki yango mpe akobaki koboma Bafilistia, bongo Yehova apesaki bato na ye elonga* moko monene.+
13 Na eleko ya kobuka mbuma, mibali misato kati na bankumu 30 ya Davidi bakitaki epai ya Davidi na mobenga ya Adulame.+ Mpe etuluku moko ya Bafilistia etyaki kaa* na yango na Lobwaku* ya Barefaime.+ 14 Davidi azalaki na esika makasi ya libateli,+ mpe etuluku ya basoda ya Bafilistia oyo bazalaka liboso ezalaki na Beteleme. 15 Davidi amonisaki mposa na ye mpe alobaki: “Soki nakoki komɛla ata mai ya libulu ya kobomba mai oyo ezali pene na porte ya Beteleme!” 16 Na yango, bilombe yango misato ya etumba bakɔtaki na makasi na kaa ya Bafilistia mpe batokaki mai na libulu ya kobomba mai oyo ezali na porte ya Beteleme mpe bamemelaki yango Davidi. Kasi Davidi aboyaki komɛla mai yango, mpe asopaki yango na mabele liboso ya Yehova.+ 17 Alobaki: “Nakoki soki moke te kokanisa kosala likambo ya boye, Ee Yehova! Nasengeli nde komɛla makila+ ya mibali oyo bakei kotya bomoi* na bango na likama?” Bongo aboyaki komɛla yango. Wana nde makambo oyo bilombe na ye misato ya etumba basalaki.
18 Abishai+ ndeko ya Yoabe mwana ya Zeruya+ azalaki mokonzi ya etuluku mosusu ya bilombe misato ya etumba. Abomaki bato 300 na likɔnga na ye, mpe azalaki na lokumu lokola bilombe misato ya etumba.+ 19 Atako ayebanaki mingi na kati ya bilombe yango misato mpe azalaki mokonzi na bango, akómaki te na molɔngɔ ya bilombe minene misato ya Davidi.
20 Benaya+ mwana ya Yehoyada azalaki mobali ya mpiko* oyo asalaki makambo mingi ya minene na Kabizeele.+ Abomaki bana mibali mibale ya Ariele ya Moabe. Akitaki mpe na kati ya libulu moko ya mai mokolo moko oyo nɛjɛ ezalaki kokwea mpo na koboma nkɔsi moko.+ 21 Abomaki mpe mobali moko Moezipito oyo azalaki mbinga na ndenge ya kokamwa. Atako Moezipito yango azalaki na likɔnga na lobɔkɔ na ye, Benaya abundisaki ye na lingenda, abɔtɔlaki Moezipito likɔnga oyo azalaki na yango na lobɔkɔ mpe abomaki ye na likɔnga na ye moko. 22 Wana nde makambo oyo Benaya mwana ya Yehoyada asalaki, mpe azalaki na lokumu lokola bilombe minene misato ya Davidi. 23 Atako ayebanaki mingi koleka etuluku ntuku misato, akómaki te na molɔngɔ ya bilombe minene misato ya Davidi. Kasi Davidi atyaki ye mokonzi ya basoda oyo bakɛngɛlaka ye.
24 Asahele+ ndeko ya Yoabe azalaki na kati ya etuluku ntuku misato: Elehanane mwana ya Dodo ya Beteleme,+ 25 Shama moto ya Harode, Elika moto ya Harode, 26 Heleze+ moto ya Palati, Ira+ mwana ya Ikeshe moto ya Tekoa, 27 Abi-ezere+ moto ya Anatote,+ Mebunai moto ya Husha, 28 Zalamone Moahohi, Maharai+ moto ya Netofa, 29 Helebe mwana ya Baana moto ya Netofa, Itai mwana ya Ribai moto ya Gibea ya Benyamina, 30 Benaya+ moto ya engumba Piratone, Hidai moto ya mabwaku* ya Gaashe,+ 31 Abi-albone moto ya Arbate, Azemavete moto ya Bahurime, 32 Eliahaba moto ya Shaalbone, bana ya Yashene, Yonatane, 33 Shama Moharari, Ahiame mwana ya Sharare Moharari, 34 Elifelete mwana ya Ahasebai, mwana ya Momaakate, Eliame mwana ya Ahitofele+ moto ya Gilo, 35 Hezero moto ya Karamele, Paarai moto ya Arbe, 36 Yigale mwana ya Natane moto ya Soba, Bani moto ya Gade, 37 Zeleke Moamone, Naharai Mobeerote, momemi-bibundeli ya Yoabe mwana ya Zeruya, 38 Ira Moyitri, Garebe Moyitri,+ 39 mpe Uriya+ Mohiti. Bango nyonso 37.