Epai ya Baroma
3 Bongo Moyuda azali na litomba nini, to ntina ya kokatama ngenga ezali nini? 2 Aleki na makambo nyonso mpenza. Libosoliboso, mpo bapesaki bango maloba mosantu ya Nzambe.+ 3 Sikoyo tóloba nini? Soki Bayuda mosusu bazangaki kondima, kozanga kondima na bango ekosilisa nde bosembo ya Nzambe? 4 Ata moke te! Kasi tiká emonana ete Nzambe alobaka solo,+ ata soki moto nyonso alobaka lokuta,+ kaka ndenge ekomamá ete: “Mpo yo omonana sembo na maloba na yo mpe olonga ntango bazali kosambisa yo.”+ 5 Nzokande, soki kozanga bosembo na biso emonisi polele bosembo ya Nzambe, tokoloba nini? Nzambe azangi nde bosembo ntango azali komonisa nkanda na ye? (Nazali koloba ndenge moto alobaka.) 6 Ata moke te! Soki bongo, Nzambe akosambisa mokili ndenge nini?+
7 Kasi soki mpo na lokuta na ngai solo ya Nzambe emonani polele lisusu mpo na nkembo na ye, mpo na nini sikoyo bakweisi ngai na likambo ete nazali mosumuki? 8 Mpe mpo na nini tóloba te, ndenge bato mosusu bakoselaka biso ete biso tolobaka: “Tiká tósala mabe mpo ebota makambo ya malamu”? Bato wana bakozwa etumbu oyo eyokani na bosembo.+
9 Sikoyo tóloba nini? Biso nde tozali na esika oyo eleki malamu? Te! Mpo liboso tomonisaki polele ete Bayuda ná Bagrɛki bango nyonso bazali basumuki;+ 10 kaka ndenge ekomamá ete: “Moto ya sembo* azali te, ata moto moko te;+ 11 ata moto moko te azali na mayele ya kososola, ata moto moko te azali koluka Nzambe. 12 Bato nyonso batiki nzela ya malamu, bango nyonso bakómi mpamba; ata moto moko te azali komonisa boboto, ata moto moko te.”+ 13 “Mongongo na bango ezali lilita ya polele; basalelaki bokosi na lolemo na bango.”+ “Ngɛngɛ ya banyoka ezali na nse ya mbɛbu na bango.”+ 14 “Mpe monɔkɔ na bango etondi na elakeli mabe mpe na maloba mabe.”+ 15 “Makolo na bango ekendaka mbangu kosopa makila.”+ 16 “Babimiselaka bato ntango nyonso libebi mpe banyokolaka bango, 17 mpe bayebi nzela ya kimya te.”+ 18 “Babangaka Nzambe te.”+
19 Nzokande toyebi ete makambo nyonso oyo Mibeko ezali koloba elobi yango epai ya baoyo bazali na Mibeko, mpo monɔkɔ nyonso ekangama mpe mokili mobimba ezwa etumbu ya Nzambe.+ 20 Yango wana, moto* moko te akotángama moto ya sembo* liboso na ye na misala ya mibeko,+ mpo na nzela ya mibeko nde lisumu eyebani malamumalamu.+
21 Kasi sikoyo lokola mibeko ezali te, bosembo ya Nzambe emonisami polele,+ ndenge Mibeko mpe Basakoli batatoli mpo na yango,+ 22 ɛɛ, bosembo ya Nzambe na nzela ya kondimela Yesu Kristo, mpo na bato nyonso oyo bazali na kondima. Mpo bokeseni ezali te.+ 23 Mpo bato nyonso basali lisumu mpe bakómaka na nkembo ya Nzambe te,+ 24 mpe ezali lokola nde bazwi likabo ya ofele+ na ndenge bazali kotángama bato ya sembo* na boboto monene na ye,+ na kosikolama oyo basikolami na nzela ya lisiko oyo Kristo Yesu afutaki.+ 25 Nzambe akabaki ye azala likabo ya kozongisa boyokani*+ na nzela ya kondima na makila na ye.+ Asalaki bongo mpo na kolakisa bosembo* na ye moko, mpo Nzambe, na ezaleli na ye ya kokanga motema* azalaki kolimbisa masumu oyo esalemaki kala. 26 Asalaki bongo mpo na kolakisa bosembo na ye moko+ na eleko oyo, mpo azala moto ya sembo ata ntango azali kotánga moto oyo andimelaka Yesu ete azali moto ya sembo.+
27 Bongo, ntina ya komikumisa ezali wapi? Ezali te. Komikumisa mpo na mobeko nini? Oyo ya misala?+ Te, kasi mpo na mobeko ya kondima. 28 Mpo tomoni ete moto atángamaka moto ya sembo na kondima kasi na misala ya mibeko te.+ 29 To ye azali kaka Nzambe ya Bayuda?+ Azali mpe ya bato ya bikólo te?+ Ɛɛ, ya bato ya bikólo mpe.+ 30 Lokola Nzambe azali kaka moko,+ akotánga bato oyo bakatamá ngenga bato ya sembo+ mpo na kondima; mpe akotánga bato oyo bakatamá ngenga te bato ya sembo+ na nzela ya kondima na bango. 31 Sikoyo, tozali nde kolongola mibeko na kondima na biso? Te, ata moke te! Kutu, tozali nde kolongisa mibeko.+