Mokanda ya mibale ya Ntango

27 Yotame+ azalaki na mbula 25 ntango akómaki mokonzi, mpe ayangelaki mbula 16 na Yerusaleme. Nkombo ya mama na ye ezalaki Yerusha mwana ya Zadoke.+ 2 Yotame akobaki kosala makambo oyo ezali malamu na miso ya Yehova, kaka ndenge tata na ye Uzia asalaki.+ Nzokande, ye akɔtaki na tempelo ya Yehova te.+ Kasi, bato bazalaki kaka kosala makambo ya mabe. 3 Yotame moto atongaki porte ya likoló ya ndako ya Yehova,+ mpe asalaki misala mingi ya botongi na efelo ya Ofɛlɛ.+ 4 Atongaki mpe bingumba+ na etúká ya ngombangomba ya Yuda,+ ná bisika oyo ebatelami makasi+ mpe manɔ́ngi+ na bazamba. 5 Abundisaki mokonzi ya Baamone+ mpe nsukansuka alongaki bango, yango wana na mbula wana Baamone bapesaki ye talanta* 100 ya palata, korosi* 10 000 ya blé mpe 10 000 ya ɔrje. Baamone bafutaki ye lisusu biloko yango na mbula ya mibale mpe na mbula ya misato.+ 6 Na ndenge yango, Yotame azalaki se kokóma makasi, mpo azalaki na ekateli ya kosala makambo oyo Yehova Nzambe na ye azalaki kosɛnga.*

7 Makambo mosusu ya lisolo ya Yotame, bitumba nyonso oyo abundaki mpe makambo oyo asalaki, ekomami na Buku ya Bakonzi ya Yisraele mpe ya Yuda.+ 8 Azalaki na mbula 25 ntango akómaki mokonzi, mpe ayangelaki mbula 16 na Yerusaleme.+ 9 Na nsima, Yotame akufaki,* mpe bakundaki ye na Sité ya Davidi.+ Mpe mwana na ye Ahaze akómaki mokonzi na esika na ye.+