Yosua

13 Yosua akómaki mobange mpe mbula na ye epusanaki.+ Bongo Yehova alobaki na ye: “Okómi mobange mpe mbula na yo epusani; kasi mokili oyo bosengeli kozwa etikali naino monene mpenza. 2 Talá mokili oyo etikali:+ bitúká nyonso ya Bafilistia mpe ya Bageshure+ nyonso 3 (banda na lobɔkɔ ya Nile* oyo ezali na ɛsti* ya Ezipito, matá tii na ndelo ya Ekrone na nɔrdi, oyo eyebanaki lokola teritware ya Bakanana),+ ezala mpe mokili ya bankolo mitano ya Bafilistia,+ elingi koloba Gaza, Ashedode,+ Ashekelone,+ Gate,+ mpe Ekrone+ mpe mokili ya Baavime+ 4 na sudi. Etikali mpe: mokili mobimba ya Bakanana; Meara ya Basidone,+ tii na Afeke, pene na ndelo ya Baamore; 5 mokili ya bato ya Gebale+ mpe Liban mobimba na ɛsti, banda na Baala-gade na nse ya Ngomba Heremone tii na Lebo-hamate.*+ 6 Bakisa mpe bitúká nyonso ya ngombangomba, banda na Liban+ tii na Misirefote-maime,+ mpe mokili nyonso ya Basidone.+ Nakobengana* bango liboso ya Bayisraele.+ Nde yo, okokabolela yango Bayisraele lokola libula, kaka ndenge napesaki yo mitindo.+ 7 Sikoyo, osengeli kokabola mokili yango na mabota libwa mpe na ndambo ya libota ya Manase.”+

8 Elongo na ndambo mosusu ya libota ya Manase, Barubene ná Bagade bazwaki libula na bango, teritware oyo Moize apesaki bango na ngámbo ya ɛsti ya Yordani, ndenge kaka Moize mosaleli ya Yehova apesaki bango:+ 9 banda na Aroere,+ oyo ezali pembenipembeni ya Lobwaku* ya Arnone,+ mpe engumba oyo ezali na katikati ya lobwaku yango, mpe ngomba patatalu ya Medeba tii na Dibone; 10 bingumba nyonso ya Mokonzi Sihone ya Baamore, oyo azalaki koyangela na Heshibone, matá tii na ndelo ya Baamone;+ 11 bakisa mpe Gileade, mpe teritware ya Bageshure, Bamaakate,+ Ngomba Heremone mobimba mpe Bashane+ mobimba tii na Saleka;+ 12 teritware mobimba ya bokonzi ya Oge na Bashane, oyo azalaki koyangela na Ashetarote mpe na Edrei. (Azalaki moko ya bato ya nsuka ya Barefaime.)+ Moize alongaki bango mpe abenganaki bango na mokili yango.*+ 13 Nzokande, Bayisraele babenganaki te+ Bageshure mpe Bamaakate,* mpo bato ya Geshure ná bato ya Maakate bazali kofanda na kati ya Yisraele tii na mokolo ya lelo.

14 Kaka libota ya Balevi nde Moize apesaki libula te.+ Makabo oyo batumbeli Yehova Nzambe ya Yisraele na mɔtɔ nde ezali libula na bango,+ kaka ndenge alakaki bango.+

15 Bongo, Moize apesaki libota ya Barubene libula, na kolanda mabota na bango, 16 mpe teritware na bango ezalaki banda na Aroere, oyo ezali pembenipembeni ya Lobwaku* ya Arnone bakisa mpe engumba oyo ezali na katikati ya lobwaku yango mpe ngomba patatalu nyonso pene na Medeba; 17 Heshibone mpe basité na yango nyonso+ oyo ezali na ngomba patatalu: Dibone, Bamote-baala, Bete-baala-meone,+ 18 Yahaze,+ Kedemote,+ Mefaate,+ 19 Kiriataime, Sibima+ ná Zerete-shahare oyo ezali na ngomba ya lobwaku, 20 Bete-peore, bisika oyo ngomba ya Pisga ekitá,+ Bete-yeshimote,+ 21 bingumba nyonso ya ngomba patatalu, mpe teritware mobimba ya Mokonzi Sihone ya Baamore, oyo azalaki koyangela na Heshibone.+ Moize alongaki mokonzi yango,+ ezala mpe bankumu ya Midiane: Evi, Rekeme, Zure, Hure, ná Reba;+ bankumu yango bazalaki na nse ya bokonzi ya Sihone, mpe bazalaki kofanda na mokili yango. 22 Balaama,+ mwana ya Beore, mosakoli ya makambo oyo ebombaná,+ azalaki moko ya bato oyo Bayisraele babomaki na mopanga. 23 Ndelo ya teritware ya Barubene ezalaki Yordani; mpe teritware yango ezalaki libula ya Barubene, na kolanda mabota na bango, ná bingumba mpe bamboka na yango.

24 Lisusu, Moize apesaki libota ya Gade libula, Bagade na kolanda mabota na bango, 25 mpe teritware na bango ezalaki Yazere+ ná bingumba nyonso ya Gileade mpe ndambo ya mokili ya Baamone+ tii na Aroere, oyo etalani na Raba;+ 26 mpe banda na Heshibone+ tii na Ramate-mizipe mpe Betonime mpe banda na Mahanaime+ tii na ndelo ya Debire; 27 mpe na lobwaku,* Bete-harame, Bete-nimira,+ Sukote,+ ná Zafone, ndambo oyo etikalaki ya teritware ya bokonzi ya Mokonzi Sihone ya Heshibone.+ Ndelo ya teritware yango ezalaki na ɛsti ya Yordani, matá tii na sudi ya Mbu ya Kinerete.*+ 28 Wana nde ezalaki libula ya Bagade, na kolanda mabota na bango, ná bingumba mpe bamboka na yango.

29 Na nsima, Moize apesaki ndambo ya libota ya Manase libula, mpe yango ekómaki libula na bango mpe ya mabota na bango.+ 30 Mpe teritware na bango ebandaki na Mahanaime+ mpe ezwaki Bashane mobimba, mpe teritware mobimba ya bokonzi ya Mokonzi Oge ya Bashane, mpe bamboka nyonso ya Yaire*+ na Bashane. Teritware yango ezalaki na basité 60. 31 Mpe ndambo ya Gileade, mpe Ashetarote mpe Edrei,+ bingumba ya teritware ya bokonzi ya Oge na Bashane, ekendaki epai ya bana ya Makire,+ mwana ya Manase, elingi koloba epai ya ndambo ya bana ya Makire, na kolanda mabota na bango.

32 Wana nde bateritware oyo Moize apesaki bango na mokili patatalu oyo ekauká ya Moabe na ngámbo ya Yordani, na ɛsti ya Yeriko.+

33 Kasi Moize apesaki libota ya Balevi libula te.+ Yehova, Nzambe ya Yisraele, nde libula na bango, kaka ndenge alakaki bango.+