Kobima

39 Na nsinga ya bulé, na lɛnɛ oyo epakolami langi ya mwa motane-bulé mpe na biloko oyo epakolami langi ya motane makasi,+ batongaki bilamba kitoko mpo na kosala mosala na esika mosantu. Basalelaki Arona bilamba mosantu,+ kaka ndenge Yehova apesaki Moize mitindo.

2 Asalaki efode+ ya wolo, nsinga ya bulé, lɛnɛ oyo epakolami langi ya mwa motane-bulé, biloko oyo epakolami langi ya motane makasi mpe lini ya kitoko oyo elíngamalíngamá. 3 Batutaki na marto manzanza ya wolo mpo na kokómisa yango nkasa mikemike ya papala, mpe akataki yango na bansinga mpo na kolita yango na nsinga ya bulé, na lɛnɛ oyo epakolami langi ya mwa motane-bulé, na biloko oyo epakolami langi ya motane makasi mpe na lini ya kitoko; efode eyemamaki na bansinga yango. 4 Basalelaki yango biteni ya elamba ya mapeka oyo bakangisaki na bansuka na yango mibale. 5 Mpe nkamba oyo batongi, oyo ekangamaki na efode mpo efanda malamu,+ esalemaki na biloko ndenge moko na oyo basalaki na yango efode: wolo, nsinga ya bulé, lɛnɛ oyo epakolami langi ya mwa motane-bulé, nsinga oyo epakolami langi ya motane makasi mpe lini ya kitoko oyo elíngamalíngamá, kaka ndenge Yehova apesaki Moize mitindo.

6 Na nsima batyaki mabanga ya onikisi na mpɛtɛ ya wolo oyo ezali na mapeka, mpe bakomaki bankombo ya bana ya Yisraele na mabanga yango oyo bakataki makomi na yango kokata, kaka ndenge ezalaka na kashɛ.+ 7 Atyaki yango likoló ya biteni ya elamba ya mapeka ya efode lokola mabanga ya ekaniseli mpo na bana ya Yisraele,+ kaka ndenge Yehova apesaki Moize mitindo. 8 Na nsima asalaki libenga ya ntolo,+ mosala ya moto oyo asalaka mayemi na bansinga, kaka na biloko oyo basalaki na yango efode: wolo, nsinga ya bulé, lɛnɛ oyo epakolami langi ya mwa motane-bulé, nsinga oyo epakolami langi ya motane makasi mpe lini ya kitoko oyo elíngamalíngamá.+ 9 Yango ezalaki karé ntango egumbami na mibale. Basalaki libenga ya ntolo, na yango ntango egumbami na mibale, ezalaki zerete* moko na molai mpe zerete moko na monene. 10 Batyaki milɔngɔ minei ya mabanga. Molɔngɔ ya liboso ezalaki rubi, topazi ná emerode. 11 Molɔngɔ ya mibale ezalaki tirikwaze, safire ná jasipe. 12 Molɔngɔ ya misato ezalaki libanga ya leshɛmɛ,* agate ná ametiste. 13 Mpe molɔngɔ ya minei ezalaki krizolite, onikisi ná jade. Yango ebongisamaki na esika ya mpɛtɛ ya wolo oyo ezali na mapeka. 14 Mabanga yango ezalaki na bankombo 12 ya bana ya Yisraele, mpe bankombo yango ezalaki na makomi oyo bakati kokata ndenge ezalaka na kashɛ, mokomoko na yango emonisaki libota moko kati na mabota 12.

15 Bongo basalaki na libenga ya ntolo minyɔlɔlɔ oyo balitalitá, lokola bansinga ya wolo ya pɛto.+ 16 Mpe basalaki bikangeli mibale ya wolo oyo ezali na mapeka ná mpɛtɛ mibale ya wolo, mpe bakangisaki mpɛtɛ yango mibale na nsuka mibale ya libenga ya ntolo. 17 Nsima na yango balekisaki bansinga mibale ya wolo na kati ya mpɛtɛ mibale na bansuka ya libenga ya ntolo. 18 Na nsima, balekisaki bansuka mibale ya bansinga yango mibale na mpɛtɛ mibale oyo ezali na mapeka mpe bakangisaki yango na biteni ya elamba ya mapeka, liboso ya efode. 19 Lisusu, basalaki mpɛtɛ mibale ya wolo mpe batyaki yango na kati ya bansuka mibale ya libenga ya ntolo, na ngámbo oyo etali efode.+ 20 Na nsima basalaki mpɛtɛ mosusu mibale ya wolo mpe batyaki yango liboso ya efode, na nse ya biteni mibale ya elamba ya mapeka, pene na likoló ya esika nkamba oyo batongi ekutani na efode. 21 Nsukansuka, bakangisaki nsinga ya bulé na mpɛtɛ ya libenga ya ntolo tii na mpɛtɛ ya efode, mpo libenga ya ntolo efanda malamu na efode, likoló ya nkamba oyo batongi, kaka ndenge Yehova apesaki Moize mitindo.

22 Na nsima asalaki kazaka ezangá mabɔkɔ ya kolata na nse ya efode, kaka ndenge mosali-bilamba alítaka bilamba, nyonso na nsinga ya bulé.+ 23 Nkingo ya kazaka ezangá mabɔkɔ ezalaki na katikati na yango, lokola nkingo ya kazaka ya bibende. Nkingo na yango ezalaki na ndelo zingazinga, mpo epasuka te. 24 Na nsima basalaki na ndelo ya kazaka ezangá mabɔkɔ bambuma ya grenade ya nsinga ya bulé, lɛnɛ oyo epakolami langi ya mwa motane-bulé, mpe nsinga oyo epakolami langi ya motane makasi, oyo elíngamalíngamá esika moko. 25 Mpe basalaki bangonga mikemike ya wolo ya pɛto mpe batyaki bangonga yango kati na bambuma ya grenade zingazinga nyonso ya ndelo ya nse ya kazaka ezangá mabɔkɔ, kati na bambuma ya grenade; 26 ngonga moko ya moke ná mbuma ya grenade moko, ngonga moko ya moke ná mbuma ya grenade moko na ndelo ya nse ya kazaka ezangá mabɔkɔ, zingazinga na yango nyonso oyo esalelamaki mpo na mosala, kaka ndenge Yehova apesaki Moize mitindo.

27 Mpe basalelaki Arona ná bana na ye ya mibali bazambala ya lini ya kitoko, oyo etongamaki na mosali-bilamba,+ 28 ná tirba+ ya lini ya kitoko, biloko ya kolata na motó oyo ebongisaka nzoto,+ oyo esalemi na lini ya kitoko, bakupe* ya lini+ oyo esalemi na lini ya kitoko oyo elíngamalíngamá, 29 ná elamba ya kokangisa na loketo ya lini ya kitoko oyo elíngamalíngamá, na nsinga ya bulé, na lɛnɛ oyo epakolami langi ya mwa motane-bulé, mpe na biloko oyo epakolami langi ya motane makasi, oyo batongi yango esika moko, kaka ndenge Yehova apesaki Moize mitindo.

30 Nsukansuka, basalaki linzanza ya kongɛnga, elembo mosantu ya komipesa na Nzambe,* na wolo ya pɛto mpe bakomaki likoló na yango likomi moko oyo bakati kokata ndenge ezalaka na kashɛ: “Bosantu ezali ya Yehova.”+ 31 Bakangisaki yango na nsinga ya bulé mpo na kotya yango ezala likoló ya tirba, kaka ndenge Yehova apesaki Moize mitindo.

32 Na yango, mosala nyonso ya tabernakle, hema ya kokutana, esilaki mpe Bayisraele basalaki nyonso oyo Yehova apesaki Moize mitindo.+ Basalaki kaka bongo.

33 Bongo bamemelaki Moize tabernakle,+ hema+ ná bisaleli na yango nyonso: bakroshɛ na yango,+ bakadrɛ na yango,+ bikangiseli na yango+ ná makonzí na yango ná bitɛlɛmiselo na yango oyo ezali na mabulu,+ 34 ezipeli na yango oyo esalemi na mposo ya mpate-mobali, oyo epakolami langi ya motane,+ ezipeli na yango oyo esalemi na mposo ya nyama ebengami fɔkɛ, rido mpo na elamba ya kozipa,+ 35 sanduku ya Litatoli, banzete ya komema yango+ ná ezipeli,+ 36 mesa, bisaleli na yango nyonso+ ná mampa ya kolakisa; 37 etɛlɛmiselo ya miinda na wolo ya pɛto, miinda na yango,+ molɔngɔ ya miinda, ná bisaleli na yango nyonso+ ná mafuta mpo na kongɛngisa,+ 38 etumbelo+ ya wolo, mafuta mosantu,+ mpaka ya malasi ya nsolo kitoko,+ elamba ya kozipa*+ mpo na monɔkɔ ya hema; 39 etumbelo ya kwivre+ ná motalaka na yango ya kwivre, banzete ya komema yango,+ bisaleli na yango nyonso,+ saani monene ná etɛlɛmiselo na yango;+ 40 barido ya lopango, makonzí na yango, bitɛlɛmiselo na yango oyo ezali na mabulu,+ elamba ya kozipa*+ mpo na monɔkɔ ya lopango, bansinga na yango ná bapike na yango+ ná bisaleli nyonso mpo na mosala ya tabernakle, mpo na hema ya kokutana; 41 bilamba kitoko oyo batongi mpo na kosala mosala na esika mosantu, bilamba mosantu mpo na Arona nganga-nzambe,+ mpe bilamba ya bana na ye ya mibali mpo na kosala mosala ya banganga-nzambe.

42 Bayisraele basalaki mosala nyonso na kolanda mitindo nyonso oyo Yehova apesaki Moize.+ 43 Ntango Moize atalaki mosala nyonso, amonaki ete basalaki yango kaka ndenge Yehova apesaki mitindo; mpe Moize apambolaki bango.