Mokanda ya mibale ya Ntango

26 Na nsima bato nyonso ya Yuda bazwaki Uzia,+ oyo azalaki na mbula 16, mpe batyaki ye mokonzi na esika ya tata na ye Amazia.+ 2 Ye atongaki lisusu engumba Elote+ mpe azongiselaki yango Yuda, wana mokonzi* asilaki kokufa.*+ 3 Uzia+ azalaki na mbula 16 ntango akómaki mokonzi, mpe ayangelaki mbula 52 na Yerusaleme. Nkombo ya mama na ye ezalaki Yekolia, moto ya Yerusaleme.+ 4 Uzia akobaki kosala makambo oyo ezali malamu na miso ya Yehova, kaka ndenge tata na ye Amazia asalaki.+ 5 Mpe akobaki koluka Nzambe na mikolo nyonso ya Zekaria, oyo ateyaki ye ndenge ya kobanga Nzambe ya solo. Ntango nyonso oyo azalaki koluka Yehova, Nzambe ya solo asalaki ete makambo na ye etambola malamu.+

6 Akendaki kobundisa Bafilistia+ mpe afungolaki nzela na efelo ya Gate,+ na efelo ya Yabene+ mpe na efelo ya Ashedode.+ Na nsima atongaki bingumba na teritware ya Ashedode mpe epai ya Bafilistia. 7 Nzambe ya solo azalaki kosalisa ye na bitumba elongo na Bafilistia, na Baarabe+ oyo bazalaki kofanda na Gurebaala, mpe na Bameunime. 8 Baamone+ babandaki kofuta Uzia mpako. Nsukansuka, nsango ya lokumu na ye ekendaki tii na Ezipito, mpo akómaki na nguya mingi mpenza. 9 Lisusu, Uzia atongaki manɔ́ngi+ na Yerusaleme, pene na Porte ya Litumu,+ pene na Porte ya Lobwaku+ mpe pene na likonzí oyo esimbi efelo, mpe akómisaki yango makasi. 10 Atongaki mpe manɔ́ngi+ na esobe, mpe atimolaki* mabulu ebele ya kobomba mai (mpo azalaki na bibwɛlɛ ebele), asalaki mpe bongo na Shefela mpe na mokili patatalu.* Azalaki na baloni-bilanga mpe basali-bilanga ya vinyo na bangomba mpe na Karamele, mpo alingaki mosala ya bilanga.

11 Longola yango, Uzia akómaki na limpinga oyo ezalaki na bibundeli mpo na etumba. Basoda yango bazalaki kokende na bitumba, babongisami na bituluku. Sɛkrɛtɛrɛ+ Yeyele mpe mokambi Maaseya nde bazwaki motángo na bango mpe bakomaki bankombo na bango+ na litambwisi ya Hanania, moko ya bankumu ya mokonzi. 12 Motángo mobimba ya bankumu ya mabota ya batata oyo bazalaki kokamba bilombe yango ya etumba ezalaki 2 600. 13 Bazalaki kokamba limpinga ya basoda 307 500, mibali oyo babongisami mpo na etumba, limpinga ya basoda ya makasi oyo bazalaki kosalisa mokonzi atɛmɛla banguna.+ 14 Uzia apesaki limpinga mobimba banguba, makɔnga,+ bikɔti, bakazaka ya ebende,+ matimbo mpe mabanga oyo babwakaka na lansi.+ 15 Na Yerusaleme, Uzia asalisaki mpe bamasini ya etumba oyo bato ya mayele babimisaki. Batyaki yango likoló ya manɔ́ngi+ mpe likoló ya matumu ya bifelo, mpe ekokaki kobwaka makula mpe mabanga ya minene. Yango wana nsango na ye ekendaki mosika, mpo azwaki lisalisi mingi mpe akómaki makasi.

16 Kasi, ntango kaka akómaki makasi, motema na ye ekómaki na lolendo mpe yango ememelaki ye libebi. Bongo azangaki bosembo epai ya Yehova Nzambe na ye na ndenge akɔtaki na tempelo ya Yehova mpo na kotumba mpaka ya malasi likoló ya etumbelo ya mpaka ya malasi.+ 17 Na mbala moko, nganga-nzambe Azaria mpe banganga-nzambe mosusu ya Yehova 80 oyo bazalaki na mpiko, bakɔtaki nsima na ye. 18 Batɛmɛlaki mokonzi Uzia mpe balobaki na ye: “Uzia, ebongi te ete yo otumbela Yehova mpaka ya malasi.+ Ezali kaka banganga-nzambe nde basengeli kotumba mpaka ya malasi mpo bazali bakitani ya Arona,+ oyo basantisamá. Bimá na esika mosantu; mpo ozangi bosembo, mpe Yehova Nzambe akopesa yo ata nkembo moko te mpo na likambo yango.”

19 Kasi Uzia, oyo asimbaki eloko oyo batyelaka mpaka ya malasi mpo na kotumba mpaka ya malasi, asilikaki,+ mpe wana azalaki kosilikela banganga-nzambe, maladi ya maba+ ebimaki ye na elongi, liboso ya banganga-nzambe na ndako ya Yehova, pembeni ya etumbelo ya mpaka ya malasi. 20 Ntango Azaria nganga-nzambe mokonzi mpe banganga-nzambe nyonso batalaki ye, bamonaki ete azwi maladi ya maba na elongi. Na yango babimisaki ye nokinoki libándá, mpe ye moko asalaki nokinoki mpo na kobima, mpo Yehova apesaki ye etumbu.

21 Mokonzi Uzia atikalaki moto ya maba tii mokolo ya liwa na ye; azalaki kofanda ye moko na ndako mosusu, mpo lokola azalaki moto ya maba,+ azalaki na lotomo ya kokende na ndako ya Yehova te. Mwana na ye Yotame azalaki kokamba ndako ya mokonzi mpe kosambisa bato ya ekólo.+

22 Makambo mosusu ya lisolo ya Uzia, banda na ebandeli tii na nsuka, mosakoli Yisaya+ mwana ya Amoze akomaki yango. 23 Na nsima, Uzia akufaki;* mpe bakundaki ye esika moko na bankɔkɔ na ye, kasi bakundaki ye nde na mabele pene na malita ya bakonzi, mpo balobaki ete: “Azali moto ya maba.” Mpe mwana na ye Yotame+ akómaki mokonzi na esika na ye.