Mokanda ya mibale ya Ntango

28 Ahaze+ azalaki na mbula 20 ntango akómaki mokonzi, mpe ayangelaki mbula 16 na Yerusaleme. Asalaki te makambo oyo ezali malamu na miso ya Yehova ndenge nkɔkɔ na ye Davidi asalaki.+ 2 Kutu alandaki ndakisa mabe ya* bakonzi ya Yisraele,+ mpe asalaki bikeko ya Babaala na ebende.*+ 3 Lisusu amatisaki milinga ya mbeka na Lobwaku ya mwana ya Hinome* mpe atumbaki bana na ye moko na mɔtɔ,+ amekolaki makambo oyo eyinamá ya bikólo+ oyo Yehova abenganaki na mokili na bango mpo na kopesa yango Bayisraele. 4 Azalaki mpe kopesa bambeka mpe komatisa milinga ya mbeka na bisika oyo etombwaná,+ na bangomba mike mpe na nse ya nzete nyonso oyo etondi na nkasa.+

5 Na yango Yehova Nzambe na ye apesaki ye na lobɔkɔ ya mokonzi ya Siri,+ bongo bato ya Siri balongaki ye; bakangaki bato ebele mpenza mpe bamemaki bango na Damasi.+ Ahaze apesamaki mpe na lobɔkɔ ya mokonzi ya Yisraele, oyo alongaki ye mabe mpenza. 6 Mpo Peka+ mwana ya Remalia abomaki na mokolo moko bato 120 000 na Yuda, bango nyonso mibali ya mpiko, mpo bato ya Yuda basundolaki Yehova Nzambe ya bankɔkɔ na bango.+ 7 Mpe Zikri, mobundi-bitumba moko ya Efraime abomaki Maaseya mwana ya mokonzi, ná Azirikame oyo azalaki mokambi ya ndako ya mokonzi mpe Elekana, oyo azalaki moto ya mibale nsima ya mokonzi. 8 Lisusu, Bayisraele bakangaki bato 200 000 na Yuda: basi, bana mibali mpe bana basi; bapunzaki mpe biloko ebele mpe bamemaki yango na Samaria.+

9 Kasi mosakoli moko ya Yehova na nkombo Odede azalaki kuna. Abimaki mpo na kokutana na basoda oyo bazalaki koya na Samaria mpe alobaki na bango: “Bóyoka! Yehova Nzambe ya bankɔkɔ na bino ayokelaki bato ya Yuda nkanda yango wana apesaki bango na lobɔkɔ na bino;+ mpe bino bobomi bango na nkanda makasi oyo ekómi tii na likoló. 10 Mpe sikoyo bolingi kokómisa bato ya Yuda mpe ya Yerusaleme basaleli na bino ya mibali mpe basaleli na bino ya basi.+ Atako bongo, bino moko bozangi nde ngambo na miso ya Yehova Nzambe na bino? 11 Sikoyo bóyoka ngai, mpe bózongisa bato oyo bozwaki lokola bakangami epai ya bandeko na bino, mpo nkanda ya Yehova engaleli bino makasi.”

12 Bongo bankumu mosusu ya Baefraime, Azaria mwana ya Yehohanane, Berekia mwana ya Meshilemote, Yehizikiya mwana ya Shalume mpe Amasa mwana ya Hadalai, batɛmɛlaki baoyo bautaki na etumba yango, 13 mpe balobaki na bango: “Bókɔtisa bato oyo bokangi awa te, mpo yango ekomemisa biso ngambo epai ya Yehova. Likambo oyo bolingi kosala ekobakisela biso masumu mpe ngambo, mpo ngambo oyo tozalaka na yango ezali monene, mpe nkanda ya Nzambe ezali kongalela Yisraele.” 14 Bongo basoda oyo bazalaki na bibundeli bapesaki bato oyo bakangaki mpe biloko oyo bazwaki,+ na mabɔkɔ ya bankumu mpe ya bato nyonso oyo bayanganaki. 15 Na nsima mibali oyo batángamaki nkombo batɛlɛmaki mpe bazwaki bakangami; bapesaki baoyo nyonso bazalaki bolumbu bilamba oyo eutaki na biloko oyo epunzamaki na etumba. Na yango, balatisaki bango mpe bapesaki bango basandale, bapesaki bango eloko ya kolya mpe ya komɛla, mpe mafuta mpo na loposo na bango. Lisusu, baoyo bazalaki na bolɛmbu, batyaki bango likoló ya bampunda mpe bamemaki bango epai ya bandeko na bango na Yeriko, engumba ya banzete ya mbila. Na nsima, bazongaki na Samaria.

16 Na ntango yango, mokonzi Ahaze asɛngaki bakonzi ya Asiri lisalisi.+ 17 Mpe Baedome bayaki lisusu, babundisaki Yuda mpe bamemaki bato bakangami. 18 Bafilistia+ mpe bayaki kobundisa bingumba ya Shefela+ mpe ya Negebe ya Yuda, mpe bazwaki Bete-shemeshe,+ Aiyalone,+ Gederote, Soko ná basité oyo esimbami na yango,* Timina+ ná basité oyo esimbami na yango mpe Gimizo ná basité oyo esimbami na yango; mpe bakómaki kofanda kuna. 19 Yehova ayokisaki Yuda nsɔni likoló ya Ahaze mokonzi ya Yisraele, mpo atikaki Yuda esala makambo kozanga komipekisa, mpe yango esalaki ete bázanga mpenza bosembo epai ya Yehova.

20 Nsukansuka Tilgate-pilinesere+ mokonzi ya Asiri ayaki kobundisa ye. Apesaki ye mpasi+ na esika ya kosalisa ye. 21 Mpo Ahaze asilaki kolongola biloko ya ndako ya Yehova mpe ya ndako ya mokonzi+ mpe ya bandako ya bankumu, mpe akabelaki yango mokonzi ya Asiri; kasi esalisaki ye ata moke te. 22 Mpe na kati ya mpasi na ye, Mokonzi Ahaze azangaki bosembo epai ya Yehova lisusu mingi koleka. 23 Abandaki kopesa mbeka na banzambe ya Damasi+ oyo balongaki ye,+ mpe alobaki: “Lokola banzambe ya bakonzi ya Siri bazali kosalisa bango, nakopesa bango mbeka, mpo básalisa mpe ngai.”+ Kasi basalaki ete ye ná Yisraele mobimba bákwea. 24 Lisusu, Ahaze asangisaki bisaleli ya ndako ya Nzambe ya solo; na nsima abukaki mikemike bisaleli ya ndako ya Nzambe ya solo.+ Akangaki baporte ya ndako ya Yehova,+ mpe amisalelaki bitumbelo na esika nyonso oyo balabala ekutani na Yerusaleme. 25 Mpe na bingumba nyonso ya Yuda, asalaki bisika oyo etombwaná mpo na komatisela banzambe mosusu milinga ya bambeka,+ mpe apesaki Yehova Nzambe ya bankɔkɔ na ye nkanda.

26 Makambo mosusu ya lisolo ya Ahaze ná nyonso oyo asalaki, banda na ebandeli tii na nsuka, ekomami na Buku ya Bakonzi ya Yuda mpe ya Yisraele.+ 27 Na nsima, Ahaze akufaki* mpe bakundaki ye na engumba, na Yerusaleme, mpo batyaki ye na malita ya bakonzi ya Yisraele te,+ mpe mwana na ye Ezekiasi akómaki mokonzi na esika na ye.