Yisaya
39 Na ntango yango, mokonzi ya Babilone, Merodake-baladane mwana ya Baladane atindelaki Ezekiasi+ mikanda ná likabo, mpo ayokaki ete Ezekiasi abɛlaki, mpe na nsima abikaki.+ 2 Ezekiasi ayambaki bango na esengo* mpe alakisaki bango ndako oyo abombaka biloko na ye ya motuya:+ palata, wolo, mafuta ya balsame, mafuta mosusu ya kitoko, ebombelo mobimba ya bibundeli na ye ná eloko nyonso oyo ezalaki na bisika na ye ya kobomba biloko ya motuya. Ezekiasi alakisaki bango biloko nyonso oyo ezalaki na ndako na ye mpe na boyangeli na ye mobimba, abombelaki bango ata eloko moko te.
3 Nsima na yango, mosakoli Yisaya ayaki epai ya Mokonzi Ezekiasi mpe atunaki ye: “Bato oyo bayebisi yo nini, mpe bauti wapi?” Bongo Ezekiasi ayanolaki ete: “Bauti na mokili moko mosika, na Babilone.”+ 4 Mpe Yisaya atunaki: “Bamoni nini na ndako na yo?”* Ezekiasi ayanolaki: “Bamoni biloko nyonso oyo ezali na ndako na ngai.* Nalakisi bango biloko nyonso oyo ezali na bisika na ngai ya kobomba biloko ya motuya.”
5 Sikoyo Yisaya alobaki na Ezekiasi boye: “Yoká liloba ya Yehova ya mampinga: 6 ‘Talá! Mikolo ezali koya, eloko nyonso oyo ezali na kati ya ndako na yo mpe nyonso oyo bankɔkɔ na yo babombaki tii na mokolo ya lelo ekokende na Babilone. Eloko moko te ekotikala,’+ Yehova alobi bongo.+ 7 ‘Mpe bana na yo mosusu, baoyo okobota, bakozwa bango mpe bakokóma bakapita na ndako monene ya mokonzi ya Babilone.’”+
8 Na yango, Ezekiasi alobaki na Yisaya ete: “Liloba ya Yehova oyo olobi ezali malamu.” Mpe abakisaki boye: “Mpo kimya mpe libateli* ekozala mikolo nyonso ya bomoi na ngai.”*+