Ezera
1 Na mbula ya liboso ya Siruse+ mokonzi ya Perse, mpo liloba oyo Yehova alobaki na nzela ya Yirimia+ ekokisama, Yehova alamwisaki elimo ya Siruse mokonzi ya Perse mpo asakola nsango moko na bokonzi na ye mobimba, mpe lisusu akoma yango na mokanda,+ ete:
2 “Talá oyo Siruse mokonzi ya Perse alobi: ‘Yehova Nzambe ya likoló apesi ngai makonzi nyonso ya mabele,+ mpe apesi ngai mokumba ya kotongela ye ndako na Yerusaleme,+ oyo ezali na Yuda. 3 Kati na bino, moto nyonso oyo azali moto ya ekólo na ye, tiká ete Nzambe na ye azala na ye. Amata na Yerusaleme, oyo ezali na Yuda, mpe atonga lisusu ndako ya Yehova Nzambe ya Yisraele, ye Nzambe ya solo, oyo ndako na ye ezalaki* na Yerusaleme. 4 Moto nyonso oyo afandi mopaya,+ ezala azali na esika nini, bato oyo bafandi zingazinga na ye* básunga ye. Bápesa ye palata ná wolo, biloko mpe bibwɛlɛ, ná likabo oyo bapesi na bolingo na bango moko, mpo na ndako ya Nzambe ya solo+ oyo ezalaki na Yerusaleme.’”
5 Bongo bankumu ya batata ya mabota ya Yuda mpe ya Benyamina, banganga-nzambe ná Balevi, bato nyonso oyo Nzambe ya solo alamwisaki mposa na bango ya kosala, bamibongisaki mpo na kokende na Yerusaleme mpe kotonga lisusu ndako ya Yehova oyo ezalaki kuna. 6 Bato nyonso oyo bazalaki kofanda zingazinga na bango basalisaki bango.* Bapesaki bango bisaleli ya palata, ya wolo, biloko, bibwɛlɛ mpe biloko ya motuya, ezala mpe makabo nyonso oyo bapesaki na bolingo na bango moko.
7 Mokonzi Siruse abimisaki mpe bisaleli ya ndako ya Yehova, oyo Nebukadenezare azwaki na Yerusaleme mpe atyaki na ndako ya nzambe na ye.+ 8 Siruse mokonzi ya Perse abimisaki yango na litambwisi ya Mitredate mobombi mosolo, mpe ye atángaki yango mpo na Sheshebazare,*+ nkumu ya Yuda.
9 Talá motángo na yango: bisaleli 30 ya wolo oyo basalá lokola kitunga, bisaleli 1 000 ya palata oyo basalá lokola kitunga, bisaleli mosusu 29, 10 mabakuli ya mike 30 ya wolo, mabakuli ya mike 410 ya palata, mpe bisaleli mosusu 1 000. 11 Bisaleli nyonso ya wolo mpe ya palata ezalaki 5 400. Sheshebazare amemaki yango nyonso ntango bato oyo bamemamaki na mboka mopaya,+ na Babilone, bazongaki na Yerusaleme.