Ruta

4 Sikoyo Boaze akendaki na porte ya engumba+ mpe afandaki wana. Mpe talá! mosikoli oyo Boaze alobelaki+ azalaki koleka. Na yango, Boaze alobaki na ye boye: “Songolo, yaká naino mpe fandá awa.” Bongo ayaki mpe afandaki wana. 2 Na nsima Boaze azwaki bankulutu zomi kati na bankulutu ya engumba+ mpe alobaki na bango: “Bófanda awa.” Bongo bafandaki.

3 Sikoyo Boaze alobaki na mosikoli yango ete:+ “Naomi, oyo auti na mokili ya Moabe mpe azongi,+ asengeli kotɛka eteni ya elanga oyo ezalaki ya ndeko na biso Elimeleke.+ 4 Na yango nakanisaki ete nasengeli koyebisa yo yango mpe koloba boye: ‘Sombá yango na miso ya bato mpe bankulutu ya mboka na biso.+ Soki olingi kosikola yango, sikolá yango. Kasi soki okosikola yango te, yebisá ngai nayeba, mpo yo nde moto ya liboso oyo azali na lotomo ya kosikola yango, mpe ngai nayei nsima na yo.’” Ayanolaki ete: “Nandimi kosikola yango.”+ 5 Bongo Boaze alobaki: “Mokolo oyo okosomba elanga na mabɔkɔ ya Naomi, osengeli mpe kosomba yango na mabɔkɔ ya Ruta Momoabe, mwasi ya mowei, mpo na kozongisa nkombo ya mowei na libula na ye.”+ 6 Na bongo mosikoli yango alobaki ete: “Nakoki te kosikola yango, noki nabebisa libula na ngai moko. Napesi yo lotomo na ngai ya kosikola. Sikolá yango mpo na yo moko, mpo ngai nakoki kosikola yango te.”

7 Na ntango ya kala, mpo likambo nyonso oyo etali lotomo ya kosikola mpe ya kopesa eloko boye na esika ya eloko mosusu endimama, Bayisraele bazalaki na momeseno ya kosala boye: Mobali moko asengelaki kolongola sandale na ye+ mpe kopesa yango mobali mosusu. Na Yisraele, yango nde ezalaki komonisa ete bato basali boyokani mpo na likambo moko. 8 Bongo ntango mosikoli alobaki na Boaze ete: “Sombá yango mpo na yo moko,” mosikoli yango alongolaki sandale na ye. 9 Na yango, Boaze alobaki na bankulutu mpe bato nyonso ete: “Bozali batatoli+ lelo ete nazali kosomba na mabɔkɔ ya Naomi biloko nyonso oyo ezalaki ya Elimeleke mpe biloko nyonso oyo ezalaki ya Kilione ná Mahalone. 10 Nazali mpe kozwa* Ruta Momoabe, mwasi ya Mahalone, mpo akóma mwasi na ngai, mpo na kozongisa nkombo ya mowei na libula na ye,+ mpo nkombo ya mowei elongwa te na kati ya bandeko na ye mpe bato ya engumba na ye.* Bino bozali batatoli lelo.”+

11 Na yango, bato nyonso oyo bazalaki na porte ya engumba mpe bankulutu balobaki ete: “Tozali batatoli! Tiká Yehova asala ete mwasi oyo azali kokɔta na ndako na yo azala lokola Rashele mpe Lea, basi oyo batongaki ndako ya Yisraele.+ Tiká makambo na yo etambola malamu na Efrata+ mpe omisalela nkombo malamu* na Beteleme.+ 12 Tiká ete na nzela ya bana oyo Yehova akopesa yo na nzela ya elenge mwasi oyo,+ libota na yo ekóma lokola libota ya Pereze,+ oyo Tamara abotelaki Yuda.”

13 Bongo, Boaze abalaki Ruta. Asangisaki na ye nzoto, mpe Yehova apesaki ye likoki ya kozwa zemi mpe abotaki mwana mobali. 14 Mpe basi balobaki na Naomi ete: “Yehova asanzolama, ye oyo apesi yo mosikoli lelo oyo. Tiká ete nkombo na ye esakolama na Yisraele! 15 Mwana oyo apesi yo lisusu makasi mpe akosunga yo ntango okokóma mobange, mpo mwasi ya mwana na yo, oyo alingaka yo+ mpe oyo azali mpenza malamu mpo na yo koleka bana mibali nsambo, nde aboti mwana yango.” 16 Naomi azwaki mwana yango mpe atyaki ye na ntolo na ye, mpe akómaki kobatela ye. 17 Basi oyo bazalaki kofanda penepene na bango bapesaki mwana yango nkombo, mpe bazalaki koloba: “Naomi aboti mwana mobali.” Bapesaki ye nkombo Obede.+ Ye nde tata ya Yese,+ tata ya Davidi.

18 Talá sikoyo bakitani* ya Pereze:+ Pereze azalaki tata ya Hezerone;+ 19 Hezerone azalaki tata ya Rame; Rame azalaki tata ya Aminadabe;+ 20 Aminadabe+ azalaki tata ya Nahashone; Nahashone azalaki tata ya Salemone; 21 Salemone azalaki tata ya Boaze; Boaze azalaki tata ya Obede; 22 Obede azalaki tata ya Yese;+ mpe Yese azalaki tata ya Davidi.+