Yosua

22 Na nsima Yosua abengaki Barubene, Bagade, mpe ndambo ya libota ya Manase 2 mpe alobaki na bango: “Bosali nyonso oyo Moize mosaleli ya Yehova apesaki bino mitindo,+ mpe botosi mongongo na ngai na nyonso oyo napesaki bino mitindo.+ 3 Bosundoli bandeko na bino te na boumeli ya mikolo oyo nyonso, tii lelo;+ mpe bokobi kotosa mitindo ya Yehova Nzambe na bino.+ 4 Sikoyo, Yehova Nzambe na bino apesi bandeko na bino bopemi, kaka ndenge alakaki bango.+ Bongo sikoyo, bokoki kozonga na bahema na bino, na mokili oyo Moize mosaleli ya Yehova apesaki bino na ngámbo mosusu* ya Yordani.+ 5 Kaka nde, bókeba ete bótosa mitindo mpe Mobeko oyo Moize mosaleli ya Yehova apesaki bino:+ bólinga Yehova Nzambe na bino,+ bótambola na banzela na ye nyonso,+ bótosa mitindo na ye,+ bókangama na ye,+ mpe bósalela ye+ na motema na bino mobimba mpe na molimo* na bino mobimba.”+

6 Na nsima, Yosua apambolaki bango mpe atikaki bango bákende, mpe bakendaki na bahema na bango. 7 Ndambo ya libota ya Manase, Moize apesaki yango libula na etúká ya Bashane.+ Mpe ndambo mosusu ya libota yango, Yosua apesaki yango libula na ngámbo ya wɛsti ya Yordani+ esika moko na bandeko na bango. Lisusu, ntango Yosua atikaki bango bákende na bahema na bango, apambolaki bango 8 mpe alobaki na bango: “Bózonga na bahema na bino na bomɛngo mingi, na bibwɛlɛ ebele mpenza, na palata mpe wolo, na kwivre mpe bibende, mpe na bilamba mingi mpenza.+ Bózwa biloko oyo bopunzaki+ epai ya banguna na bino mpe bókabola yango ná bandeko na bino.”

9 Nsima na yango, Barubene, Bagade mpe ndambo ya libota ya Manase batikaki Bayisraele mosusu; balongwaki na Shilo, na mokili ya Kanana, mpe bazongaki na mokili na bango na Gileade,+ esika bapesaki bango mpo báfanda, na kolanda etinda oyo Yehova apesaki na nzela ya Moize.+ 10 Ntango bakómaki na bitúká ya Yordani na mokili ya Kanana, Barubene, Bagade, mpe ndambo ya libota ya Manase batongaki etumbelo kuna, pene na Yordani; etumbelo moko monene mpe ya kokamwa. 11 Na nsima, Bayisraele mosusu bayokaki nsango+ oyo: “Talá! Barubene, Bagade, mpe ndambo ya libota ya Manase batongi etumbelo moko na ndelo ya mokili ya Kanana, na bitúká ya Yordani, na ngámbo na biso.” 12 Ntango Bayisraele bayokaki bongo, liyangani mobimba ya Bayisraele basanganaki bango nyonso na Shilo+ mpo na kokende kobundisa bango.

13 Na nsima, Bayisraele batindaki Finehase,+ mwana ya nganga-nzambe Eleazare, epai ya Barubene, Bagade, mpe ndambo ya libota ya Manase na mokili ya Gileade. 14 Bankumu zomi bakendaki elongo na ye; nkumu moko mpo na libota mokomoko ya batata ya mabota nyonso ya Yisraele. Bango nyonso bazalaki bankumu ya mabota ya batata ya bato nkóto nkóto ya Yisraele.+ 15 Ntango bakómaki epai ya Barubene, Bagade, mpe ndambo ya libota ya Manase na mokili ya Gileade, balobaki na bango boye:

16 “Talá oyo liyangani mobimba ya Yehova elobi: ‘Oyo likambo nini ya kozanga bosembo+ bosaleli Nzambe ya Yisraele? Bopesi Yehova mokɔngɔ lelo mpe botiki kolanda ye, bomitongeli etumbelo mpo na kotombokela Yehova.+ 17 Libunga oyo esalemaki na Peore ezalaki lisumu monene mpo na biso te? Bobosani mpasi oyo yango ememelaki liyangani mobimba ya Yehova?+ Tii lelo, tozali konyokwama mpo na lisumu yango. 18 Mpe lelo oyo, bolingi kopesa Yehova mokɔngɔ mpe kotika kolanda ye? Soki botombokeli Yehova lelo, lobi akosilikela liyangani mobimba ya Yisraele.+ 19 Sikoyo soki ezali mpo mokili na bino ezali mbindo, bókatisa na mokili oyo ezali ya Yehova,+ epai tabernakle ya Yehova ezali,+ mpe bófanda na kati na biso. Kasi bótombokela Yehova te, mpe bókómisa biso batomboki te na ndenge bomitongeli etumbelo mosusu, nzokande etumbelo ya Yehova Nzambe na biso ezali.+ 20 Ntango Akana,+ mwana ya Zera, asalaki likambo moko ya kozanga bosembo na likambo etali eloko oyo esengelaki kobebisama, Nzambe asilikelaki liyangani mobimba ya Yisraele te?+ Ezali kaka Akana ye moko te moto akufaki mpo na libunga na ye.’”+

21 Na yango, Barubene, Bagade, mpe ndambo ya libota ya Manase bayanolaki bankumu ya mabota ya bato nkóto nkóto ya Yisraele+ boye: 22 “Yehova,* Nzambe ya banzambe! Yehova, Nzambe ya banzambe!+ Ayebi, mpe Yisraele mpe ekoyeba. Soki totombokaki mpe tozangaki bosembo epai ya Yehova, abikisa biso te na mokolo ya lelo. 23 Soki tomitongelaki etumbelo mpo na kopesa Yehova mokɔngɔ mpe kotika kolanda ye, mpe mpo na kopesa makabo ya kotumba, makabo ya mbuma, mpe bambeka ya kimya* likoló na yango, Yehova akopesa biso etumbu.+ 24 Kasi, tosalaki bongo mpo na likambo mosusu oyo ezalaki kotungisa biso; mpo tolobaki: ‘Na mikolo oyo ekoya, bana na bino bakoloba na bana na biso ete: “Lotomo nini bozali na yango ya kosambela Yehova Nzambe ya Yisraele elongo na biso?* 25 Yehova atyá Yordani mpo ezala ndelo oyo ekaboli biso ná bino Barubene mpe Bagade. Bozali na lotomo ya kosambela Yehova te.” Mpe bana na bino bakopekisa bana na biso básambela* Yehova.’

26 “Yango wana tolobaki: ‘Tókanga mabɔkɔ te. Tótonga etumbelo, mpo na kopesa makabo ya kotumba to mpe bambeka te, 27 kasi mpo ezala motatoli kati na biso ná bino+ mpe bakitani* na biso oyo bakoya nsima na biso, ete: tokosalela Yehova liboso na ye na makabo na biso ya kotumba, na bambeka na biso, mpe na bambeka na biso ya kimya.*+ Mpo na mikolo oyo ekoya, bana na bino báloba te na bana na biso ete: “Bozali na lotomo ya kosambela Yehova te.”’ 28 Yango wana, tolobaki ete: ‘Soki, na mikolo oyo ekoya, balobi na biso mpe na bakitani* na biso bongo, tokoloba: “Bótala etumbelo oyo ekokani na* etumbelo ya Yehova, oyo bankɔkɔ na biso basalaki, mpo na kopesa makabo ya kotumba to mpe bambeka te, kasi mpo ezala motatoli kati na biso ná bino.”’ 29 Tokoki kokanisa ata moke te kotombokela Yehova, kopesa Yehova mokɔngɔ mpe kotika kolanda ye,+ na kotongáká etumbelo mosusu mpo na kopesa likoló na yango makabo ya kotumba, makabo ya mbuma, mpe bambeka, longola etumbelo ya Yehova Nzambe na biso oyo ezali liboso ya tabernakle na ye!”+

30 Ntango nganga-nzambe Finehase, bankumu ya liyangani, mpe bankumu ya mabota ya bato nkóto nkóto ya Yisraele oyo bazalaki elongo na ye bayokaki maloba oyo bakitani ya Rubene, ya Gade, mpe ya Manase balobaki, mitema na bango ekitaki.+ 31 Na yango, Finehase mwana ya nganga-nzambe Eleazare, alobaki na bakitani ya Rubene, ya Gade mpe ya Manase ete: “Lelo oyo, toyebi ete Yehova azali kati na biso, mpo bosaleli Yehova te likambo oyo ya kozanga bosembo. Sikoyo, bobikisi Bayisraele na lobɔkɔ ya Yehova.”

32 Na nsima, Finehase mwana ya nganga-nzambe Eleazare mpe bankumu balongwaki epai ya Barubene mpe Bagade na mokili ya Gileade, bazongaki na mokili ya Kanana, mpe bayebisaki Bayisraele mosusu maloba yango. 33 Mpe maloba yango ekitisaki Bayisraele motema. Bongo Bayisraele bakumisaki Nzambe, mpe balobaki lisusu te likambo ya kokende kobundisa Barubene ná Bagade mpe ya kobebisa mokili oyo bazalaki kofanda.

34 Na yango, Barubene mpe Bagade bapesaki etumbelo* yango nkombo, mpo ndenge balobaki: “Ezali motatoli kati na biso ete Yehova azali Nzambe ya solo.”