Epai ya Tito
3 Kobá kokundwela bango ete bámikitisa mpe bátosa baguvɛrnema mpe bakonzi,+ bámibongisa mpo na mosala nyonso ya malamu, 2 bálobela moto mabe te, bázala te bato oyo baswanaka, mpe bázala nde bato ya makambo makasimakasi te,+ bámonisela bato nyonso boboto.+ 3 Mpo biso mpe tozalaki liboso bazoba, bato bazangá botosi, tokosamaki, tozalaki baombo ya bamposa ndenge na ndenge mpe ya bisengo, tozalaki na bomoi ya mabe, bato ya likunya, bato mabe mpenza, mpe tozalaki koyinana.
4 Nzokande, ntango boboto ya Mobikisi na biso, Nzambe,+ mpe bolingo na ye mpo na bato emonanaki polele 5 (ezalaki te mpo na misala ya sembo oyo tosalaki,+ kasi mpo na motema mawa na ye),+ abikisaki biso na ndenge asukolaki biso mpe amemaki biso na bomoi+ mpe akómisi biso bato ya sika na lisalisi ya elimo santu.+ 6 Asopelaki biso elimo yango mingi na nzela ya Yesu Kristo Mobikisi na biso,+ 7 mpo, nsima ya kotángama bato ya sembo* mpo na boboto monene ya moto wana,+ tókóma bazwi-ya-libula+ na boyokani na elikya moko ya bomoi ya seko.+
8 Maloba yango ebongi kotyelama motema, mpe nalingi ete okoba kotyela yango likebi mingi, mpo bato oyo bandimi Nzambe bátya makanisi na bango na kosala misala ya malamu. Makambo yango ezali malamu mingi mpe na litomba mpo na bato.
9 Kasi komikɔtisa te na bantembe ya bozoba, na kolukaluka milɔngɔ ya bankɔkɔ, koswana mpe kowelana mpo na Mibeko, mpo makambo wana ezali na litomba te mpe ezali mpamba.+ 10 Moto oyo abimisi mwa lingomba,+ nsima ya kokebisa ye mbala ya liboso mpe ya mibale,+ kosala eloko moko te elongo na ye,+ 11 mpo oyebi ete moto ya ndenge wana abungi nzela, azali kosala lisumu mpe asili kosambisama mpo na misala na ye moko.
12 Ntango nakotindela yo Artemasi to Tishike,+ salá nyonso ekoki mpo oya epai na ngai na Nikopolise, mpo nakani kolekisa eleko ya malili makasi kuna. 13 Salá nyonso oyo okoki mpo na kosalisa Zenasi, oyo ayebi Mibeko malamumalamu, ná Apolosi mpo bázanga eloko te na mobembo na bango.+ 14 Kasi bato na biso mpe báyekola kosala misala ya malamu mpo na kosalisa na ntango oyo mposa ezali mpenza makasi,+ mpo bázanga te kobota mbuma.+
15 Bato nyonso oyo bazali elongo na ngai batindeli yo mbote. Pesá mbote na bato oyo balingaka biso mingi na kati ya kondima.
Boboto monene ezala na bino nyonso.