Mokanda ya liboso ya Samwele

30 Na mokolo ya misato, Davidi ná bato na ye bayaki na Ziklage.+ Bakutaki ete babundisi engumba yango mpe batumbi yango na mɔtɔ. Mpo Baamaleke+ babundisaki Negebe* mpe Ziklage. 2 Babomaki ata moto moko te, kasi bakangaki mpe bamemaki basi,+ ná bana, mpe biloko nyonso oyo ezalaki kuna, banda na oyo ya moke tii na oyo ya monene mpe bakendaki. 3 Ntango Davidi ná bato na ye bakómaki kuna, bakutaki ete batumbi engumba yango, bakangi basi ná bana na bango ya mibali mpe ya basi mpe bakei na bango. 4 Bongo Davidi ná bato na ye balelaki na mongongo makasi tii ntango bazalaki lisusu na makasi ya kolela te. 5 Baamaleke bakangaki mpe basi mibale ya Davidi: Ahinoame moto ya engumba Yizireele mpe Abigaile oyo azalaki mwasi ya Nabale moto ya engumba Karamele.+ 6 Davidi ayokaki mpasi mingi na motema, mpo bato na ye balingaki kobamba ye mabanga. Mpo mibali yango nyonso bazalaki na nkanda mpo bana na bango ya mibali mpe ya basi bazalaki lisusu te. Kasi Davidi azwaki makasi mpo na Yehova Nzambe na ye.+

7 Na nsima Davidi alobaki na nganga-nzambe Abiatare,+ mwana ya Ahimeleke: “Nabondeli yo, yaká na efode awa.”+ Bongo Abiatare amemelaki Davidi efode. 8 Davidi atunaki Yehova:+ “Nasengeli kolanda etuluku oyo ya bapunzi? Nakozwa bango?” Na yango, alobaki na Davidi boye: “Landá bango, mpo okozwa bango mpenza, mpe okobikisa bakangami.”+

9 Na mbala moko Davidi ná bato na ye 600+ balandaki bango tii na Lobwaku* ya Besore, kasi bato mosusu batikalaki kuna. 10 Davidi ná bato 400 bakobaki kolanda bango, kasi bato 200 oyo balɛmbaki mingi mpe bakokaki kokatisa Lobwaku ya Besore te, batikalaki wana.+

11 Bakutaki mobali moko Moezipito na esobe mpe bamemaki ye epai ya Davidi. Bapesaki ye biloko ya kolya mpe mai ya komɛla, 12 bapesaki ye mpe ndambo ya gato ya figi oyo bafinafiná mpe bagato mibale ya mbuma ya vinyo. Ntango alyaki yango, azwaki lisusu makasi,* mpo alyaki eloko te mpe amɛlaki mai te mikolo misato butu moi. 13 Bongo Davidi atunaki ye: “Ozali mosaleli ya nani mpe outi wapi?” Alobaki: “Nazali Moezipito, moombo ya Moamaleke moko, kasi nkolo na ngai atiki ngai mpo nabɛlaki, esili koleka mikolo misato. 14 Biso nde tokendaki kobundisa sudi* ya Bakerete,+ teritware ya Yuda, mpe sudi* ya Kalebe,+ mpe totumbaki Ziklage na mɔtɔ.” 15 Na yango, Davidi alobaki na ye: “Okoki komema ngai esika etuluku yango ya bapunzi ezali?” Azongisaki: “Soki olapeli ngai ndai na nkombo ya Nzambe ete okoboma ngai te, mpe okokaba ngai na lobɔkɔ ya nkolo na ngai te, nakomema yo esika oyo etuluku yango ya bapunzi ezali.”

16 Bongo amemaki Davidi kuna. Ntango bakómaki, bakutaki bato yango bapalangani bipai nyonso na esika yango, bazali kolya, komɛla mpe kosala fɛti mpo na biloko ebele oyo bapunzaki na mokili ya Bafilistia mpe na mokili ya Yuda. 17 Bongo Davidi abomaki bango banda ntɔngɔ, ntango mwa molili ezalaki naino, tii na mpokwa. Ata moto moko te abikaki,+ longola kaka mibali 400 oyo bamataki na bakamela mpe bakimaki. 18 Davidi azwaki nyonso oyo Baamaleki bapunzaki,+ mpe abikisaki basi na ye mibale. 19 Davidi ná bato na ye bazwaki biloko na bango nyonso: banda na oyo ya moke tii na oyo ya monene, ata moko te ezangaki. Bazwaki mpe bana na bango ya mibali mpe ya basi, mpe biloko oyo epunzamaki.+ Davidi azwaki biloko nyonso oyo Baamaleki bamemaki. 20 Bongo Davidi azwaki bitonga nyonso ya bampate mpe ya bangɔmbɛ, oyo bato na ye bazalaki kotambwisa liboso ya bibwɛlɛ na bango moko. Bazalaki koloba: “Talá biloko oyo Davidi apunzi!”

21 Na nsima, Davidi azongaki epai ya mibali 200 oyo batikalaki na Lobwaku ya Besore+ mpo balɛmbaki makasi mpe bakokaki te kokende elongo na ye. Mibali yango babimaki mpo na kokutana na Davidi mpe bato oyo bazalaki elongo na ye. Ntango Davidi akómaki esika bazalaki, atunaki bango soki bazali ndenge nini. 22 Nzokande, bato nyonso ya mabe mpe ya mpambampamba kati na baoyo bakendaki elongo na Davidi, balobaki: “Lokola bakendaki na biso te, tokopesa bango eloko ata moko te na biloko oyo topunzi epai ya Baameleki, kasi tokopesa bango kaka basi na bango ná bana na bango, mpe bákende.” 23 Kasi Davidi alobaki na bango: “Bandeko na ngai, bosengeli kosala bongo te na biloko oyo Yehova apesi biso. Abateli biso mpe apesi na lobɔkɔ na biso etuluku ya bapunzi oyo bayaki kobundisa biso.+ 24 Nani akoki kondima likambo ya ndenge wana? Moto oyo akendaki na etumba akozwa likabo ndenge moko ná moto oyo afandaki mpo na kokɛngɛla bisaka.+ Bango nyonso bakozwa likabo ndenge moko.”+ 25 Mpe banda mokolo wana, yango ezalaki ekateli mpe ekómaki mobeko na Yisraele tii na mokolo ya lelo.

26 Ntango Davidi azongaki na Ziklage, atindelaki bankulutu ya Yuda, oyo bazalaki baninga na ye, ndambo ya biloko oyo bapunzaki, alobi: “Bózwa likabo* oyo euti na biloko oyo topunzi epai ya banguna ya Yehova.” 27 Atindaki yango epai ya baoyo bazalaki na Betele,+ baoyo bazalaki na Ramote ya Negebe,* baoyo bazalaki na Yatire,+ 28 epai ya baoyo bazalaki na Aroere, baoyo bazalaki na Sifimote mpe baoyo bazalaki na Eshetemoa,+ 29 epai ya baoyo bazalaki na Rakale, baoyo bazalaki na bingumba ya Bayerameele+ mpe baoyo bazalaki na bingumba ya Bakeni,+ 30 epai ya baoyo bazalaki na Horoma,+ baoyo bazalaki na Borashane mpe baoyo bazalaki na Atake, 31 epai ya baoyo bazalaki na Hebrone+ mpe na bisika nyonso oyo Davidi ná bato na ye batambolaki.