Kobima

29 “Talá likambo oyo okosala mpo na kosantisa bango mpo básalela ngai mosala ya banganga-nzambe: Zwá mwana-ngɔmbɛ ya mobali, bampate-mibali mibale, oyo ezangi mbeba,+ 2 limpa ezangi levire, mampa ezangi levire oyo basali lokola lopɛtɛ, oyo basangisi na mafuta, mpe bagalɛti ezangi levire oyo epakolami mafuta.+ Okosala yango na farini ya malamu ya blé 3 mpe okotya yango na kitunga mpe okoya na yango na kati ya kitunga,+ ná ngɔmbɛ-mobali mpe bampate-mibali mibale.

4 “Okoya na Arona ná bana na ye ya mibali na ekɔtelo ya hema ya kokutana,+ mpe okosukola bango na mai.+ 5 Na nsima, okozwa bilamba+ mpe okolatisa Arona zambala, kazaka ezangá mabɔkɔ ya efode, efode, libenga ya ntolo, mpe okokanga malamu na loketo na ye nkamba ya efode oyo batongi.+ 6 Okotya tirba na motó na ye mpe na tirba+ yango okotya elembo mosantu ya komipesa na Nzambe;* 7 mpe zwá mafuta mosantu,*+ sopá yango na motó na ye mpe tyá ye mafuta.+

8 “Na nsima, okoya na bana na ye ya mibali mpe okolatisa bango bazambala+ 9 mpe okokanga bango elamba na loketo, okosala mpe bongo mpo na Arona, okolínga na motó na bango eloko ya kolata na motó; mpe bonganga-nzambe ekokóma mosala na bango lokola mobeko mpo na libela.+ Na ndenge yango nde osengeli kotya Arona ná bana na ye ya mibali mpo básala lokola banganga-nzambe.*+

10 “Mpe okoya na ngɔmbɛ-mobali liboso ya hema ya kokutana, mpe Arona ná bana na ye ya mibali bakotya mabɔkɔ na bango na motó ya ngɔmbɛ-mobali yango.+ 11 Okoboma ngɔmbɛ-mobali yango liboso ya Yehova, na ekɔtelo ya hema ya kokutana.+ 12 Zwá na mosapi na yo ndambo ya makila ya ngɔmbɛ-mobali mpe tyá yango na maseke ya etumbelo,+ mpe sopá makila nyonso oyo etikali na nse ya etumbelo.+ 13 Na nsima, okozwa mafuta nyonso+ oyo ezipi misɔpɔ, mafuta ya libale, mimpíko mibale ná mafuta oyo ezali likoló na yango, mpe okotumba yango mpo ebimisa milinga likoló ya etumbelo.+ 14 Kasi mosuni ya ngɔmbɛ-mobali ná loposo na yango ná nyɛi na yango, okozikisa yango na mɔtɔ na libándá ya kaa. Ezali likabo mpo na lisumu.

15 “Na nsima, zwá mpate-mobali moko, mpe Arona ná bana na ye ya mibali bakotya mabɔkɔ na bango na motó ya mpate-mobali yango.+ 16 Okoboma mpate-mobali yango, okozwa makila na yango mpe okomwangisa yango na bangámbo nyonso ya etumbelo.+ 17 Okokata mpate-mobali na biteni na yango, mpe okosukola misɔpɔ+ ná makolo na yango mpe okotya biteni mpe motó na yango esika moko. 18 Osengeli kotumba mpate-mobali yango mobimba, okosala ete ebimisa milinga likoló ya etumbelo. Ezali likabo ya kotumba mpo na Yehova, nsolo moko oyo ezali kosepelisa.*+ Ezali likabo oyo etumbami na mɔtɔ mpo na Yehova.

19 “Na nsima, okozwa mpate-mobali mosusu, mpe Arona ná bana na ye ya mibali bakotya mabɔkɔ na bango na motó ya mpate-mobali yango.+ 20 Okoboma mpate-mobali yango mpe okozwa ndambo ya makila na yango, okotya yango na nsɔngɛ ya ngámbo ya litoi ya mobali ya Arona, na nsɔngɛ ya ngámbo ya litoi ya mobali ya bana na ye ya mibali, na mosapi ya monene ya lobɔkɔ na bango ya mobali mpe na mosapi ya monene ya lokolo na bango ya mobali, mpe okomwangisa makila na yango na bangámbo nyonso ya etumbelo. 21 Na nsima, okozwa ndambo ya makila oyo ezali likoló ya etumbelo mpe ndambo ya mafuta mosantu,+ mpe okomwangisela yango Arona ná bilamba na ye mpe bana na ye ya mibali ná bilamba na bango, mpo ye, bilamba na ye mpe bana na ye ya mibali ná bilamba na bango bázala basantu.+

22 “Mpe okozwa na mpate-mobali yango mafuta, mokila oyo ezali mafutamafuta, mafuta oyo ezipi misɔpɔ, mafuta ya libale, mimpíko mibale ná mafuta oyo ezali likoló na yango,+ ná lokolo ya mobali, mpo ezali mpate-mobali oyo epesami mpo bátyama na mosala.+ 23 Okozwa lisusu limpa ya libungutulu ná limpa oyo bapakoli mafuta, oyo basali lokola lopɛtɛ, mpe galɛti moko ná kitunga ya mampa oyo ezangi levire oyo ezali liboso ya Yehova. 24 Osengeli kotya yango nyonso na mabɔkɔ ya Arona mpe na mabɔkɔ ya bana na ye ya mibali, mpe okoningisa yango epai na epai lokola likabo ya koningisa liboso ya Yehova. 25 Na nsima, okozwa yango na mabɔkɔ na bango mpe okotumba yango na etumbelo, likoló ya likabo ya kotumba, mpo ezala nsolo moko ya kosepelisa* liboso ya Yehova. Ezali likabo oyo etumbami na mɔtɔ mpo na Yehova.

26 “Mpe okozwa ntolo ya mpate-mobali oyo epesami mpo bátyama na mosala,+ oyo epesami mpo na Arona, mpe okoningisa yango epai na epai lokola likabo ya koningisa liboso ya Yehova, mpe ekokóma eteni na yo. 27 Okosantisa ntolo yango ya likabo ya koningisa mpe lokolo ya eteni oyo esantisami, oyo eningisamaki mpe oyo bazwaki na mpate-mobali mpo bátyama na mosala,+ oyo epesamaki mpo na Arona mpe mpo na bana na ye ya mibali. 28 Yango ekokóma ya Arona mpe ya bana na ye ya mibali na nzela ya mobeko mpo na libela oyo Bayisraele bakokokisa, mpo ezali eteni oyo esantisami, mpe yango ekokóma eteni oyo esantisami, oyo Bayisraele basengeli kopesa.+ Na bambeka na bango ya kimya,* yango ezali eteni oyo esantisami mpo na Yehova.+

29 “Bilamba mosantu+ oyo ezali ya Arona ekosalelama mpo na bana na ye ya mibali+ nsima na ye ntango bakotya bango mafuta mpe bakotya bango lokola banganga-nzambe. 30 Na kati ya bana na ye ya mibali, nganga-nzambe oyo akozwa esika na ye mpe oyo akokɔta na hema ya kokutana mpo na kosala na esika mosantu, akolata yango mikolo nsambo.+

31 “Okozwa mpate-mobali oyo epesami mpo bátyama na mosala, mpe okolamba mosuni na yango na esika mosantu.+ 32 Arona ná bana na ye ya mibali bakolya+ mosuni ya mpate-mobali yango ná limpa oyo ezali na kati ya kitunga, na ekɔtelo ya hema ya kokutana. 33 Bakolya biloko oyo bazipi na yango masumu* mpo na kotya bango lokola banganga-nzambe* mpe kosantisa bango. Kasi moto oyo apesami nzela te* akoki kolya yango te, mpo yango ezali biloko mosantu.+ 34 Soki ndambo ya mosuni ya mbeka oyo epesami mpo bátyama na mosala mpe ndambo ya limpa etikali tii na ntɔngɔ, oyo etikali, okozikisa yango na mɔtɔ.+ Basengeli kolya yango te, mpo ezali eloko mosantu.

35 “Ndenge wana nde okosalela Arona ná bana na ye ya mibali, na kolanda nyonso oyo napesaki yo mitindo. Okozwa mikolo nsambo mpo na kotya bango lokola banganga-nzambe.*+ 36 Okopesa ngɔmbɛ-mobali ya likabo mpo na lisumu mokolo na mokolo mpo na kozipa masumu, mpe okopɛtola etumbelo na lisumu na kozipáká masumu na yango, mpe osengeli kotya yango mafuta mpo na kosantisa yango.+ 37 Okozwa mikolo nsambo mpo na kozipa masumu ya etumbelo, mpe osengeli kosantisa yango mpo ekóma etumbelo oyo eleki mosantu.+ Moto nyonso oyo azali kosimba etumbelo asengeli kozala mosantu.

38 “Talá oyo okopesa likoló ya etumbelo: mokolo na mokolo, bana-mpate ya mibali mibale ya mbula moko, ntango nyonso.+ 39 Pesá mwana-mpate moko ya mobali na ntɔngɔ, mpe mwana-mpate mosusu ya mobali na mpokwa, liboso molili ekɔta.*+ 40 Mpo na mwana-mpate ya mobali ya liboso okopesa moko ya bandambo zomi ya efa* ya farini ya malamu oyo basangisi na moko ya bandambo minei ya hini* ya mafuta ya mbuma ya olive oyo etutami, mpe likabo ya masanga ya moko ya bandambo minei ya hini ya vinyo. 41 Okopesa mwana-mpate ya mobali ya mibale na mpokwa liboso molili ekɔta,* elongo na farini mpe likabo ya masanga lokola oyo ya ntɔngɔ. Okosala ete ezala nsolo moko ya kosepelisa,* likabo oyo etumbami na mɔtɔ mpo na Yehova. 42 Ezali likabo ya kotumba ya ntango nyonso na boumeli ya mabota na bino na ekɔtelo ya hema ya kokutana liboso ya Yehova, epai nakomilakisa liboso na bino mpo na koloba na yo.+

43 “Nakomilakisa kuna liboso ya Bayisraele, mpe yango ekosantisama na nkembo na ngai.+ 44 Nakosantisa hema ya kokutana ná etumbelo, mpe nakosantisa Arona ná bana na ye ya mibali+ mpo básalela ngai lokola banganga-nzambe. 45 Nakofanda na hema na kati ya bato ya Yisraele, mpe nakozala Nzambe na bango.+ 46 Mpe bakoyeba mpenza ete nazali Yehova Nzambe na bango, oyo abimisaki bango na mokili ya Ezipito mpo nafanda na hema na kati na bango.+ Nazali Yehova Nzambe na bango.