Kobima

21 “Oyo ezali bikateli oyo okoyebisa bango:+

2 Soki osombi moombo oyo azali Moebre,+ akosala lokola moombo mbula motoba, kasi na mbula ya nsambo akozwa bonsomi, kozanga kofuta eloko.+ 3 Soki ayei ye moko, akokende mpe ye moko. Soki azali na mwasi, boye mwasi na ye asengeli kokende elongo na ye. 4 Soki nkolo na ye apesi ye mwasi mpe mwasi yango aboteli ye bana mibali to bana basi, mwasi ná bana bakokóma ya nkolo na ye mpe akokende ye moko.+ 5 Kasi soki moombo yango atingami kaka na koloba ete: ‘Nalingi nkolo na ngai, mwasi na ngai ná bana na ngai; nalingi kozwa bonsomi te,’+ 6 nkolo na ye asengeli komema ye liboso ya Nzambe ya solo. Na nsima, akomema ye na porte to na likonzí ya porte, mpe nkolo na ye akotɔbɔla ye litoi na etubeli, mpe akozala moombo na ye bomoi mobimba.

7 “Soki moto atɛki mwana na ye ya mwasi mpo azala moombo, ye akozwa bonsomi te ndenge baombo ya mibali bazwaka. 8 Soki nkolo na ye asepeli na ye te mpe aponi ye te akóma mwasi na ye mosusu, kasi atiki ete moto mosusu asomba ye,* akozala na ndingisa te ya kotɛka ye epai ya bato ya ekólo mosusu, mpo asaleli ye makambo na bokosi. 9 Soki aponeli ye mwana na ye ya mobali, akopesa ye lotomo oyo mwana mwasi azalaka na yango. 10 Soki azwi mwasi mosusu, bilei na ye, bilamba na ye mpe lotomo ya libala+ ya mwasi ya liboso ekokitisama te. 11 Soki akopesa ye biloko oyo misato te, boye akokende, akozwa bonsomi, kozanga kofuta mbongo.

12 “Ye oyo abɛti moto mpe moto yango akufi, ye mpe asengeli kobomama.+ 13 Kasi soki asali yango kozanga kokana mpe Nzambe ya solo atiki ete likambo yango esalema, nakoyebisa yo esika oyo asengeli kokima.+ 14 Soki moto asilikeli moninga na ye makasi mpe abomi ye na nko,+ moto yango asengeli kokufa, ata soki alukaki libateli na etumbelo na ngai.+ 15 Moto oyo abɛti tata na ye to mama na ye, asengeli kobomama.+

16 “Ye oyo akangi moto+ mpe atɛki ye to bakuti moto yango na lobɔkɔ na ye,+ asengeli kobomama.+

17 “Moto nyonso oyo alakeli tata na ye to mama na ye mabe, asengeli kobomama.+

18 “Soki bato baswani mpe moko abambi moninga na ye libanga to abɛti ye likofi* mpe akufi te kasi asengeli kotikala na mbeto na ye: 19 Soki akoki kotɛlɛma mpe kotambola libándá na nzete, boye moto oyo abɛtaki ye asengeli kozwa etumbu te. Akofuta kaka ntango ya mosala oyo moto yango oyo azwi likama abungisi tii akobika mpenza.

20 “Soki moto abɛti moombo na ye ya mobali to moombo na ye ya mwasi na nzete mpe moombo yango akufi na lobɔkɔ na ye, esengeli kozongisa mabe mpo na moombo yango.+ 21 Nzokande, soki ye atikali na bomoi mokolo moko to mikolo mibale, esengeli te kozongisa mabe mpo na ye, mpo asombaki ye na mbongo na ye moko.

22 “Soki bato babundi mpe batuti mwasi ya zemi mpe aboti mwana matsombe*+ kasi likama ya liwa* ebimi te, moto yango akofuta lomande oyo mobali ya mwasi yango akosɛnga; mpe asengeli kopesa yango na nzela ya basambisi.+ 23 Kasi soki likama ya liwa ebimi, boye osengeli kopesa bomoi mpo na bomoi,*+ 24 liso mpo na liso, lino mpo na lino, lobɔkɔ mpo na lobɔkɔ, lokolo mpo na lokolo,+ 25 kozikisa mɔtɔ mpo na kozikisa mɔtɔ, mpota mpo na mpota, kobɛta mpo na kobɛta.

26 “Soki moto abɛti liso ya moombo na ye ya mobali to liso ya moombo na ye ya mwasi mpe abebisi yango, akotika ye akende, azwi bonsomi mpo na liso na ye.+ 27 Mpe soki abuki nde lino ya moombo na ye ya mobali to lino ya moombo na ye ya mwasi, akotika ye akende, azwi bonsomi mpo na lino na ye.

28 “Mpe soki ngɔmbɛ-mobali ezokisi mobali to mwasi na maseke mpe moto yango akufi, bakobamba mpenza ngɔmbɛ yango mabanga tii ekokufa,+ mpe bakolya mosuni na yango te; kasi nkolo ya ngɔmbɛ yango akozwa etumbu te. 29 Kasi soki ngɔmbɛ yango ezalaki na momeseno ya kozokisa na maseke mpe bapesaki nkolo na yango likebisi kasi abatelaki ngɔmbɛ yango te, mpe yango ebomi mobali to mwasi, bakobamba ngɔmbɛ yango mabanga mpe lisusu bakoboma nkolo na yango. 30 Soki basɛngi ye lisiko,* asengeli kopesa motuya ya lisiko mpo na bomoi* na ye, nyonso oyo bakosɛnga ye. 31 Soki ezokisaki mwana mobali to mwana mwasi na maseke, bakosalela nkolo ngɔmbɛ na kolanda ekateli yango. 32 Soki ngɔmbɛ yango ezokisaki nde moombo ya mobali to moombo ya mwasi na maseke, akopesa nkolo ya moombo yango motuya ya shekele* 30, mpe bakobamba ngɔmbɛ yango mabanga tii ekokufa.

33 “Soki moto atiki libulu polele to atimoli libulu mpe azipi yango te, mpe ngɔmbɛ-mobali to mpunda ekwei na kati na yango, 34 nkolo ya libulu yango asengeli kofuta.+ Asengeli kofuta motuya na yango epai ya nkolo ya nyama yango, mpe nyama oyo ekufi ekokóma ya ye. 35 Soki ngɔmbɛ-mobali ya moto ezokisi ngɔmbɛ-mobali ya moto mosusu mpe yango ekufi, na yango basengeli kotɛka ngɔmbɛ oyo ezali na bomoi mpe kokabola motuya oyo epesami mpo na yango; mpe lisusu bakokabola oyo ekufi. 36 To soki eyebanaki banda kala ete ngɔmbɛ yango ezali na momeseno ya kozokisa na maseke kasi nkolo na yango abatelaki yango te, asengeli kofuta ngɔmbɛ-mobali mpo na ngɔmbɛ-mobali mpe oyo ekufi ekokóma ya ye.