Kobima

38 Asalaki etumbelo ya likabo ya kotumba na nzete ya akasia. Ezalaki karé, mapeko* mitano na molai, mapeko mitano na monene, mpe bosanda na yango ezalaki mapeko misato.+ 2 Na nsima asalaki maseke na nsuka na yango minei, na likoló. Elongo na maseke na yango esalaki eteni kaka moko. Mpe azipaki yango na kwivre.+ 3 Nsima na yango asalaki bisaleli nyonso ya etumbelo: bakatini, bapau, mabakuli, nkanya ná biloko ya kotya mɔtɔ. Asalaki bisaleli yango nyonso na kwivre. 4 Asalaki mpe motalaka mpo na etumbelo, monyama ya kwivre, na nse ya monɔkɔ, na katikati na yango. 5 Asalaki mpɛtɛ minei na ebende enyangwisami, likoló ya nsuka minei pene na motalaka ya kwivre, mpo ezala bisimbeli ya banzete ya komema yango. 6 Na nsima, asalaki banzete yango na nzete ya akasia mpe azipaki yango na kwivre. 7 Akɔtisaki banzete yango na mpɛtɛ na mipanzi mibale ya etumbelo mpo na komema yango. Etumbelo oyo asalaki ezalaki lokola kɛsi ya mabaya oyo ezali polele na kati.

8 Na nsima asalaki saani monene ya kwivre+ ná bitɛlɛmiselo na yango ya kwivre; asalelaki batalatala* ya basi oyo babongisamaki mpo na kosala mosala na ekɔtelo ya hema ya kokutana.

9 Na nsima asalaki lopango.+ Mpo na ngámbo ya sudi, lopango ezalaki na barido ya lini ya kitoko oyo elíngamalíngamá, ya mapeko 100.+ 10 Ezalaki na makonzí 20 ná bitɛlɛmiselo na yango 20 ya kwivre, oyo ezali na mabulu, mpe bakroshɛ ya makonzí ná bikangiseli* na yango ezalaki ya palata. 11 Lisusu, barido ya ngámbo ya nɔrdi, ezalaki ya mapeko 100. Makonzí na yango 20 ná bitɛlɛmiselo na yango 20 ya kwivre, oyo ezali na mabulu. Bakroshɛ ya makonzí ná bikangiseli* na yango ezalaki ya palata. 12 Kasi na ngámbo ya wɛsti, barido ezalaki ya mapeko 50. Makonzí na yango ezalaki zomi mpe bitɛlɛmiselo na yango oyo ezali na mabulu, ezalaki zomi, bakroshɛ ya makonzí ná bikangiseli* na yango ezalaki ya palata. 13 Monene na yango na ngámbo ya ɛsti, epai moi ebimaka, ezalaki mapeko 50. 14 Barido ezalaki mapeko 15 na ngámbo moko, ná makonzí misato mpe bitɛlɛmiselo misato, oyo ezali na mabulu. 15 Mpe na ngámbo mosusu, na mopanzi mosusu ya monɔkɔ ya lopango, barido ezalaki mapeko 15, ná makonzí misato mpe bitɛlɛmiselo misato, oyo ezali na mabulu. 16 Barido nyonso oyo ezalaki zingazinga ya lopango ezalaki lini ya kitoko oyo elíngamalíngamá. 17 Bitɛlɛmiselo oyo ezali na mabulu mpo na makonzí ezalaki ya kwivre, bakroshɛ ya makonzí ná bikangiseli* na yango ezalaki ya palata, bansɔngɛ na yango ezipamaki na palata, mpe bikangiseli ezalaki ya palata mpo na makonzí nyonso ya lopango.+

18 Elamba ya kozipa* monɔkɔ ya lopango ezalaki bilamba oyo batongi na nsinga ya bulé, na lɛnɛ oyo epakolami langi ya mwa motane-bulé, na biloko oyo epakolami langi ya motane makasi mpe na lini ya kitoko oyo elíngamalíngamá. Ezalaki mapeko 20 na molai mpe bosanda na yango ezalaki mapeko 5, ezalaki molai ndenge moko na barido ya lopango.+ 19 Makonzí na yango minei ná bitɛlɛmiselo na yango minei oyo ezali na mabulu esalemaki na kwivre. Bakroshɛ mpe bikangiseli* na yango ezalaki ya palata, mpe mitó na yango ezipamaki na palata. 20 Bapike nyonso ya tabernakle mpe zingazinga ya lopango ezalaki ya kwivre.+

21 Oyo ezali biloko ya tabernakle oyo etángamaki, tabernakle ya Litatoli,+ oyo etángamaki na etinda ya Moize, mosala oyo Balevi+ basalaki na litambwisi ya Itamare+ mwana ya Arona nganga-nzambe. 22 Bezalele+ mwana ya Uri mwana ya Hure na libota ya Yuda asalaki nyonso oyo Yehova apesaki Moize mitindo. 23 Elongo na ye Oholiabe+ mwana ya Ahisamake na libota ya Dani, moto oyo ayebi malamu misala ya mabɔkɔ mpe moto oyo asalaka mayemi na bansinga mpe moto oyo asalaka mayemi na bilamba na nsinga ya bulé, na lɛnɛ oyo epakolami langi ya mwa motane-bulé, na biloko oyo epakolami langi ya motane makasi mpe na lini ya kitoko.

24 Wolo nyonso oyo basalelaki na mosala ya esika mosantu ezalaki motángo ya wolo ya likabo ya koningisa:+ talanta* 29 mpe shekele* 730 na kolanda shekele ya esika mosantu.* 25 Mpe palata oyo bato oyo bakomisamaki nkombo bapesaki ezalaki talanta 100 mpe shekele 1 775 na kolanda shekele ya esika mosantu.* 26 Ndambo ya shekele mpo na moto na moto ezalaki shekele moko kabola na mibale na kolanda shekele ya esika mosantu,* mpo na moto nyonso oyo azalaki na kati ya bato oyo bakomisamaki nkombo. Motángo ya bato oyo bakomisamaki nkombo banda na mbula 20 matá,+ ezalaki 603 550.+

27 Bitɛlɛmiselo ya esika mosantu, oyo ezali na mabulu oyo enyangwisamaki mpe bitɛlɛmiselo ya rido oyo ezali na mabulu ezalaki talanta 100; bitɛlɛmiselo 100 oyo ezali na mabulu, ekokani na talanta 100, talanta moko mpo na etɛlɛmiselo moko oyo ezali na libulu.+ 28 Na shekele 1 775 asalaki bakroshɛ mpo na makonzí mpe azipaki bansɔngɛ na yango mpe akangisaki yango esika moko.

29 Kwivre ya likabo* ezalaki talanta 70 mpe shekele 2 400. 30 Asalaki na yango bitɛlɛmiselo oyo ezali na mabulu mpo na ekɔtelo ya hema ya kokutana, etumbelo ya kwivre mpe motalaka na yango ya kwivre, bisaleli nyonso ya etumbelo, 31 bitɛlɛmiselo oyo ezali na mabulu zingazinga ya lopango, bitɛlɛmiselo oyo ezali na mabulu na monɔkɔ ya lopango, bapike nyonso ya tabernakle ná bapike nyonso+ zingazinga ya lopango.