Kobima

5 Nsima na yango, Moize ná Arona bakɔtaki mpe balobaki na Farao ete: “Yehova Nzambe ya Yisraele alobi boye: ‘Tiká bato na ngai bákende mpo básalela ngai fɛti na esobe.’” 2 Kasi, Farao alobaki ete: “Yehova nde nani,+ mpo natosa mongongo na ye mpe natika Yisraele ekende?+ Nayebi Yehova ata moke te, mpe kutu, nakotika Yisraele ekende te.”+ 3 Kasi, balobaki ete: “Nzambe ya Baebre asololi na biso. Tobondeli yo, tiká biso tókende na esobe, tokosala mobembo ya mikolo misato mpo na kopesa Yehova Nzambe na biso mbeka;+ soki te akoboma biso na maladi mabe to na mopanga.” 4 Mokonzi ya Ezipito ayanolaki bango ete: “Moize ná Arona, mpo na nini bozali kosala ete bato bátika misala na bango? Bózonga na misala na bino!”*+ 5 Mpe Farao abakisaki ete: “Talá ndenge bato bazali sikoyo ebele na mokili, mpe bino bolingi ete bátika misala na bango.”

6 Kaka na mokolo yango, Farao apesaki mitindo epai ya bakapita mpe bakambi-misala na ye ete: 7 “Bosengeli lisusu te kopesa bato matiti mpo básala babriki.+ Bótika bango moko bákende kolɔkɔta matiti ya kokauka. 8 Kasi, bosengeli kaka kosɛnga bango bákokisa motángo ya babriki ndenge oyo bazalaki kosala liboso. Bókitisela bango yango ata moke te, mpo bazali kolɛmbisa mabɔkɔ.* Yango wana bazali kogangaganga ete: ‘Tolingi kokende, tolingi kopesa Nzambe na biso mbeka!’ 9 Bósala ete básala misala ya makasi koleka, bópesa bango misala mingi mpo bátya likebi te na maloba ya lokuta.”

10 Bongo bakapita+ mpe bakambi-misala babimaki mpe balobaki na bato ete: “Farao alobi boye: ‘Nakopesa bino matiti ya kokauka lisusu te. 11 Bókende mpe bózwa matiti ya kokauka bino moko epai nyonso oyo bokoki komona yango, kasi mosala na bino ekokitisama ata moke te.’” 12 Na yango, bato bapalanganaki na mokili mobimba ya Ezipito mpo na kolɔkɔta matiti ya blé na esika ya matiti ya kokauka. 13 Mpe bakapita bazalaki kaka koloba na bango ete: “Mokomoko na bino asengeli kosilisa mosala na ye ya mokolo na mokolo, kaka ndenge ezalaki ntango bazalaki kopesa bino matiti ya kokauka.” 14 Na nsima, bakapita ya Farao babɛtaki+ bato oyo batyaki mpo bákamba misala ya Bayisraele. Batunaki bango ete: “Mpo na nini bokokisaki te motángo ya babriki oyo bosalaka? Lobi bokokisaki te, lelo mpe ndenge moko.”

15 Na yango, bakambi-misala ya Bayisraele bakɔtaki mpe balelelaki Farao ete: “Mpo na nini ozali kosala basaleli na yo boye? 16 Bazali kopesa basaleli na yo matiti te, kasi bazali koloba na biso ete: ‘Bósala babriki!’ Basaleli na yo bazali kobɛtama, nzokande bato na yo nde bazali kosala mabe.” 17 Kasi alobaki ete: “Bozali kolɛmbisa mabɔkɔ,* bozali kolɛmbisa mabɔkɔ!*+ Yango wana bozali koloba ete: ‘Tolingi kokende, tolingi kopesa Yehova mbeka.’+ 18 Sikoyo bókende, bózonga na mosala! Bakopesa bino matiti te, kasi bosengeli kaka kokokisa motángo ya babriki oyo bakatelá bino.”

19 Bongo bakambi-misala ya Bayisraele bamonaki ete bakómi na mpasi mpenza mpo na etinda oyo: “Bosengeli kokitisa ata moke te motángo ya babriki na bino ya mokolo na mokolo.” 20 Ntango bautaki epai ya Farao, bakutanaki na Moize mpe Arona, oyo batɛlɛmaki wana mpo na kozela bango. 21 Na mbala moko, balobaki na bango ete: “Yehova atala bino mpe akata likambo, mpo bosali ete Farao ná basaleli na ye báyina biso,* mpe botye mopanga na lobɔkɔ na bango mpo báboma biso.”+ 22 Bongo Moize abalukaki epai ya Yehova mpe alobaki ete: “Yehova, mpo na nini omemeli bato oyo mpasi? Mpo na nini otindaki ngai? 23 Banda ntango oyo nakɔti liboso ya Farao mpo na koloba na nkombo na yo,+ ye asaleli bato oyo mabe,+ mpe yo obikisi bato na yo ata moke te.”+