Ezera
3 Ntango sanza ya nsambo+ ekómaki mpe ete Bayisraele* bakómaki kofanda na bingumba na bango, bayanganaki na Yerusaleme na bomoko. 2 Yeshua+ mwana ya Yehozadake ná banganga-nzambe mosusu, ná Zerubabele+ mwana ya Shealatiele+ ná bandeko na ye, batɛlɛmaki mpe batongaki etumbelo ya Nzambe ya Yisraele, mpo na kopesa bambeka ya kotumba likoló na yango, ndenge ekomami na Mobeko ya Moize+ moto ya Nzambe ya solo.
3 Bongo batɛlɛmisaki etumbelo yango na esika na yango ya kala, atako bazalaki kobanga bato ya mikili mosusu ya pembenipembeni,+ mpe babandaki kopesa Yehova bambeka ya kotumba likoló na yango, bambeka ya kotumba ya ntɔngɔ mpe ya mpokwa.+ 4 Na nsima basalaki fɛti ya Bandako ya matiti,* na kolanda oyo ekomamá na Mobeko,+ mpe mokolo na mokolo bazalaki kopesa motángo ya bambeka ya kotumba oyo esɛngamaki.+ 5 Na nsima, bapesaki makabo ya kotumba ya ntango nyonso,+ makabo mpo na basanza ya sika+ mpe ya bileko nyonso ya bafɛti+ ya Yehova oyo esantisami, ezala mpe makabo ya baoyo nyonso bazalaki na mposa ya kopesa Yehova likabo na bolingo na bango moko.+ 6 Kobanda na mokolo ya liboso ya sanza ya nsambo,+ babandaki kopesa Yehova bambeka ya kotumba, nzokande moboko ya tempelo ya Yehova etyamaki naino te.
7 Bapesaki mbongo epai ya bato oyo bakataka mabanga+ mpe epai ya bato oyo bayebi malamu misala ya mabɔkɔ,+ mpe bapesaki Basidone mpe bato ya Tire biloko ya kolya, masanga ná mafuta, mpo báya na mabaya ya sɛdrɛ na nzela ya mbu banda na Liban tii na Yope,+ na kolanda ndingisa oyo Siruse mokonzi ya Perse apesaki bango.+
8 Na mbula ya mibale nsima ya kokóma na bango na ndako ya Nzambe ya solo na Yerusaleme, na sanza ya mibale, Zerubabele mwana ya Shealatiele, Yeshua mwana ya Yehozadake mpe bandeko na bango mosusu oyo batikalaki, banganga-nzambe ná Balevi, mpe baoyo nyonso bazongaki na Yerusaleme ntango bautaki na mboka oyo bamemaki bango bakangami,+ babandaki mosala. Baponaki Balevi oyo bazalaki na mbula 20 to koleka mpo bátambwisa mosala ya ndako ya Yehova. 9 Bongo Yeshua, bana na ye ná bandeko na ye, mpe Kadimiele ná bana na ye, bato ya libota ya Yuda, basalaki elongo mpo na kokamba bato oyo bazalaki kosala mosala na ndako ya Nzambe ya solo. Basalaki mpe elongo na bana ya Henadade,+ bana na bango mpe bandeko na bango, Balevi.
10 Ntango batongi batyaki moboko ya tempelo ya Yehova,+ banganga-nzambe, oyo balataki bilamba na bango ya mosala, bazalaki na bakelelo,+ mpe Balevi, bana ya Asafe, oyo bazalaki na basɛmbalɛ, batɛlɛmaki mpo na kosanzola Yehova na kolanda malako ya Davidi mokonzi ya Yisraele.+ 11 Mpe babandaki koyemba, etuluku moko nsima ya mosusu,+ bazali kosanzola mpe kopesa Yehova matɔndi, “mpo azali malamu; bolingo na ye ya sembo epai ya Yisraele ezali seko na seko.”+ Na nsima, bato nyonso bagangaki na mongongo makasi mpo na kosanzola Yehova, mpo moboko ya ndako ya Yehova etyamaki. 12 Banganga-nzambe ebele, Balevi mpe bankumu ya batata ya mabota, mikóló oyo bamonaki tempelo ya kala,+ bazalaki kolela na mongongo makasi ntango bamonaki moboko ya tempelo oyo etyami. Nzokande basusu bazalaki koganga makasi na esengo.+ 13 Bongo bato bakokaki te kokesenisa makɛlɛlɛ ya koganga na esengo ná makɛlɛlɛ ya kolela ya bato, mpo bato bazalaki koganga makasi, mpe makɛlɛlɛ ezalaki koyokana mosika mpenza.