Ezera

4 Ntango banguna ya Yuda mpe ya Benyamina+ bayokaki ete bato oyo bamemamaki na mboka mopaya bazongi+ mpe bazali kotongela Yehova Nzambe ya Yisraele tempelo, 2 na mbala moko bakendaki epai ya Zerubabele ná bankumu ya mabota ya batata mpe balobaki na bango: “Bótika biso tótonga elongo na bino. Mpo biso mpe tozali kosambela* Nzambe na bino+ lokola bino, mpe topesaka ye bambeka banda na mikolo ya Esare-hadone+ mokonzi ya Asiri, oyo amemaki biso awa.”+ 3 Kasi Zerubabele, Yeshua ná bankumu ya batata ya mabota ya Yisraele balobaki na bango: “Kotongela Nzambe na biso ndako ezali likambo na bino te,+ etali nde biso. Biso moko nde tokotongela Yehova Nzambe ya Yisraele ndako, kaka ndenge Mokonzi Siruse, mokonzi ya Perse, apesaki biso mitindo.”+

4 Na yango bato ya mokili yango bazalaki ntango nyonso kolɛmbisa bato ya Yuda nzoto mpe kobangisa bango mpo bátika kotonga.+ 5 Bazalaki kofuta bapesi-toli ya mokonzi mpo bábebisa mokano ya Bayuda+ mikolo nyonso ya Siruse mokonzi ya Perse tii na boyangeli ya Dariuse+ mokonzi ya Perse. 6 Na ebandeli ya boyangeli ya Asueruse, bakomaki mokanda mpo na kofunda bato oyo bafandi na Yuda mpe na Yerusaleme. 7 Mpe na boyangeli ya Artazerezese mokonzi ya Perse, Bishilame, Mitredate, Tabeele ná baninga na ye mosusu ya mosala bakomelaki Artazerezese mokonzi ya Perse mokanda. Babongolaki mokanda yango na monɔkɔ ya Aramɛyɛ+ mpe bakomaki yango na ekomeli ya Aramɛyɛ.*

8 * Rehume mokonzi ya basali ya guvɛrnema ná mokomeli Shimeshai bakomelaki mokonzi Artazerezese mokanda mpo na kofunda bato oyo bafandi na Yerusaleme, na maloba oyo: 9 (Mokanda yango eutaki epai ya Rehume mokambi ya basali ya guvɛrnema ná mokomeli Shimeshai mpe baninga na bango mosusu ya mosala, basambisi, baguvɛrnɛrɛ mike, basɛkrɛtɛrɛ, bato ya Ereke,+ bato ya Babilone, bato oyo bafandi na Susa,+ elingi koloba Baelame,+ 10 mpe bato ya bikólo mosusu oyo Asenapare moto monene mpe ya lokumu ayaki na bango na mboka mopaya mpe afandisaki bango na bingumba ya Samaria,+ mpe ndambo mosusu na etúká ya ngámbo mosusu ya Ebale.* Mpe sikoyo, 11 talá maloba ya mokanda oyo batindelaki ye.)

“Epai ya mokonzi Artazerezese, biso basaleli na yo, mibali ya etúká ya ngámbo mosusu ya Ebale: Mpe sikoyo, 12 tiká mokonzi ayeba ete Bayuda oyo bautaki epai na yo bakómi epai na biso, na Yerusaleme. Bazali kotonga lisusu engumba oyo ya botomboki mpe ya mabe, mpe bazali kosilisa kotonga bifelo+ mpe kobongisa miboko. 13 Sikoyo, tiká mokonzi ayeba ete soki engumba oyo etongami lisusu mpe soki bifelo na yango esili, bakofuta lisusu mpako te, lifuti te,+ mpako ya nzela te, mpe yango ekosala ete mosolo ezanga na bisika ya kobomba misolo ya bakonzi. 14 Lokola tozwaka lifuti na biso na* ndako ya mokonzi mpe tolingi te ete matomba oyo mokonzi azwaka ebunga, yango wana totindi mokanda oyo mpo mokonzi ayeba likambo yango, 15 mpo bálukaluka na buku ya masolo ya bankɔkɔ na yo.+ Na buku yango, okomona masolo mpe okoyeba ete engumba oyo ezali engumba ya botomboki, ememelaka bakonzi mpe bitúká* makama, mpe na kati na yango ezalaki na bato oyo bazalaki kotinda basusu na botomboki banda na ntango ya kala. Ezali mpo na yango nde engumba yango ebebisamaki.+ 16 Tozali koyebisa mokonzi ete soki engumba oyo etongami lisusu mpe bifelo na yango esili, okozala lisusu na bokonzi* te na etúká ya ngámbo mosusu ya Ebale.”+

17 Mokonzi atindaki maloba epai ya Rehume mokambi ya basali ya guvɛrnema, ná mokomeli Shimeshai, mpe baninga na ye mosusu ya mosala oyo bazalaki kofanda na Samaria na etúká ya ngámbo mosusu ya Ebale ete:

“Mbote! 18 Mokanda oyo botindelaki biso etángami polele* liboso na ngai. 19 Napesaki etinda ete bálukaluka na mikanda mpe bamonaki ete banda kala, engumba oyo etɛmɛlaka bakonzi mpe botomboki ná mobulu ezalaki kobima kuna.+ 20 Yerusaleme ezalaki na bakonzi ya makasi oyo bazalaki koyangela na etúká mobimba ya ngámbo mosusu ya Ebale, mpe bazalaki kofuta mpako, lifuti mpe mpako ya nzela epai na bango. 21 Sikoyo bópesa etinda mpo mibali wana bátika kosala, mpo engumba yango etongama lisusu te tii ntango ngai nakopesa mitindo. 22 Mpe bókeba, bósala likambo oyo na lisɛki te, mpo matomba ya mokonzi ebeba lisusu te.”+

23 Bongo batángaki maloba ya mokanda ya Mokonzi Artazerezese liboso ya Rehume ná mokomeli Shimeshai mpe baninga na bango ya mosala. Na nsima, bakendaki mbangu na Yerusaleme epai ya Bayuda mpe basalelaki makasi na bango mpo na kopekisa bango mosala. 24 Ezalaki na ntango yango nde mosala ya kotonga lisusu ndako ya Nzambe, oyo ezalaki na Yerusaleme ekatanaki; mpe etikalaki bongo tii na mbula ya mibale ya boyangeli ya Dariuse mokonzi ya Perse.+