Danyele

5 Mokonzi Beleshazare+ asalaki fɛti moko monene mpo na bato na ye nkóto moko ya lokumu, mpe azalaki komɛla vinyo liboso na bango.+ 2 Na nse ya molangwa, Beleshazare apesaki mitindo ete báya na bakɔpɔ* ya wolo mpe ya palata oyo tata na ye Nebukadenezare azwaki na tempelo na Yerusaleme,+ mpo ye moko ná bato na ye ya lokumu, mpe basi na ye mosusu* ná basi na ye ya pembeni bámɛla na yango. 3 Bongo bayaki na bakɔpɔ* ya wolo oyo bazwaki na esika mosantu* ya ndako ya Nzambe na Yerusaleme, mpe mokonzi ná bato na ye ya lokumu, mpe basi na ye mosusu ná basi na ye ya pembeni bamɛlaki na yango. 4 Bamɛlaki vinyo mpe basanzolaki banzambe ya wolo mpe ya palata, ya kwivre, ya ebende, ya nzete mpe ya libanga.

5 Na mbala moko misapi ya lobɔkɔ ya moto ebimaki mpe ebandaki kokoma na efelo ya ndako ya mokonzi, na esika oyo bapakolá mpɛmbɛ, penepene ya etɛlɛmiselo ya miinda, mpe mokonzi amonaki ndenge lobɔkɔ yango ezalaki kokoma. 6 Bongo mokonzi akómaki lokola moto asili mai ná makila,* mpe makanisi na ye ebangisaki ye; loketo na ye eninganaki+ mpe mabɔlɔngɔ na ye ebandaki kolɛnga.

7 Mokonzi agangaki ete bábenga bato oyo babelelaka bilimo, Bakaladea* mpe banganga-minzoto.+ Mokonzi alobaki na bato ya bwanya ya Babilone boye: “Moto nyonso oyo akotánga makomi oyo mpe akopesa ngai ndimbola na yango, bakolatisa ye bilamba ya motane-bulé, bakotya shɛnɛti ya wolo na nkingo na ye+ mpe akoyangela, akozala moto ya misato na bokonzi.”+

8 Bongo bato nyonso ya bwanya ya mokonzi bakɔtaki, kasi bakokaki te kotánga makomi yango to kopesa mokonzi ndimbola na yango.+ 9 Na yango Mokonzi Beleshazare abangaki lisusu makasi mpe elongi na ye ekómaki lokola moto asili mai ná makila; bato na ye ya lokumu mpe basilaki mayele.+

10 Ntango mokonzi-mwasi* ayokaki maloba ya mokonzi mpe ya bato na ye ya lokumu, akɔtaki na ndako ya fɛti. Mokonzi-mwasi alobaki: “Ee Mokonzi, zalá na bomoi mpo na libela. Makanisi na yo ebangisa yo te, mpe langi ya loposo na yo ebongwana te. 11 Ezali na moto moko* na bokonzi na yo, oyo azali na elimo ya banzambe basantu. Na eleko ya tata na yo, bamonaki ete azali na mayele, bososoli mpe bwanya lokola bwanya ya banzambe.+ Tata na yo Mokonzi Nebukadenezare atyaki ye mokambi ya banganga-nzambe ya maji, ya bato oyo babelelaka bilimo, ya Bakaladea* mpe ya banganga-minzoto;+ tata na yo asalaki yango, Ee mokonzi. 12 Mpo Danyele, oyo mokonzi apesaki nkombo Beleteshazare,+ azalaki na elimo moko ya kokamwa, azalaki na boyebi mpe bososoli mpo na kopesa ndimbola ya bandɔtɔ, kolimbola basambole mpe kofungola makambo oyo ekangamá makasi.*+ Sikoyo, tindá bábenga Danyele, mpe akopesa yo ndimbola ya makomi yango.”

13 Bongo bamemaki Danyele liboso ya mokonzi. Mokonzi atunaki ye: “Ezali yo nde Danyele, moko ya bato ya Yuda oyo bamemamaki awa,+ oyo tata na ngai mokonzi abimisaki na Yuda?+ 14 Nayoki ete elimo ya banzambe ezali kati na yo,+ mpe ete ozali na mayele, bososoli mpe bwanya ya kokamwa.+ 15 Bamemelaki ngai bato ya bwanya mpe bato oyo babelelaka bilimo mpo bátánga makomi oyo, mpe bápesa ngai ndimbola na yango, kasi bakoki te kopesa ngai ndimbola na yango.+ 16 Nayoki ete yo okoki kopesa bandimbola+ mpe kofungola makambo oyo ekangamá makasi.* Sikoyo, soki okoki kotánga makomi oyo mpe kopesa ngai ndimbola na yango, bakolatisa yo bilamba ya motane-bulé, bakotya shɛnɛti ya wolo na nkingo na yo mpe okoyangela, okozala moto ya misato na bokonzi.”+

17 Danyele azongiselaki mokonzi ete: “Okoki kobomba makabo na yo, mpe kopesa biloko na yo epai ya bato mosusu. Kasi nakotángela mokonzi makomi oyo, mpe nakopesa ye ndimbola na yango. 18 Ee mokonzi, Nzambe Oyo-Aleki-Likoló ye moko apesaki tata na yo Nebukadenezare bokonzi ná bonene, ná lokumu mpe nkembo.+ 19 Mpo na bonene oyo Ye apesaki ye, bato ya bikólo nyonso, ya mboka nyonso mpe ya minɔkɔ nyonso bazalaki kolɛnga mpe kobanga liboso na ye.+ Azalaki koboma to kotika na bomoi moto oyo ye alingi, mpe azalaki kotombola to kokitisa moto oyo ye alingi.+ 20 Kasi ntango motema na ye ekómaki na lolendo mpe akómaki motó makasi, tii asalaki makambo na lofundo,+ alongolamaki na kiti ya bokonzi na ye, mpe lokumu na ye elongolamaki. 21 Babenganaki ye na kati ya bato, motema na ye ekómaki lokola ya nyama, mpe afandaki esika moko na bampunda ya zamba. Bazalaki kopesa ye matiti alya lokola bangɔmbɛ, mamwɛ ya likoló epɔlisaki nzoto na ye, tii ntango ayebaki ete Nzambe Oyo-Aleki-Likoló azali Moyangeli na bokonzi ya bato, mpe atyaka moto oyo ye alingi azala mokonzi na yango.+

22 “Kasi yo mwana na ye Beleshazare, omikitisi te na motema na yo, atako oyebaki nyonso wana. 23 Kasi omitomboli mpo na kotɛmɛla Nkolo ya likoló,+ mpe otindaki bámemela yo bisaleli* ya ndako na ye.+ Yo ná bato na yo ya lokumu, ná basi na yo mosusu mpe basi na yo ya pembeni bomɛlaki na yango, mpe bosanzolaki banzambe ya palata mpe ya wolo, ya kwivre, ya ebende, ya nzete mpe ya libanga; banzambe yango emonaka eloko te, eyokaka eloko te mpe eyebaka eloko te.+ Kasi Nzambe oyo asimbi mpema na yo+ mpe banzela na yo nyonso, opesi ye nkembo te. 24 Yango wana atindaki lobɔkɔ wana mpe ekomaki makambo oyo.+ 25 Makomi yango elobi boye: MENE, MENE, TEKELE mpe PARASINE.

26 “Talá ndimbola ya maloba yango: MENE: Nzambe atángi mikolo ya bokonzi na yo mpe asukisi yango.+

27 “TEKELE: bameki yo na kilo mpe bamoni ete ozali pɛpɛlɛ.

28 “PERESE: bakaboli bokonzi na yo mpe bapesi yango Bamede ná Baperse.”+

29 Bongo, Beleshazare apesaki mitindo, mpe balatisaki Danyele bilamba ya motane-bulé, batyaki shɛnɛti ya wolo na nkingo na ye, mpe bapanzaki nsango ete akokóma moyangeli ya misato na bokonzi.+

30 Kaka na butu yango, babomaki Mokonzi Beleshazare Mokaladea.+ 31 Mpe Dariuse+ Momede azwaki bokonzi; azalaki na mbula soki 62.