Epai ya Bagalatia
4 Nde nazali koloba ete ntango mozwi-ya-libula azali naino mwana moke, akeseni ata moke te na moombo, atako azali nkolo ya biloko nyonso, 2 kasi azali na mabɔkɔ ya bakapita mpe ya bato ya misala tii mokolo oyo tata na ye atyá. 3 Ndenge moko mpe biso, ntango tozalaki bana mike, tozalaki baombo ya makambo mikemike ya mokili.+ 4 Kasi lokola ntango yango ekokaki, Nzambe atindaki Mwana na ye, oyo mwasi moko abotaki+ mpe oyo azalaki na nse ya mibeko,+ 5 mpo alongola baoyo bazalaki na nse ya mibeko mpe asikola bango,+ bongo biso mpe Nzambe azwa biso mpe akómisa biso bana na ye.+
6 Nzokande lokola bozali bana, Nzambe atindi elimo+ ya Mwana na ye na mitema na biso+ mpe ezali koganga ete: “Aba,* Tata!”+ 7 Yango wana, ozali lisusu moombo te kasi mwana; mpe soki ozali mwana, ozali mpe mozwi-ya-libula na lisalisi ya Nzambe.+
8 Nzokande, ntango boyebaki Nzambe te, bozalaki baombo ya baoyo bazali mpenza banzambe te. 9 Kasi sikoyo lokola boyebi Nzambe, to lokola Nzambe ayebi bino, ndenge nini bozali lisusu kozongela makambo mikemike ya mpamba+ mpe oyo ezangá ntina mpe bolingi lisusu kozala baombo na yango?+ 10 Bozali kotosa na likebi mpenza mikolo, basanza,+ bileko mpe bambula. 11 Nazali kobangela bino, mpo mbala mosusu milende oyo nasali mpo na kosalisa bino ezali kaka mpamba.
12 Bandeko, nabondeli bino, bókóma ndenge ngai nazali, mpo ngai nazalaki mpe ndenge bino bozali.+ Bosalaki ngai mabe moko te. 13 Kasi boyebi ete ezali mpo na maladi na nzoto nde nazwaki libaku ya liboso ya kosakwela bino nsango malamu. 14 Atako maladi na ngai etyaki bino na komekama, boyinaki ngai te mpe boyokaki ngai mpii te;* kasi boyambaki ngai lokola anzelu ya Nzambe, lokola Kristo Yesu. 15 Wapi bolamu yango oyo bozwaki? Mpo nazali kopesela bino litatoli ete, soki likoki ezalaki, bolingaki ata kolongola miso na bino mpe kopesa ngai yango.+ 16 Bongo sikoyo, nakómi monguna na bino mpo nazali koloba na bino solo? 17 Mibali oyo bazali kosala nyonso oyo ekoki mpo na koyiba mitema na bino, kasi ezali te mpo na koluka bolamu na bino; ezali nde mpo balingi kokabola ngai na bino, mpo bózala na mposa makasi ya kolanda bango. 18 Ezalaka ntango nyonso malamu moto aluka na molende kozwa bino soki ezali na likanisi ya malamu, mpe soki ezali te kaka ntango nazali elongo na bino, 19 bana na ngai ya mike,+ mpo na bino lisusu nazali koyoka mpasi lokola oyo mwasi ayokaka ntango azali kobota. Mpe nakokoba koyoka mpasi yango tii bokomonisa bomoto ya Kristo. 20 Soki nazalaka ata elongo na bino na ngonga oyo mpe soki nakokaki kosolola na bino na ndenge mosusu! Mpo mayele esili ngai mpo na bino.
21 Bóyebisa ngai, bino baoyo bolingi kozala na nse ya mibeko: Boyokaka te oyo Mibeko elobi? 22 Na ndakisa, ekomamá ete Abrahama azalaki na bana mibali mibale, moko na mwana mwasi ya mosala+ mpe moko na mwasi ya nsomi;+ 23 kasi mwana ya mwana mwasi ya mosala abotamaki mpenza ndenge bato babotamaka,*+ oyo ya mwasi ya nsomi abotamaki na nzela ya elaka moko.+ 24 Makambo wana ezali elilingi: mpo basi wana balakisi kondimana mibale; moko ya Ngomba Sinai,+ oyo ezali kobota bana mpo bázala baombo, mpe yango nde Agare. 25 Nzokande Agare yango ezali komonisa Sinai,+ ngomba moko na Arabia, mpe akokani na Yerusaleme lelo oyo, mpo azali na boombo elongo na bana na ye. 26 Kasi Yerusaleme mboka ya likoló azali na bonsomi, mpe azali mama na biso.
27 Mpo ekomamá boye: “Sepelá, yo mwasi ekomba oyo obotaka te; gangá makasi na esengo, yo mwasi oyo oyokaka mpasi ya kobota te; mpo bana ya mwasi oyo asundolamá bazali ebele mpenza koleka bana ya oyo azali na mobali.”+ 28 Nzokande bino, bandeko, bozali bana ya elaka ndenge moko na Yisaka.+ 29 Kaka ndenge mwana oyo abotamaki ndenge bato nyonso babotamaka* abandaki konyokola mwana oyo abotamaki na ndenge ya elimo+ na ntango wana, ezali mpe bongo sikoyo.+ 30 Nzokande, Likomami elobi nini? Elobi ete: “Benganá mwana mwasi ya mosala ná mwana na ye, mpo mwana ya mwana mwasi ya mosala akozwa ata moke te libula elongo na mwana ya mwasi ya nsomi.”+ 31 Na yango, bandeko, biso tozali bana ya mwana mwasi ya mosala te, kasi ya mwasi ya nsomi.