Mokanda ya mibale ya

5 Naamane azalaki komanda ya basoda ya mokonzi ya Siri mpe azalaki moto ya lokumu. Mokonzi ya Siri* azalaki kolinga ye mingi, mpo na nzela na ye nde Yehova apesaki Siri elonga.* Naamane azalaki elombe ya etumba, atako azalaki na maladi ya maba.* 2 Mokolo moko, ntango bato ya Siri bakendaki kobundisa Yisraele, bakangaki mwana mwasi moko ya moke mpe mwana yango akómaki mosaleli ya mwasi ya Naamane. 3 Bongo mwana yango alobaki na nkolo na ye ya mwasi boye: “Soki nkolo na ngai akendaka ata epai ya mosakoli+ na Samaria! Mbɛlɛ abikisi ye na maladi na ye ya maba!”+ 4 Bongo akendaki* koyebisa nkolo na ye makambo oyo mwana yango alobaki.

5 Na yango mokonzi ya Siri alobaki na Naamane: “Kende kaka sikoyo! Nakopesa yo mokanda mpo omemela mokonzi ya Yisraele.” Bongo Naamane akendaki mpe amemaki talanta* zomi ya palata, shekele 6 000 ya wolo, mpe bilamba mosusu zomi. 6 Amemelaki mokonzi ya Yisraele mokanda yango, oyo elobaki: “Nzela moko na mokanda oyo, natindeli yo mosaleli na ngai Naamane mpo obikisa ye na maladi na ye ya maba.” 7 Ntango kaka mokonzi ya Yisraele atángaki mokanda yango, apasolaki bilamba na ye mpe alobaki: “Ngai nazali nde Nzambe, mpo naboma mpe nabatela na bomoi?+ Atindeli ngai moto oyo mpe alobi nabikisa ye na maladi na ye ya maba! Bótala bino moko ndenge azali kolukela ngai makambo.”

8 Kasi ntango Elisha moto ya Nzambe ya solo ayokaki ete mokonzi ya Yisraele apasoli bilamba na ye, na mbala moko, atindelaki ye maloba oyo: “Mpo na nini opasoli bilamba na yo? Nabondeli yo, tindá moto yango epai na ngai mpo ayeba ete ezali na mosakoli moko awa na Yisraele.”+ 9 Bongo Naamane ayaki na bampunda na ye mpe makalo na ye ya bitumba, mpe atɛlɛmaki liboso ya ekɔtelo ya ndako ya Elisha. 10 Kasi Elisha atindaki momemi-nsango moko ayebisa ye: “Kende kosukola mbala nsambo+ na ebale Yordani,+ mpe loposo ya nzoto na yo ekozonga lisusu malamu, mpe okokóma pɛto.” 11 Bongo Naamane asilikaki mpe abandaki kokende, azali koloba: “Nakanisaki ete, ‘Akobima, akoya mpe akotɛlɛma awa liboso na ngai. Nsima na yango akobondela* Yehova Nzambe na ye, mpe akolekisa lobɔkɔ na ye na bisika oyo maladi ya maba ezali mpo nabika.’ 12 Bibale ya Damasi,+ Abana mpe Farapare, eleki bibale nyonso ya Yisraele te? Nakoki kosukola kuna te mpo nakóma pɛto?” Bongo abalukaki mpe akendaki na nkanda makasi.

13 Kasi basaleli na ye bapusanaki pene na ye mpe balobaki na ye: “Mokonzi,* soki mosakoli asɛngaka yo likambo moko ya mpasi, olingaki kosala yango, boye te? Sikoyo lokola alobi na yo kaka okende kosukola mpo okóma pɛto, mpo na nini te osala yango?” 14 Na yango, Naamane akitaki na Yordani mpe amizindisaki na ebale yango mbala nsambo, ndenge moto ya Nzambe ya solo alobaki.+ Bongo, loposo ya nzoto na ye ezongaki lisusu malamu lokola ya mwana moke,+ mpe akómaki pɛto.+

15 Nsima na yango, Naamane azongaki epai ya moto ya Nzambe ya solo,+ elongo na bato nyonso oyo bazalaki na ye.* Naamane atɛlɛmaki liboso na ye mpe alobaki: “Sikoyo nandimi ete na mabele mobimba, Nzambe azali na esika mosusu te, kaka na Yisraele.+ Sikoyo nabondeli yo, ndimá likabo* oyo ngai mosaleli na yo namemeli yo.” 16 Kasi Elisha alobaki na ye: “Lokola Yehova, Nzambe oyo nazali kosalela* azali solo na bomoi, nakondima yango te.”+ Naamane atyaki ye mbamba mpo andima kozwa yango, kasi Elisha aboyaki kaka. 17 Nsukansuka Naamane alobaki: “Lokola oboyi, nabondeli yo, tiká bápesa ngai mosaleli na yo mwa mabele ya Yisraele, oyo bampunda mibale ekoki komema, mpo nakopesa lisusu makabo ya kotumba to mbeka epai ya banzambe mosusu te, kaka epai ya Yehova. 18 Kasi, tiká Yehova alimbisa ngai mosaleli na yo mpo na likambo oyo: Ntango nkolo na ngai mokonzi akɔtaka na tempelo* ya nzambe Rimone mpo na kogumbama kuna, asimbaka lobɔkɔ na ngai. Na yango, esɛngaka nagumbama na tempelo ya Rimone. Ntango nakogumbama na tempelo ya Rimone, tiká Yehova alimbisa ngai mpo na likambo yango.” 19 Na yango Elisha alobaki na ye: “Kende na kimya.” Ntango Naamane atikaki ye, akendaki mpe akómaki mwa mosika, 20 Gehazi+ mosaleli ya Elisha moto ya Nzambe ya solo+ alobaki na nse ya motema: ‘Sikoyo, nkolo na ngai atiki Naamane+ moto oyo ya Siri akende mpe aboyi kozwa biloko oyo ayaki na yango. Lokola Yehova azali solo na bomoi, nakolanda ye mbangu mpo nazwa mwa eloko epai na ye.’ 21 Bongo Gehazi alandaki Naamane. Ntango Naamane amonaki moto azali kolanda ye mbangu, akitaki na likalo na ye mpo na kokutana na ye mpe atunaki ye: “Boni, likambo nini?” 22 Gehazi ayanolaki: “Likambo ezali te. Nkolo na ngai atindi ngai mpe alobi: ‘Talá! Kaka sikoyo bilenge mibali mibale oyo bazali bana ya basakoli bayei epai na ngai, bauti na etúká ya ngombangomba ya Efraime. Nabondeli yo, pesá bango talanta moko ya palata mpe bilamba mibale.’”+ 23 Naamane alobaki: “Kamatá, zwá talanta mibale.” Atyaki Gehazi mbamba,+ mpe alíngaki talanta mibale ya palata na kati ya saki mibale, ná bilamba mibale. Apesaki yango basaleli na ye mibale mpe bamemaki yango liboso ya Gehazi.

24 Ntango Gehazi akómaki na Ofɛlɛ,* azwaki biloko yango na mabɔkɔ na bango mpe atyaki yango na ndako na ye. Na nsima, ayebisaki mibali yango bákende. Ntango bakendaki, 25 Gehazi azongaki mpe atɛlɛmaki liboso ya nkolo na ye. Bongo Elisha atunaki ye: “Gehazi, outi wapi?” Ayanolaki: “Nakendaki epai te, nkolo na ngai.”+ 26 Elisha alobaki na ye: “Motema na ngai ezalaki kuna elongo na yo te, ntango mobali wana akitaki na likalo na ye mpo na kokutana na yo? Oyo nde ntango ya kondima palata to kondima bilamba to bilanga ya olive to bilanga ya vinyo to bampate to bangɔmbɛ to basaleli ya mibali to ya basi?+ 27 Sikoyo, maba+ ya Naamane ekokangama na yo mpe bakitani na yo libela na libela.” Na mbala moko, Gehazi akómaki na maba, mpɛmbɛ lokola nɛjɛ,+ mpe alongwaki liboso na ye.