Yobo
32 Bongo mibali yango misato batikaki koluka koyanola Yobo, mpo amindimisaki ete azalaki sembo.*+ 2 Kasi Elihu mwana ya Barakele Mobuze+ na libota ya Rame ayokaki nkanda makasi. Nkanda na ye engalelaki Yobo mpo alukaki komimonisa sembo na esika ya Nzambe.+ 3 Lisusu, ayokelaki baninga misato ya Yobo nkanda makasi mpo ata moko te azwaki eyano ya kopesa mpe batángaki Nzambe moto mabe.+ 4 Elihu azalaki kozela mpo ayanola Yobo, mpamba te bango bazalaki mikóló na ye.+ 5 Ntango Elihu amonaki ete mibali yango misato bazalaki na eyano ya kopesa te, nkanda na ye engalaki makasi. 6 Bongo Elihu mwana ya Barakele Mobuze ayanolaki ete:
Yango wana na limemya nyonso nalingaki koloba te,+
Naboyaki koyebisa bino oyo nayebi.
7 Nakanisaki boye: ‘Tiká mikóló báloba,
Mpe tiká baoyo bazali na bambula ebele bábimisa bwanya.’
9 Ezali mbula* te nde esalaka ete moto azala na bwanya,
Kaka mikóló te nde bayebaka nini ezali sembo.+
10 Yango wana nalobi: ‘Yoká ngai,
Mpe nakoyebisa yo oyo nayebi.’
11 Talá! Nazelaki maloba na bino;
Nakobaki koyoka makanisi na bino+
Wana bozalaki koluka makambo ya koloba.+
12 Natyaki mpenza likebi epai na bino,
Kasi moto moko te amonisaki ete Yobo azali na libunga*
To ayanoli na maloba na ye.
13 Na yango bóloba te ete: ‘Tozwi bwanya;
Nzambe nde azali kosembola ye, kasi moto te.’
14 Azalaki koloba na ngai te,
Boye nakoyanola ye na maloba na bino te.
15 Bayoki nsɔmɔ, bayanoli lisusu te;
Bazali lisusu na likambo ya koloba te.
16 Nazeli, kasi bazali koloba lisusu te;
Batɛlɛmi kaka wana, bayanoli lisusu te.
17 Na yango, ngai mpe nakoyanola;
Ngai mpe nakoloba oyo nayebi,
18 Mpo nazali na makambo ebele ya koloba;
Elimo oyo ezali kati na ngai nde ezali kotinda ngai.
19 Kati na ngai ezali lokola vinyo oyo ezangi nzela ya kobimisa mopɛpɛ,
Lokola milangi ya sika ya mposo ya nyama oyo elingi kopasuka.+
20 Tiká naloba mpo nayoka malamu!
Nakofungola mbɛbu na ngai mpe nakopesa eyano.