Ruta
3 Mokolo moko, Naomi, mama-bokilo ya Ruta, alobaki na ye: “Mwana na ngai, nasengeli kolukela yo esika ya kopema*+ mpo makambo na yo etambola malamu. 2 Boaze azali ndeko na biso.+ Bilenge basi oyo ozalaki elongo na bango bazali basaleli na ye. Na butu ya lelo azali kopupola ɔrje na esika ya kotutatuta mbuma. 3 Sikoyo, sukolá nzoto na yo mpe pakolá mafuta ya nsolo kitoko; na nsima latá bilamba na yo ya kitoko* mpe kende na esika ya kotutatuta mbuma. Salá ete mobali yango ayeba te ete ozali wana tii ntango akosilisa kolya mpe komɛla. 4 Ntango akolala, talá esika oyo akolala. Na nsima, kende mpe longolá elamba oyo ezipi makolo na ye mpe lalá wana. Akoyebisa yo nini osengeli kosala.”
5 Bongo Ruta ayanolaki: “Nakosala nyonso oyo olobi na ngai.” 6 Na yango, akitaki na esika ya kotutatuta mbuma mpe asalaki makambo nyonso oyo mama-bokilo na ye ayebisaki ye asala. 7 Na ntango yango, Boaze azalaki kolya mpe komɛla, mpe motema na ye ezalaki na esengo. Na nsima akendaki kolala pembeni ya esika oyo basopaka mbuma oyo babuki.* Nsima na yango, Ruta ayaki malɛmbɛmalɛmbɛ, alongolaki elamba oyo ezipaki makolo ya Boaze mpe alalaki wana. 8 Na midi ya butu, mobali yango abandaki kolɛnga na malili. Na yango alamukaki, afandaki, mpe amonaki mwasi moko alali pene na makolo na ye. 9 Atunaki boye: “Yo nani?” Azongisaki: “Ngai Ruta, moombo na yo. Zipá moombo na yo nsɔngɛ ya elamba na yo, mpo ozali mosikoli.”+ 10 Bongo Boaze alobaki: “Tiká Yehova apambola yo, mwana na ngai. Mbala oyo, omonisi bolingo na yo ya sembo mingi koleka ndenge omonisaki yango mbala ya liboso,+ na ndenge olandi te bilenge mibali, ezala babola to bazwi. 11 Mpe sikoyo, mwana na ngai, kobanga te. Nakosalela yo nyonso oyo olobi,+ mpo moto nyonso na engumba* ayebi ete ozali mwasi malamu mpenza. 12 Atako ezali solo ete nazali mosikoli,+ ezali na mosikoli mosusu oyo azali ndeko ya penepene koleka ngai.+ 13 Lalá awa na butu ya lelo, mpe na ntɔngɔ, soki alingi kosikola yo, malamu! Asikola yo.+ Kasi soki alingi kosikola yo te, lokola Yehova azali solo na bomoi, ngai moko nakosikola yo. Lalá awa tii na ntɔngɔ.”
14 Bongo alalaki pene na makolo na ye tii na ntɔngɔ. Mpe na nsima alamukaki ntango mwa molili ezalaki naino, mpo moto moko te amona ye. Nsima na yango, Boaze alobaki na ye: “Bato báyeba te ete mwasi moko ayaki na esika ya kotutatuta mbuma.” 15 Alobaki lisusu: “Yaká na kazaka oyo olati, simbá yango mpe fungolá yango.” Bongo Ruta asimbaki yango mpe afungolaki yango, mpe Boaze atyaki na kati mezire motoba* ya ɔrje mpe amemisaki ye yango. Nsima na yango, Boaze akendaki na engumba.
16 Ntango Ruta azongaki na ndako, mama-bokilo na ye atunaki ye: “Makambo eleki ndenge nini mpo na yo,* mwana na ngai?” Ruta ayebisaki ye makambo nyonso oyo mobali yango asalelaki ye. 17 Alobaki lisusu: “Apesi ngai mezire oyo motoba ya ɔrje, mpe alobaki na ngai: ‘Kozonga epai ya mama-bokilo na yo mabɔkɔ mpamba te.’” 18 Bongo Naomi alobaki na ye: “Fandá awa, mwana na ngai, kino okoyeba ndenge likambo oyo ekosuka, mpo mobali yango akopema te tii ntango akosilisa likambo yango lelo.”