Kobima

13 Yehova alobaki lisusu na Moize ete: 2 “Santiselá ngai* mwana mobali nyonso ya liboso* kati na Bayisraele. Mwana ya liboso ya mobali oyo akobotama, ezala ya moto to ya nyama, azali ya ngai.”+

3 Na nsima, Moize alobaki na bato ete: “Bókanisaka mokolo oyo bobimi na Ezipito,+ esika oyo bozalaki baombo,* mpo na nguya ya lobɔkɔ na ye nde Yehova abimisaki bino awa.+ Bongo bokolya eloko moko te oyo etyami levire. 4 Bozali kobima lelo, na sanza ya Abibe.*+ 5 Ntango Yehova akokɔtisa bino na mokili ya Bakanana, Bahiti, Baamore, Bahivi mpe Bayebusi,+ oyo alapelaki bankɔkɔ na yo ndai ete akopesa yo,+ mokili oyo etondi na miliki mpe na mafuta ya nzoi,+ bongo osengeli kokoba kosala molulu oyo ya losambo na sanza oyo. 6 Okolya limpa ezangá levire mikolo nsambo,+ mpe na mokolo ya nsambo ekozala fɛti mpo na Yehova. 7 Limpa ezangá levire ekolyama mikolo yango nsambo;+ mpe eloko moko te oyo etyami levire ekozala epai na yo,+ mpe pɔtɔpɔtɔ ya farini ya ngayi ekozala te epai na yo na teritware* na yo mobimba. 8 Mpe osengeli koyebisa mwana na yo na mokolo yango ete: ‘Ezali mpo na likambo oyo Yehova asalelaki ngai ntango nabimaki na Ezipito.’+ 9 Mpe yango ekozala elembo na lobɔkɔ na yo mpe ekaniseli* na elongi na yo,+ mpo ete mobeko ya Yehova ezala na monɔkɔ na yo, mpo na nguya ya lobɔkɔ na ye nde Yehova abimisaki yo na Ezipito. 10 Osengeli kobatela mobeko oyo mbula na mbula na ntango oyo etyami mpo na yango.+

11 “Ntango Yehova akokɔtisa yo na mokili ya Bakanana, oyo alapelaki yo ná bankɔkɔ+ na yo ndai ete akopesa yo, 12 osengeli kopesa Yehova mwana nyonso ya mobali ya liboso,* ezala mwana mobali ya liboso ya etonga oyo ozwi. Bana mibali bazali ya Yehova.+ 13 Mwana nyonso ya liboso ya mpunda okosikola yango na mpate, mpe soki osikoli yango te, osengeli kobuka nkingo na yango. Mpe okosikola mwana mobali nyonso ya liboso ya bana na yo.+

14 “Soki na nsima mwana na yo atuni yo ete: ‘Likambo oyo elimboli nini?’ bongo osengeli koloba na ye ete: ‘Yehova abimisaki biso na Ezipito, na ndako ya boombo,+ na nguya ya lobɔkɔ na ye. 15 Ntango Farao atyaki motó makasi, aboyaki kotika biso tókende,+ Yehova abomaki mwana nyonso ya liboso na mokili ya Ezipito, banda na mwana ya liboso ya moto tii na mwana ya liboso ya nyama.+ Yango wana nazali kopesa Yehova mbeka ya bana mibali nyonso ya liboso,* mpe nakosikola mwana nyonso ya liboso ya bana na ngai.’ 16 Yango esengeli kozala elembo na lobɔkɔ na yo mpe na elongi na yo,+ mpo na nguya ya lobɔkɔ na ye nde Yehova abimisaki biso na Ezipito.”

17 Sikoyo ntango Farao atikaki bato bákende, Nzambe akambaki bango te na nzela ya mokili ya Bafilistia atako yango ezalaki pene. Mpo Nzambe alobaki ete: “Bato bakoki kobongola makanisi na bango ntango bakokutana na etumba mpe bakozonga na Ezipito.” 18 Na yango, Nzambe asalaki ete bato bábaluka na nzela ya esobe ya Mbu Motane.+ Mpe Bayisraele babimaki na mokili ya Ezipito na molɔngɔ lokola basoda. 19 Moize amemaki mpe mikuwa ya Yozefe elongo na ye, mpo Yozefe alapisaki bana ya Yisraele ndai ya monene na maloba oyo: “Nzambe akotyela bino mpenza likebi, mpe bosengeli kolongola mikuwa na ngai na esika oyo mpe komata na yango elongo na bino.”+ 20 Balongwaki na Sukote mpe bakendaki kotya kaa na Etame, na ndelo ya esobe.

21 Sikoyo, Yehova azalaki kotambola liboso na bango na moi na kati ya likonzí ya lipata mpo na kokamba bango na nzela,+ mpe na butu na kati ya likonzí ya mɔtɔ mpo na kopesa bango pole mpo bákoka kotambola na moi mpe na butu.+ 22 Likonzí ya lipata ezalaki kolongwa te liboso ya bato na moi, ezala mpe likonzí ya mɔtɔ na butu.+