Kobima

37 Na yango, Bezalele+ asalaki Sanduku+ na nzete ya akasia. Ezalaki mapeko* mibale na ndambo na molai, mpe lipeko moko na ndambo na monene, mpe bosanda na yango lipeko moko na ndambo.+ 2 Azipaki yango na wolo ya pɛto na kati mpe na libándá mpe asalaki ndelo* ya wolo zingazinga na yango.+ 3 Na nsima, asalelaki yango mpɛtɛ minei na wolo oyo enyangwisami, mpo na kotya yango na likoló ya makolo na yango minei, mpɛtɛ mibale na ngámbo na yango moko mpe mpɛtɛ mibale na ngámbo na yango mosusu. 4 Na nsima asalaki banzete ya komema yango na nzete ya akasia mpe azipaki yango na wolo.+ 5 Bongo akɔtisaki banzete yango na mpɛtɛ oyo ezali na mipanzi ya Sanduku mpo na komemaka na yango Sanduku.+

6 Asalaki ezipeli na wolo ya pɛto.+ Ezalaki mapeko mibale na ndambo na molai, mpe lipeko moko na ndambo na monene.+ 7 Asalaki bakeruba mibale+ ya wolo oyo ebɛtami na marto na nsuka mibale ya ezipeli.+ 8 Keruba moko ezalaki na nsuka oyo, mpe keruba mosusu na nsuka oyo. Asalaki bakeruba likoló ya ezipeli na nsuka na yango mibale. 9 Bakeruba esembolaki mapapu na yango mibale likoló, mapapu na yango ezipaki ezipeli.+ Bakeruba yango etalanaki, mpe bilongi na yango etalaki ezipeli.+

10 Na nsima asalaki mesa na nzete ya akasia.+ Ezalaki mapeko mibale na molai, lipeko moko na monene, mpe bosanda na yango ezalaki lipeko moko na ndambo.+ 11 Mpe azipaki yango na wolo ya pɛto mpe asalaki ndelo* ya wolo zingazinga na yango. 12 Na nsima zingazinga na yango asalaki monɔkɔ, oyo ezali na monene ya tandu moko* na likoló mpe zingazinga ya monɔkɔ ya mesa yango asalaki ndelo* ya wolo. 13 Lisusu, asalelaki yango mpɛtɛ minei ya wolo mpe atyaki mpɛtɛ yango likoló ya nsuka minei esika makolo minei ekangisamaki. 14 Mpɛtɛ ezalaki pene na monɔkɔ yango, mpo ezala bisimbeli ya banzete ya komema na yango mesa. 15 Na nsima asalaki banzete yango na nzete ya akasia mpe azipaki yango na wolo mpo na komemaka na yango mesa. 16 Nsima na yango, na wolo ya pɛto, asalaki bisaleli ya kotya likoló ya mesa: basaani na yango, bakɔpɔ na yango, mabakuli na yango, mpe bilokó oyo bazalaki kosalela mpo na kosopa makabo ya masanga.+

17 Na nsima, asalaki etɛlɛmiselo ya miinda+ na wolo ya pɛto. Asalaki etɛlɛmiselo ya miinda eloko oyo ebɛtami na marto. Eteni na yango ya nse, nzete na yango, bakɔpɔ na yango, bambuma na yango mpe bafololo na yango ezalaki eteni kaka moko.+ 18 Bitape motoba eutaki na nzete ya etɛlɛmiselo ya miinda: bitape misato na mopanzi na yango moko mpe bitape misato na mopanzi na yango mosusu. 19 Kɔpɔ misato oyo esalemi lokola bafololo ya nzete ya amande ezalaki na mokomoko ya bitape ya mopanzi moko, ná mbuma mpe bafololo oyo elandani, awa mbuma awa fololo; mpe bakɔpɔ misato oyo esalemi lokola bafololo ya nzete ya amande ezalaki likoló ya mokomoko ya bitape ya mopanzi oyo mosusu, ná mbuma mpe bafololo oyo elandani, awa mbuma awa fololo. Ndenge wana nde bitape motoba eutaki na nzete ya etɛlɛmiselo ya miinda yango. 20 Mpe likoló ya nzete ya etɛlɛmiselo ya miinda ezalaki na bakɔpɔ minei oyo esalemi lokola bafololo ya nzete ya amande, ná mbuma na yango mpe bafololo na yango oyo elandani, awa mbuma awa fololo. 21 Mbuma ezalaki na nse ya bitape mibale ya ebandeli oyo eutaki na nzete mpe mbuma na nse ya bitape mibale oyo elandi mpe mbuma na nse ya bitape mosusu mibale oyo ya nsuka, mpo na bitape motoba oyo eutaki na nzete ya etɛlɛmiselo ya miinda. 22 Bambuma, bitape mpe bitɛlɛmiselo ya miinda mobimba ezalaki eteni kaka moko ya wolo ya pɛto, oyo ebɛtami na marto. 23 Na nsima asalaki miinda na yango nsambo,+ bapɛnsi na yango ya mike mpe biloko na yango ya kotya mɔtɔ oyo ezalaki ya wolo ya pɛto. 24 Na talanta* moko ya wolo ya pɛto asalaki etɛlɛmiselo ya miinda ná bisaleli na yango nyonso.

25 Bongo asalaki etumbelo ya mpaka ya malasi+ na nzete ya akasia. Ezalaki karé, lipeko moko na molai, lipeko moko na monene mpe bosanda na yango mapeko mibale. Elongo na maseke na yango esalaki eteni kaka moko.+ 26 Azipaki yango na wolo ya pɛto: etando na yango ya likoló, mipanzi na yango nyonso ya zingazinga, ná maseke na yango, mpe asalaki ndelo* ya wolo zingazinga na yango. 27 Asalelaki yango mpɛtɛ mibale ya wolo na nse ya ndelo* na yango, na mipanzi mibale oyo etalani, mpo na kokɔtisa banzete ya komemela yango. 28 Nsima na yango, asalaki banzete ya komema na nzete ya akasia mpe azipaki yango na wolo. 29 Asalaki mpe mafuta mosantu+ mpo na kotyaka mafuta mpe mpaka ya malasi ya pɛto, ya nsolo kitoko,+ oyo mokomoko na yango esangisamaki malamu mpenza.*