Kobima

9 Bongo Yehova alobaki na Moize ete: “Kɔtá epai ya Farao mpe lobá na ye boye: ‘Yehova Nzambe ya Baebre alobi ete: “Tiká bato na ngai bákende mpo básalela ngai.+ 2 Kasi soki oboyi kotika bango bákende mpe ozali kaka kokanga bango, 3 talá! Lobɔkɔ ya Yehova+ ekoyela bibwɛlɛ na yo oyo ezali na elanga. Maladi mabe+ ekozwa bafarasa, bampunda, bakamela, bitonga ya bangɔmbɛ mpe bitonga ya bampate. 4 Mpe Yehova akosala mpenza ete bokeseni ezala kati na bibwɛlɛ ya Yisraele mpe bibwɛlɛ ya Ezipito, mpe ata ebwɛlɛ moko te ya Bayisraele ekokufa.”’”+ 5 Lisusu, Yehova atye ntango na maloba oyo: “Lobi, ngai, Yehova nakosala likambo yango na mokili oyo.”

6 Mpe Yehova asalaki likambo yango na mokolo mpenza oyo elandaki, mpe bibwɛlɛ ya ndenge nyonso na Ezipito ebandaki kokufa,+ kasi ebwɛlɛ ata moko te ya Bayisraele ekufaki. 7 Ntango Farao atunaki, bayebisaki ye ete ata ebwɛlɛ moko te ya Yisraele ekufaki. Atako bongo, motema ya Farao ezalaki kaka kokóma makasi, mpe atikaki bato bákende te.+

8 Na nsima, Yehova alobaki na Moize ná Arona ete: “Bótondisa mabɔkɔ na bino mibale na putulu ya milinga oyo euti na mombonda, mpe Moize asengeli kobwaka yango na mopɛpɛ liboso ya Farao. 9 Mpe yango ekokóma putulu na mokili mobimba ya Ezipito, mpe yango ekokóma babibɔ oyo ezali kobimisa tofina* na nzoto ya bato mpe ya banyama na mokili mobimba ya Ezipito.”

10 Bongo bazwaki putulu ya milinga oyo euti na mombonda mpe batɛlɛmaki liboso ya Farao, mpe Moize abwakaki yango na mopɛpɛ, mpe ekómaki babibɔ oyo ezali kobimisa tofina* na nzoto ya bato mpe ya banyama. 11 Mpe banganga-nzambe ya maji bakokaki te kotɛlɛma liboso ya Moize mpo na babibɔ, mpamba te babibɔ ebimaki banganga-nzambe ya maji mpe Baezipito nyonso.+ 12 Kasi Yehova atikaki motema ya Farao ekóma makasi, mpe ayokelaki bango te, kaka ndenge Yehova alobaki na Moize.+

13 Bongo Yehova alobaki na Moize ete: “Lamuká ntɔngɔntɔngɔ mpe tɛlɛmá liboso ya Farao, mpe lobá na ye boye: ‘Talá oyo Yehova Nzambe ya Baebre alobi: “Tiká bato na ngai bákende mpo básalela ngai. 14 Mpo sikoyo, nazali kotindela yo, ná basaleli na yo mpe bato na yo bitumbu na ngai nyonso, mpo oyeba ete moto mosusu lokola ngai azali te na mabele mobimba.+ 15 Nakokaki ata kosembola lobɔkɔ na ngai mpe kotindela yo ná bato na yo maladi moko makasi, mpe bolingaki kosila na mabele. 16 Kasi, soki natiki yo ozala na bomoi ezali mpo nalakisa yo nguya na ngai mpe mpo nkombo na ngai esakolama na mabele mobimba.+ 17 Ozali kaka kosala lolendo mpe kotɛmɛla bato na ngai ndenge ozali koboya kotika bango bákende? 18 Talá, lobi na ngonga oyo, nakonɔkisa mbula ya mabanga ya makasi mpenza, mbula ya ndenge wana enɔká naino te na Ezipito banda mokolo oyo yango esalemá kino lelo. 19 Sikoyo, tindá bato bákende kobomba bibwɛlɛ na yo nyonso mpe biloko na yo nyonso oyo ezali na elanga. Moto nyonso mpe nyama nyonso oyo akozala na elanga mpe oyo akozala na ndako te, mbula ya mabanga ekokwela ye, mpe akokufa.”’”

20 Moto nyonso kati na basaleli ya Farao oyo abangaki liloba ya Yehova akimisaki basaleli na ye mpe bibwɛlɛ na ye na bandako, 21 kasi moto nyonso oyo atyaki likebi te na liloba ya Yehova, atikaki basaleli na ye mpe bibwɛlɛ na ye na elanga.

22 Sikoyo Yehova alobaki na Moize ete: “Sembolá lobɔkɔ na yo na likoló, mpo mbula ya mabanga ekitela mokili mobimba ya Ezipito,+ moto ná nyama mpe molona nyonso ya elanga na mokili ya Ezipito.”+ 23 Bongo Moize asembolaki lingenda na ye na likoló, mpe Yehova atindaki bankake ná mbula ya mabanga, mpe mɔtɔ* ekitaki na mabele, mpe Yehova azalaki kaka konɔkisa mbula ya mabanga na mokili ya Ezipito. 24 Mbula ya mabanga enɔkaki, mpe mɔtɔ ezalaki kobimabima na kati ya mbula ya mabanga. Mbula yango ezalaki mpenza makasi; mbula ya ndenge wana enɔká naino te na mokili mobimba ya Ezipito banda ntango ekómaki ekólo.+ 25 Mbula ya mabanga ezalaki kobɛta eloko nyonso na elanga na mokili mobimba ya Ezipito, banda na moto tii na nyama, mpe ebebisaki milona ya ndenge nyonso mpe ebukaki banzete nyonso ya elanga.+ 26 Kaka na mokili ya Goshene, epai Bayisraele bazalaki, nde mbula ya mabanga enɔkaki te.+

27 Na yango, Farao abengaki Moize ná Arona mpe alobaki na bango ete: “Nasali lisumu na mbala oyo. Yehova azali sembo, mpe ngai ná bato na ngai tosali mabe. 28 Bóbondela Yehova mpo bankake mpe mbula ya mabanga ya Nzambe esila. Boye nakotika bino bókende, mpe bokotikala awa lisusu te.” 29 Na yango, Moize alobaki na ye ete: “Ntango kaka nakobima na engumba, nakotanda mabɔkɔ na ngai epai ya Yehova. Bankake ekosila mpe mbula ya mabanga ekozala lisusu te, mpo oyeba ete mabele ezali ya Yehova.+ 30 Kasi nayebi ete ata na ntango yango, yo ná basaleli na yo bokobanga Yehova Nzambe te.”

31 Sikoyo, lini ná ɔrje ebebisamaki, mpo ɔrje ezalaki kobimisa mitó mpe lini ezalaki kobimisa bafololo. 32 Kasi blé mpe blé ya mposo makasi ebebisamaki te, mpo yango ebimaka na nsima. 33 Sikoyo Moize alongwaki liboso ya Farao mpe abimaki na engumba mpe atandaki mabɔkɔ na ye liboso ya Yehova, mpe bankake ná mbula ya mabanga ekatanaki mpe mbula etikaki konɔka na mabele.+ 34 Ntango Farao amonaki ete mbula, mbula ya mabanga mpe nkake ekataki, asalaki lisusu lisumu mpe akómisaki motema na ye makasi,+ ye ná basaleli na ye. 35 Mpe motema ya Farao ezalaki kaka makasi, mpe atikaki Bayisraele bákende te, kaka ndenge Yehova alobaki na Moize.+