Kobima

26 “Okosala tabernakle+ na bilamba zomi ya hema ya lini ya kitoko oyo elíngamalíngamá, na nsinga ya bulé, na lɛnɛ oyo epakolami langi ya mwa motane-bulé mpe na biloko oyo epakolami langi ya motane makasi. Okosala mayemi ya bakeruba na bansinga yango.+ 2 Elamba mokomoko ya hema ekozala mapeko* 28 na molai mpe monene na yango mapeko minei. Bilamba nyonso ya hema ekozala molai mpe monene ndenge moko.+ 3 Bilamba mitano ya hema ekokangana na mosusu mpe ekosala molɔngɔ, mpe bilamba mosusu mitano ya hema ekokangana na molɔngɔ. 4 Okosala madusu na nsinga ya bulé na mopanzi ya elamba moko ya hema yango na nsuka ya molɔngɔ mokomoko, mpe okosala bongo na mopanzi ya elamba ya hema na esika mosusu oyo yango ekokangana. 5 Okosala madusu 50 na elamba moko ya hema mpe madusu 50 na mopanzi mosusu ya elamba ya hema mpo etalana na esika oyo yango ekangani. 6 Okosala bakroshɛ ya wolo 50 mpe okokangisa elamba mokomoko ya hema na bakroshɛ yango, mpe tabernakle ekokóma eloko moko.+

7 “Okosala mpe bilamba ya nsuki ya ntaba+ mpo ezala hema likoló ya tabernakle. Okosala bilamba 11 ya hema.+ 8 Elamba mokomoko ya hema ekozala mapeko 30 na molai mpe monene na yango mapeko minei. Bilamba yango nyonso 11 ekozala molai mpe monene ndenge moko. 9 Okokangisa esika moko bilamba mitano ya hema mpe okokangisa esika moko bilamba mosusu motoba ya hema, mpe okogumba na mibale elamba ya motoba na liboso ya hema. 10 Mpe okosala madusu 50 na mopanzi ya elamba moko ya hema, elamba oyo ezali na nsuka ya molɔngɔ mokomoko, mpe madusu 50 na mopanzi ya elamba oyo ezali na esika mosusu oyo ekokangana. 11 Okosala bakroshɛ 50 ya kwivre mpe okokɔtisa bakroshɛ yango na madusu yango mpe okokangisa elamba ya hema esika moko, mpe yango ekokóma eloko moko. 12 Eteni ya elamba oyo etikali na bilamba ya hema ekodiembela. Ndambo ya elamba ya hema, oyo etikali, ekodiembela na nsima ya tabernakle. 13 Biteni ya bilamba ya hema oyo ekoleka na molai ekodiembela na mipanzi nyonso mibale ya tabernakle lipeko mokomoko, mpo na kozipa yango.

14 “Okosalela mpe hema ezipeli moko na mposo ya mpate-mobali, oyo epakolami langi ya motane mpe ezipeli moko na likoló oyo esalemi na mposo ya nyama ebengami fɔkɛ.+

15 “Okosala bakadrɛ+ mpo na tabernakle na nzete ya akasia mpe okotɛlɛmisa yango.+ 16 Kadrɛ mokomoko ekozala mapeko zomi na molai, mpe monene na yango ekozala lipeko moko na ndambo. 17 Kadrɛ mokomoko ezali na matutu* mibale oyo ekangani moko na mosusu. Bongo nde osengeli kosala bakadrɛ nyonso ya tabernakle. 18 Okosala bakadrɛ 20 na ngámbo ya sudi ya tabernakle.

19 “Okosala bitɛlɛmiselo 40 ya palata oyo ezali na mabulu,+ na nse ya bakadrɛ 20: bitɛlɛmiselo mibale oyo ezali na mabulu na nse ya kadrɛ moko mpo na matutu na yango mibale, mpe bitɛlɛmiselo mibale oyo ezali na mabulu na nse ya kadrɛ mokomoko oyo elandi mpo na matutu na yango mibale.+ 20 Mpo na ngámbo mosusu ya tabernakle, na ngámbo ya nɔrdi, salá bakadrɛ 20 21 ná bitɛlɛmiselo na yango 40 ya palata, oyo ezali na mabulu, bitɛlɛmiselo mibale oyo ezali na mabulu na nse ya kadrɛ moko mpe bitɛlɛmiselo mibale oyo ezali na mabulu na nse ya kadrɛ mokomoko oyo elandi. 22 Na nsima ya tabernakle na wɛsti, okosala bakadrɛ motoba.+ 23 Okosala bakadrɛ mibale mpo ezala makonzí ya nsuka ya tabernakle na bansuka mibale ya nsima. 24 Esengeli kozala mibale kobanda na nse tii na likoló, ekomata tii na lopɛtɛ ya liboso. Nyonso mibale ekozala bongo, mpe ekosala makonzí mibale ya nsuka. 25 Mpe ekozala na bakadrɛ mwambe ná bitɛlɛmiselo na yango 16 ya palata, oyo ezali na mabulu: bitɛlɛmiselo mibale oyo ezali na mabulu na nse ya kadrɛ moko mpe bitɛlɛmiselo mibale oyo ezali na mabulu na nse ya kadrɛ mokomoko oyo elandi.

26 “Okosala bikangiseli na nzete ya akasia: mitano mpo na bakadrɛ ya ngámbo moko ya tabernakle,+ 27 mpe bikangiseli mitano mpo na bakadrɛ ya ngámbo mosusu ya tabernakle, mpe bikangiseli mitano mpo na bakadrɛ ya ngámbo ya tabernakle na wɛsti, na nsima. 28 Ekangiseli ya katikati, oyo ezali na katikati ya bakadrɛ, ekokatisa banda na nsuka moko tii na nsuka mosusu.

29 “Okozipa bakadrɛ yango na wolo,+ mpe okosala bampɛtɛ na yango na wolo mpo ezala bisimbeli ya bikangiseli, mpe okozipa bikangiseli yango na wolo. 30 Osengeli kotɛlɛmisa tabernakle na kolanda ndenge oyo balakisaki yo na ngomba.+

31 “Okosala rido+ na nsinga ya bulé, na lɛnɛ oyo epakolami langi ya mwa motane-bulé, na biloko oyo epakolami langi ya motane makasi mpe na lini ya kitoko oyo elíngamalíngamá. Mayemi ya bakeruba ekosalema na bansinga likoló na yango. 32 Okotya yango likoló ya makonzí minei ya akasia oyo ezipami na wolo. Bakroshɛ na yango ekozala ya wolo. Makonzí ekotyama likoló ya bitɛlɛmiselo minei ya palata oyo ezali na mabulu. 33 Okotya rido na nse ya bakroshɛ mpe okokɔtisa sanduku ya Litatoli+ kuna na nsima ya rido. Rido ekokabola mpo na bino Esika Mosantu+ mpe Esika Eleki Mosantu.+ 34 Osengeli kotya ezipeli likoló ya sanduku ya Litatoli na kati ya Esika Eleki Mosantu.

35 “Okotya mesa libándá ya rido, ná etɛlɛmiselo ya miinda+ etalana na mesa, na ngámbo ya sudi ya tabernakle; okotya mesa na ngámbo ya nɔrdi. 36 Okosala mpo na ekɔtelo ya hema elamba ya kozipa* na nsinga ya bulé, na lɛnɛ oyo epakolami langi ya mwa motane-bulé, na biloko oyo epakolami langi ya motane makasi, mpe na lini ya kitoko oyo elíngamalíngamá oyo batongi yango esika moko.+ 37 Okosala makonzí mitano ya akasia mpo ezala elamba ya kozipa* mpe okozipa yango na wolo. Bakroshɛ na yango ekozala ya wolo, mpe okonyangwisa kwivre mpo na kosalela yango bitɛlɛmiselo mitano oyo ezali na mabulu.